Read songe Bena Fidihai 2 Bible Online

Bena Fidihai 2 - songe bible

Bena Fidihai 2

¹Binyibiabia su kwi kusengībwa mu Kidisitu, su nkusambībwa kwa kifulo, su nkwi kihwano kia Kikudi-E-Selelee, su nkanya ka munda, sundusana lusa,

²(biabia) nukumbashe muloo wande’shi, nunangushene kintu ki hamune, na kifulo ki hamune (mwakwikēla) balombashene hamune, na nangunanga yimune.

³Tanukitanga sunga nkimune mu lwima sunga nkia ntumbo ya bisumanga, ooo, anka mu kwihelesha kw’eshimba, ese muntu ahwandjikishe bakwabo be bebakile’bo bana bene.

⁴Tanubambashanga’nka bintu bienu, au na bie, au na bie, anka (bibuwa) muntu ese (atale) ku bia bakwabo.

⁵Dinyi eshimba dibadi mu Kidisitu Yesu dikale munda mwenu namu:

⁶E, biadi mwikale bu Efile Mukulu na mwinyi tamwihwandjikishe’she, kuhwana hamunenka n’Efile Mukulu nyi nkintu kia bisumanga, ooo.

⁷Anka bekutshishwa mpwandjikishi y’e na mwinyi, bealulwile bu mpika, bebumbile na kīfwano kia bantu.

⁸Biabadi musananwe mu kihaso kia bu muntu, beheleshe e na mwinyi, bakokyele mpaa na ku lufu, n’alo lwinyi ndufu lwa ku mutshi wa nkulusu.

⁹Henyihaha Efile Mukulu bamukamishe mwiilu mwi bula, bamuhele eshina dikile angi mashina oso’shi,

¹⁰kwishina dia Yesu manwi oso akuname, su ngā’mwa mwiilu, su ngā hano hashi, su ngā mushi mwa hashi,

¹¹eshi, ndjimi yoso ayikakumina’shi, Yesu Kidisitu nyi Nfumwetu, mpaa na ku ntumbo y’Efile Mukulu Yaiya.

¹²Binyibiabia anwe bakuminyibwe bande, anka mwanubakokyelele mafuku oso, kushi anka bu handji nenu, ooo, anka binobino nukishekishe’ko ha nshī kwanka, nukumbashe kihandjilo kienu na moo, na kususa;

¹³Mwanda nyi Efile Mukulu anyishā munda mwenu bianudia kukyeba’o na kukita abikyebe eshimba die dibuwa.

¹⁴Kitai bintu bioso kushī myunūno na mpaka;

¹⁵eshi, nwikale bashībatohekwe na bafukame, ta mbana b’Efile Mukulu, bashī balemane munkatshi mwa kifuko ki bikonyobikonyo na kia kufutakasha, nyi mwanumunyikā’nwe bu bimunyi munkatshi mwa bahanohansenga;

¹⁶(na) kutambika mwanda wa muwa, ami’shi, ’mone biandjia kusehela mwifuku dia Kidisitu’shi, nkimukame lubilo lwa bisumanga, sunga nkutuhwita mifubo ya bisumanga.

¹⁷Ee, su nankalambulwa ha kitahilo na ha mifubo ya lukumino lwenu, (biabia) nasehela, na kusehela’nyi n’anwe boso,

¹⁸Nyi mpa winyi uno mwanda namu anusehela, na kusehela n’ami.

¹⁹Anka nakuluhila mu Nfumwetu Yesu ahakakidi kihindji kihela nankenutumina Temote’shi, biandjia kukekala namu musambibwe bibuwa, hankashingula nyikashi yenu.

²⁰Mwanda nki na mungi muntu e n’eshimba hamunenka bu die, diakukabambasha nyikashi yenu binyibinyi.

²¹Mwanda boso abakimbā’nka biabo abo bana bene, tambia Kidisitu Yesu, ooo.

²²Anka’nwe anwiuku kishisho kie’shi, e bu mwana na nshye, bafubile n’ami mu mukāndu-wibuwa bu mpika.

²³Binyibiabia ahayisha kihindji kihela, natengyela kumutuma, hoso hankamono mwaukayila n’ami.

²⁴Anka nakuluhila mu Nfumwetu’shi, ami na mwinyi namu nankafiki ahakayisha kihindji kihela.

²⁵Anka natentekyeshanga mwaudi uyile biakwinutumina Ehafoloditusa, mukwetu na mufubi nami musalai, anka mutumibw’enu banfubilangamu’bia nadi n’abio lukalo.

²⁶Mwanda e badi enukyebela bikata, badi n’eshimba dibushito ha mwanda nubahushishe’shi, bakumbile busungu.

²⁷Mwanda badi na busungu binyibinyi hehi na lufu, anka Efile Mukulu bamufwidile lusa; tañanka hadi e, ooo, ñanka handji n’ami namu, tala nankamona kufwambuka hanundu ha kufwambuka.

²⁸Biabia namutumine mukishikishe kusasakata’shi, hanukamumono dimonyi, anukeuku kusehela, n’ami namu tankakamba kufwambuka.

²⁹Binyibiabia numutambule mu Nfumwetu na tuseho toso, na kunemeka bantu be bino:

³⁰Ha mwanda wa mufubo wa Kidisitu badi hehi na lufu, tamutale ku muwa we, mwanda wa kukumbasha lulobelo lwa mufubo wenu kwandji’mi.