Read songe I Bena Tesalonika 1 Bible Online

I Bena Tesalonika 1 - songe bible

I Bena Tesalonika 1

¹Paulu na Shilefenuse na Temote, ku kikoñeno ki’Efile kia Bena Tesalonika ki mw’Efile Mukulu Yaiya na mwi Nfumwetu Yesu Kidisitu: Bu-muntu bw’Efile bwikale kwanudi, na kufukama, kw’Efile Mukulu Yaiy’etu, na kwi Nfumwetu Yesu Kidisitu.

²Atutumbul’Efile Mukulu mafuku oso ha mwanda w’anwe boso; atunutemuna mu nteko yetu.

³Atunangushena mufubo wa lukumino lwenu anka bukyelebukyele na mufubo wenu wa kifulo, na lutengyelo lwiididile lwa Nfumwetu Yesu Kidisitu ku mpala kw’Efile-Mukulu Yaiy’etu.

⁴Hakwiuka bakwetu ba kifulo kusangulwa kwenu kwa kw’Efile Mukulu.

⁵Mwanda mukāndu-wibuwa wetu taubafikile kwanudi mu bishima bia bisumanga, ooo, anka mu bukome namu, bwinyi bwa Kikudi-E-Selelee, na mu kukankamikibwa kwi moo; mwanda anwiuku mwa tubadi bekele munkatshi mwenu ha mwanda wenu.

⁶N’anwe nubafikile nwaluluka bu balondji bā’twe, na ba Nfumwetu, ha kuhwa kutambula Mwanda (w’Efile) mu malwa akata, na muloo wa Kikudi-E-Selelee.

⁷Biabia nubāluluki kihwandjikisho kwi boso bakumine mu Masedonya na mu Akaya.

⁸Mwanda kwanudi kubēlwe musase wa Mwanda wa Nfumwetu, tañanka ku Masedonya na ku Akaya ooo, anka na mu mpese yoso lukumino lwenu lwa kw’Efile-Mukulu lubahalakene; biabia atwe tatwi na mwanda kwakula kintu.

⁹Mwanda’bo bana bene abetwisambila mubadi mwikele nyikashi yetu ha kutwela (kwakwa) kwanudi, na mwa nubafutalele mankishi, nwalulukila kw’Efile Mukulu na kumufubila, E, Efile-Mukulu atala, n’a binyibinyi:

¹⁰na kutengyela (kufika) kwa Mwan’e mwiilu, winyi basangukile ku lufu, (nyi) Yesu betulamunwine ku bukyelo bwanakafikye.