Read songe I Temote 2 Bible Online

I Temote 2 - songe bible

I Temote 2

¹Henyihaha nyi n’elango kwibedi’shi: miyayilo, na nteko tia nteko ya kusengyala, na biakutumbula bitekyelwe ha bantu boso,

²Ha mwanda wa banfumu na ha boso be na matalwa; mwatudia kwikela na muwa wetu nyaa na kufukama mu bwin’Efile Mukulu boso na kinemo.

³Mwanda uno wibuwa, ngukuminyibwe namu ku meso kw’Efile Mukulu Muhashi etu;

⁴e akyebela bantu boso kuhashibwa, na kufika ha mwiukidila kwa biabinyibinyi.

⁵Mwanda kwi Efile Mukulu umune, na musengi umune hankatshi Efile Mukulu na bantu, winyi muntu nyi Kidisitu Yesu.

⁶E behanyin’e na mwinyi ta nkikulo kia boso, kia kulungulwa ha bihindji bia’bio bi na mwinyi bilombane.

⁷Nyi ki nasangwilwa mulungudi e Efile na bu mutumibwa (nākula bia binyibinyi mu Kidisitu, tandjimbi, ooo) (na) bu mulambukishi a Badjentaila mu lukuluhilo na mu biabinyibinyi.

⁸Nankyeb’ami’ shi, bana balume batekye kosokoso, babushe maboko a hatulwe-e-kishila ashī na nsungu sunga nkuhakanya.

⁹Mpamune na bana-bakashi namu befwadikye na bifwalwa bihwandjikile na būfu na bumpila, kushī na nyene yitshikye, sunga nkilonda kia nsahabu, su mabwe aneme bikata, su bifwalwa bia buheta,

¹⁰anka na bikitshino bibuwa (bekal’anka bu bana bakashi balombene bu abatemunwa bu b’Efile Mukulu).

¹¹Mwana-mukashiāmbule nyaa mu kukokyela koso.

¹²Anka tankumina mwanamukashi kulambukisha, sunga kwikala na matalwa hanundu ha mwana mulume, ooo, anka ekale nyaa.

¹³Mwanda Adama nyi mubedi kuhangibwa, biabia Efa nkulonda;

¹⁴Adama tamongolwe, ooo, anka mwana-mukashi habōngwelwe bahonene mu kusola kwa mwanda.

¹⁵Sunga mbiabia, akahanda hakutanda bana, su akekala mu lukuluhilo na kifulo, na kulamunwakwa-kishila, na bumpila.