Read songe Ii Bena Tesalonika 3 Bible Online

Ii Bena Tesalonika 3 - songe bible

Ii Bena Tesalonika 3

¹Kunfudilo, (anwe) bakwetu, nwitutekyelei’shi, Mwanda wa Nfumwetu wende lubilolubilo na kutumbishibwa, anka mwaubakitshinyine n’enu.

²Anka’shi, tumañunwe kwi bantu bansesa na babi; mwanda (bantu) boso tabe na lukumino.

³Anka Nfumwetu ’mushimate, akenukankamisha na kwinulama kwi’wa a mwanda ubi.

⁴Twi na kusumina mu Nfumwetu ha mwanda w’anwe’shi, nukite na kukakita aya myanda yiatubenukayikile.

⁵Na Nfumwetu akunkushe mashimb’enu mu kifulo ki’Efile Mukulu, na mu lutengyelo lwa kwishinka lwa Kidisitu.

⁶Binobino atwinukayikila’nwe bakwetu, mwishina dia Nfumwetu Yesu Kidisitu, nukungulukyei’nwe bana bene kwi ese mukwenu atambuka na kukalakala, na mushī mwiyile myanda ya mu kifulo yiabetutambwile kwatudi.

⁷Mwanda’nwe bana bene anwiuku mwabidi binulombene kwitulonda; mwanda tatubadi bakalekale munkatshi mwenu;

⁸sunga nkudia biakudia bisumanga, su mbia’nyi, su mbia nyi, ooo; anka tubatuhwitanga mu mifubo na mitanyo bufuku na kanya, mwanda wa kuhela’shi, tala twakamwena kwanudi, sunga nku umune, ooo.

⁹Kushī ha mwanda wa kukutwa matalwa, ñanka ha mwanda w’atwe kwikala kwanudi bu kihwandjikisho kianudia kulondela.

¹⁰Mwanda hatubadi n’enu, ñanka kino kiatubenukayikile’shi: su kwi shyafuba tadianga namu.

¹¹Mwanda’twe atuhusha’shi: kwi bamo munkatshi mwenu bakalekale, bashyabafubā sunga mpahelahela, anka’bo mbasangakanyi.

¹²Anka’bo be bino, atwibakayikila na kwibalanga kwi Nfumwetu Yesu Kidisitu’shi: Bafube mifubo anka nyaa, na kudia bidibwa bi’abo ba na bene.

¹³Anka’ nwe bakwetu, tanukokangai mu kukita bilumbulukye.

¹⁴Anka su nanyi su nanyi shyakokyelā mwanda wetu wa mu (uno) mukanda, (biabia) nubangīle yawa muntu tanutembanga n’e, akwatshishwe būfu,

¹⁵Sunga mbiabia tanumwikashanga bu mwishikwanyi n’enu, ooo, anka mulangei (elango) bu mukwenu.

¹⁶Binobino Nfumwetu a kufukama, e na mwinyi ekal’enuhanga kufukama mafuku oso, su mpa kinyi su mpa kinyi. Nfumwetu ekale n’enu, anwe boso.

¹⁷Lwimuno lwa’mi Paulu lwa ku mboko y’āmi na mwinyi, nyikitundwilo kia mu oso mukanda: nyi anka bino mwanafundjila.

¹⁸Bu-muntu bwa Nfumwetu Yesu Kidisitu bwikale n’enu, anwe boso. Amena.