Read songe I Bena Tesalonika 4 Bible Online

I Bena Tesalonika 4 - songe bible

I Bena Tesalonika 4

¹Kunfudilo anwe bakwetu, atwinusendela, na kwinulanga mwi Nfumwetu Yesu’shi, mwanubatambwile kwatudi mwaudi uhwandjikile’nwe kutambuka, na kusehesh’eshimba di’Efile Mukulu, nyi anka mwanudia kukishakisha.

²Mwanda’nwe anwiuku mwatubenukayikile kwi Nfumwetu Yesu.

³Mwanda uno’u nyi a ukyebe eshimba di’Efile Mukulu, tankulamunwa kwenu selelee’shi, nushile bukyebekyebe;

⁴eshi, anwe boso ku muntu na muntu, eukye mwa kwikela na mwina kwe mu kulamunwa-kwiselelee, na kinemo;

⁵kushī mu lwabi lwa kusuasua kwa yibubi hamune na Badjentaila bashyabeuku Efile Mukulu;

⁶eshi, muntu sunga ngumune mukile na kudimba mukwabo mu mwanda, ooo, mwanda Nfumwetu e mwobodi a bano’ba, anka mwatubenudimwinyine kwibedi na kwinulungula.

⁷Mwanda Efile Mukulu tamwitwitanyine ku bia kushulakwa-bishila, ooo, anka ku bia kulamunwa kwa kishila.

⁸Binyibiabia yawa akutuna, tamutune muntu, ooo, anka Efile Mukulu, betuhele namu Kikudi-E-Selelee e.

⁹Anka ha mwanda wa kifulo kia kwi bakwenu, nki na lukalo lwa kwinufundjila’nyi kianka; mwanda’nwe bana bene nwibahwe kulambuki shwa n’Efile Mukulu kwitomeshena kifulo;

¹⁰na binyibinyi anukitshi biabia kwi bakwetu boso be mu Masedonya moso; anka’twe atwinusendela’nwe bakwetu’shi: nukishekishe kukula (mu’kio).

¹¹Anka nwīye kwikala nyā, na kukita mifubo y’anwe bana bene, na kufuba na maas’enu anka bu mwatubenukayikile;

¹²eshi, nutambukile bihwandjikile kwi’ba be hasha’shi, bia nushyakulobesha kintu.

¹³Anka tatukyebe’nwe kwikala bahatamine ha mwanda bo wa’ balale tulo (twa lufu’) shi, tanufwambukanga hamune bu bangi bashī na lutengyelo, ooo.

¹⁴Mwanda su atukumina’shi, Yesu bafwile, asanguka dimo, nyi anka biabia na mu kwi’ba bahone mu tulo (twa lufu) mu Yesu, Efile Mukulu akebafisha hamune n’e (na mwinyi.)

¹⁵Mwanda unou nyi watwinulungula kwiyi dia Nfumwetu’shi, atwe abatala, bashale mpaa na kufika kwa Nfumwetu, tatukebabadidila sunga mpahela henyi abo abalele mu tulo (twa lufu,) ooo.

¹⁶Mwanda Nfumwetu na mwinyi akayiki mwiilu na musase, n’eyi dia mwikeilu mukile ben’e bukata, na mōno wa mpungi y’Efile Mukulu: na bafwe ba mu Kidisitu abakasanguka kwibedi,

¹⁷kumongo atwe abashele, abatala atukātshibwa mu makumbi hamunenka n’abo, kufumankana na Nfumwetu mu luwa (lwa mwiilu): biabia atukekala ikala-ika na Nfumwetu.

¹⁸Binyibiabia nwinyishenei na yino myanda.