Read songe Bena Kolose 2 Bible Online

Bena Kolose 2 - songe bible

Bena Kolose 2

¹Mwanda nankyebe’nwe nwiukye mwa ndwilā ngoshi bikata ha mwanda wenu, na ha mwanda wa’ba be ku Laodesea, na he ba abafwime boso bashyamwene mpala ya mbidi yande;

²ami’shi, mashimb’abo asengibwe, na kwiluñena hamune mu kifulo, mpaa na ku mono yoso ya lushingulwilo lukumbane lwa nangunangu, mpaa na ku kiukilo kikumbane kia kifībwe ki’Efile-Mukulu, na kia Yaiya na Kidisitu.

³Mwadi e bia binemo bioso bia kalolo na kiukilo mbifībwe.

⁴N’au’o uno wañakula’shi, tala su nanyi su nanyi akenudimbi na mīsambo ya kōngola.

⁵Mwanda sunga nki munkatshi mwenu mu bia mbidi, anka nyi n’enu mu kikudi, nkwete kusehela na kutala nyikashi yenu, na kunyiñamana kwa lukumino lwenu mu Kidisitu.

⁶Binyibiabia anka mwanubatambwidile Kidisitu Yesu Nfumwetu, tambukilai mwadi e,

⁷nushikye mishi na kukūla mwadi e, na kukankamena mu lukumino, anka mwanubalambukishwe na kukishakisha kufwima mwanka na lutumbu.

⁸Dimukai tala su nanyi su nanyi akenulwisha na mīsambo ya binangu bimoo na ya kudimba kwa bisumanga, mwiyile kwilondeshena kwa mīsambo ya bantu, na ya bileshesho bia hanohansenga, mushī mwiyile Kidisitu, ooo.

⁹Mwanda kikumbana kioso kia bw’Efile-Mukulu a mbidi yishima akibombelā mwadi e.

¹⁰N’anwe (namu) nwibakumbane mwadi e, e winyi nyi mutwe wa bumankinda boso na matalwa.

¹¹Mwadi e namu nwibasalwe kisale, (akio) kishīkikitshibwe na māsa, (nyi) kia kufūla mbidi ya milwisho ya bu muntu mu kisale kia Kidisitu.

¹²Nubashīkilwe n’e mu lubatshisho, mu lwinyi’lo namu nwibasangulwe hamune n’ē ha lukumino lwa kikitshibwe ki’Efile Mukulu, bamubushishe ku lufu.

¹³Anwe namu bianwibekule mu milwisho na kushīkusalwa kwa mbidi (yenu,) e benusangwile hamune n’ē, bahwile (namu) kwinulekyela kusola kwa myanda koso.

¹⁴Bashimangishē’kia kifundwe kia milangilo yibadi yituhishene n’etu, eyikashidila, eyikokwela ha mutshi uhingishene (we.)

¹⁵Na habahwile kushinda bumankinda na matalwa, bebimwekeshe hatoka, bebitshomwe ne hanka.

¹⁶Binyibiabia tanukuminanga (bantu) kwinutshibila kimu ha mwanda wa bidibwa, sunga mpa mwanda wa biakutoma, sunga mpa mwanda w’efuku dia bidibwa biakusehela, sunga mpa mwanda wa mweshi uhya, sunga mp’efuku dia Sabado;

¹⁷Abio nyi mwesheshi wa bintu abikafiki; anka mbidi nyi ngia Kidisitu.

¹⁸Tanukuminanga muntu, sunga ngumune kwinunyenga bwedi bwenu, ku kwihelesha kwa kuladila na lulangwilo lwa bamwikeilu, kwete kwihatshika mū ’ya myanda yiashī mumone, na kwitatula kwa bisumanga kwa ku nangunangu ya ku mbidi.

¹⁹(E,) tamunyinge kwikala na (Kidisitu) mutwe (wa mbidi,) kwaudi mbidi yishima ku binyingwa na mishila, bihebwe bikushisho, na bilukibwe hamune, tabiend’ābikulanga na kukushibwa kw’Efile Mukulu.

²⁰Binyibiabia su nubafwile na Kidisitu ku bilesheso bia hanohansenga, a nkinyi kianukokyeshwa ku milangilo hamune bu anutala hanohansenga?

²¹(tanuatanga), tanutompanga na mu kanwa; tanukumanga;

²²Abio bioso abikashimangishwa mu kukitshishwa; mwiyile milangilo na ndambukisho ya bantu?

²³Binyi bino bintu bi na kileshesho kia binangu mu lulangwilo lwa mukyebel’eshimba, na mu kwihelesha, na kuhasha kukata kwa mbidi, kushī mu kinemo, sunga nkihela; mpaa na kukwikuta kwa bia mbidi.