Read songe Bena Kolose 1 Bible Online

Bena Kolose 1 - songe bible

Bena Kolose 1

¹Paulu mutumibwa a Yesu Kidisitu mwamukyebelā eshimba di’Efile Mukulu, na Temote mukwetu:

²kwi bala-munwe-bakishila, na bakwetu ba kishima mu Kidisitu be mu Kolose; bu-muntu bwikale n’enu, na kufukama kw’Efile Mukulu Nshyetu, na kwi nfumwetu Yesu Kidisitu.

³Atutumbulā Efile-Mukulu, Yaiyaa Nfumwetu Yesu Kidisitu, atwinutekyela mafukuoso,

⁴kasha tubahushishe (mukāndu) wa lukumino lwenu mu Kidisitu Yesu, na wa kifulo (kianudi n’akio) kwi balamunwe-bakishila boso,

⁵ha mwanda wa lutengyelo lubenubikilwe mwiilu, lwanubahushishe kalā mu mwanda wa biabinyibinyi bia mukāndu-wibuwa;

⁶ubafikile kwanudi anka mwaubafikīle kosokoso hanohansenga, na kuha bikuba abienda abifwimanga, anka mulombene mwanudi’nwe, mpaa na ha dinyi efuku dianubahushishe’o, na kushingula biya bu-muntu bw’Efile Mukulu mu biabinyibinyi.

⁷Mwanubāmbwile namu kwi Ehafalasa mukwetu mpika a kifulo, winyi e kwanudi nyi mufubi a kishima a Kidisitu;

⁸n’e winyi betulungwile kifulo kienukia mu Kikudi-E-Selelee.

⁹Nyi mpa uno mwanda atwe namu, kasha diadi’efuka diatubahushishe’o, tatulekā kwinutekyela na kukyeba’shi, nuushibwe na kiukilo kioso mukyebela eshimba die mu kalolo koso na lushingulo lwa Kikudi,

¹⁰na kutambuka muhwandjikile Nfumwetu mpaa na kusehela koso kw’eshimba, bianudia kuha bikuba bia mu mifubo yoso yilumbulukye, na kwenda akukulanga mpaa na ku kushingula koso kw’Efile Mukulu;

¹¹na kunyishibwa mu ntshitshiba yoso, mulombene bukome bwa ntumbo ye, ku lwishinko loso na kahuñanyi k’eshimba ke na tuseho.

¹²Nutumbule Yaiya, betuhwandjikishe’twe kwikala mu lwabano lwa buhyanyi bwa balamunwe-bakishila mwitata;

¹³betumañunwine ku matalwa a mufito, etutundulwila namu mbufumu bwa Mwana a kit’ulo kie.

¹⁴Mwadi e nyi mwatubamwena kikudilo, ta nkulekyelwa kwa milwisho,

¹⁵E nkyebukilo y’Efile Mukulu shyamonyibwa, mbedi a bihangibwe bioso.

¹⁶Mwanda kwadi e bintu bioso bi mwiilu bibahangilwe, n’abi hano ha nsenga, abimwekibwa na bishyabimwekibwā, sunga mpun’a nsulu (ya bufumu,) sunga butontshi, sunga mafumu a ba I’Etat, sunga bamatalwa, biosobioso bibahangilwe kwadi e, na ha mwanda we.

¹⁷E winyi nyi a kwibedi kwa bintu bioso, na kwadi e bintu bioso bi kwanka.

¹⁸E namu nyi mutwe wa mbidi, ta nkikoñeno ki’Efile: e winyi nyi nkibangilo, nyi mubedi’nyi a (lusangukilo) lwa bafwe’shi; mu bintu bioso ekale na kukididila’mo bikata.

¹⁹Mwanda ubatosheshe Yaiya mwishimba’shi biushibwe bioso bikale mwadi e;

²⁰na habahwile kwikasha kufukama kwa mase a nkulusu ye, nyi anka hadie, nyihakulombēsha bintu bioso kwadi e na mwinyi; nākula’mi’shi, nyi anka kwadie, sunga mbintu bia hano lia nsenga, sunga mbintu bi mwiilu.

²¹Anwe kala nubadi batuhishene na kumushikwanyi mu binangu bienu ku bikitshino bi bubi, anka binobino e benulombasha,

²²mu mbidi ye ya bu muntu, ku lufu, kwinulubula balamunwebakishila, na bashī batohekwe na bashī na bilema ku mpala kwe.

²³Su anwiyididila mu lukumino lubangibwe na lushimatshishibwe, tanukakashibwa namu ku lutengyelo lwa mukāndu-wibuwa wanubahushīshe, na ubalungwilwe ku bihangibwe bioso bi mushi mweilu, nyi anka ha winyī’uo nakitshinwe tandji mufubi.

²⁴Binobino nasehelā mu bia kufwambuka biande ha mwande wenu, na kunkumbesha biandji mulobeshe bia malwa a Kidisitu mu mbidi yande ha mwanda wa mbidi ye, yinyī’o nyi kikoñeno ki ’Efile.

²⁵Anka ha kinyiī’kio nyi mwikashwe mufubi, mulombene lulumbulwilo lw’Efile Mukulu lubampelwe ha mwanda wenu, kukumbasha mwanda w’Efile-Mukulu;

²⁶(nyi) kifibwe kibadi kifwame ku bihangilo na ku bihungilo, anka binobino kibafumbwilwa kwi balamunwe be ba kishila.

²⁷Kwabadi’bo nkubatokyel’eshimba di’Efile Mukulu kwiukisha’kio ki buheta bwa ntumbo bwa kino kifībwe munkatshi mwa Badjentaila, nyi Kidisitu mwi’nwe, lwinyi lutengyelo lwa ntumbo.

²⁸Nyi atulungwila, na kudimuna na kulambukisha muntu oso mu binangu bioso; biatudia kulubwila muntu ese mukumbane mu Kidisitu Yesu.

²⁹Nyi henyi hantuhwita mufubo, na kunyisha mulombena mufubo we, n’au winyi aufubisha munda mwande na ntshitshiba yimoo.