Read songe Bena Fidihai 3 Bible Online

Bena Fidihai 3 - songe bible

Bena Fidihai 3

¹Kunfudilo, (anwe) bakwetu sehelai mwi Nfumwetu. Kufunda myanda yihamune kwanudi, kwandji’mi tayi bushito binyibinyi, anka kwanudi ngikumbane.

²Dimukai mbwa, dimukai bakitshi ba bubi, dimukai bakwilamuna.

³Mwanda’twe twi ba kisale abalangwilā Efile Mukulu mu Kikudi (E-Selelee,) na kwilungwila mu Kidisitu Yesu, tatukuluhiiā mu bia mbidi.

⁴Sunganyi biandjia kukuluhila mu bia mbidi; su mungi (muntu) ahwandjikisha’shi, nyi na bia kukuluhila mu bia mbidi, aminemukile’bio.

⁵(Nyi) musadibwe h’efuku dia mwanda, a ku mulongo wa Isalele, a ku kisaka kia Bendjamina: Mwina Hebelu a munkatshi mwa Bena Hebelu; mwiyile mukanda-wa-bishila nyi Mufadiseo;

⁶ha mwanda wa kinsukunsuku nabingabinga kikoñeno ki’Efile; mwiyile kululama kw’eshimba kwi mu mukanda-wa-bishila, nadi shī mutohekwe.

⁷Ank’abia bintu bibadi bu biandjia kudila’mi, abio binyi nebihwandjikisha bu bia bisumanga ha mwanda wa Kidisitu.

⁸Ee, binyibinyi nahwandjikisha bintu bioso bu bia bisumanga ha mwanda wa buwa būkishakishe bwa kiukilo kia Kidisitu Yesu Nfumami; ha mwanda we nakutshidilwa bintu bioso, nebihwandjikisha namu (anka) bu bitshianyi’shi, nkamone Kidisitu,

⁹na kuhetshibwa mwadi e, kushī na kululama kw’eshimba kwande ku na mwinyi, kwa mu mukanda-wa-bishila, anka ako kwinyi nyi nkwa ku lukumino lwa Kidisitu, nyi kwinyi kululama kw’eshimba kwa kw’Efile-Mukulu ku lukumino.

¹⁰Ami’shi, mwiūkye, na bukome bwa lusangukilo lwe, na kihwano kia kufwambuka kwe, hakuhwandjikishibwa ku lufu lwe.

¹¹(Ami shi,) su mpa kinyi su mpa kinyi, nankasañana na ku lusangukilo lwa bafwe.

¹²Tankwamba’shi, tampwanga kutambula, sunga nkukumbashidila, ooo, anka nakusulā kutambuka, su nankakwata’kia kianankwatshidilwe namu kwi Kidisitu Yesu.

¹³Anwe bakwetu tampwandjikisha’mi na mwinyi’shi, nahu kukwatshidila, ooo; anka kino kintu kimune kiankitā, nailwā abia bintu bia kumongo, na kwilomba kwi’bia bintu bia ku mpala,

¹⁴Netakulā ku kitundwilo kia bwedi bwa lwitamino lwa’mwa mwiilu mw’Efile Mukulu mu Kidisitu Yesu.

¹⁵Binyibiabia atwe boso bakumbane twikale n’eshimba di biabia; na su mu kintu kinyi su mu kintu kinyi nwi na ding’eshimba, Efile Mukula akenufumbwila kinyi kintu namu.

¹⁶Dimonyi, anka henyi hatuhu kufika, tutambukye belongye ku lwinyi lutshi hamune, tunangushene kinyi kintu kimunenka.

¹⁷Anwe bakwetu nwikale balondji hamune bu’mi, nutale’bo abatambuka biabia, mwa nwi n’etu bu kihwandjikisho.

¹⁸Mwanda be bungi abatambuka, banenulungwile misusa na misusa, na binobino nenulungula na mpolo’shi, (abo be) beshikwanyi ba nkulusu ya Kidisitu;

¹⁹Nfudilo yabo nkulwishibwa, efile abo nyī’fu (diabo,) na ntumbo yabo yi mu būfu bwabo, basha eshimba ’nka dia bintu bia hanohashi.

²⁰Mwanda bwina-kibalo bwetu bwi mwiilu; nyi kwatwindjilā winyi Muhashi, Nfumwetu Yesu Kidisitu.

²¹E akālula mbidi yetu ya būfu’shi, yikale yihwandiikile hamune na mbidi ye ya ntumbo, mwiyile kufuba kwao euku kukokyesha bintu bioso kwadi e na mwinyi.