Read songe Ii Temote 3 Bible Online

Ii Temote 3 - songe bible

Ii Temote 3

¹Oshingule uno namu’shi, mu mafuku a kunfudilo bihindji bia bukoho bianakafikye.

²Mwanda bantu banakekale na kifulo kwi’bo bana bene, basehedi ba mono, bakwitatula, bakwinemeka, basha kasābu, bashyabakokyela bebatande, bashī na lutumbu, bashī balamunwe-bekishila,

³bashi na kifulo kia butandjilo, batshibi ba bihwano, bansangakanyi, basha nkokyela ya bubi, basha bukyelo, babendji ba balumbulukye,

⁴basha kwihulukishena kīhuko, basha kufwakamisha, basha kwilungula, bafule bisehelwa he Efile Mukulu.

⁵Abehwandjikisha mu bwin’Efile, anka bukome bwa’bo abebutuna; futala baba be bino.

⁶Mwanda be bino mbaba abongolokyelā mu mashibo, na kōngwela bana bakashi bahatakane, banemenwe na ntilwisho, abakunkwishwa kungi na ngabiabi yabo ya bihaso na bihaso;

⁷abēnd’ābambulanga, anka abakutshidilwa mwakwiukila biabinyibinyi.

⁸Anka hamune Yanese na Ndjambelese mwabasakidishe Mosesa, anka biabia na bano namu abakingila biabinyibinyi; bantu basha binangu binyangye, basabule lukumino.

⁹Anka tabakayididila mwanka, ooo, mwanda kuhatakana kwabo akukatumbukile hatoka kwi bantu boso, ankahamune bu ba bakwabo.

¹⁰Ank’obe bolondele ma kusasakata mu lulambukisho lwande na mu nyikashi ya muwa wande, na mwa ndelā, na lukumino, na kahuñanyi, kifulo.

¹¹Kubingwabingwa, na mifwambuko bibanfikile ku Anteoka na ku Ikoneume, na ku Lyseta; mu kuno kubingwabingwa nakankamanyine mwanka, anka mu bioso Nfumwetu bamañunwine.

¹²Ee, boso batee mashimba ku bwin’Efile kubingwabingwa nyi nkwabo.

¹³Anka bantu babi na bansesa abakēnd’ābafwimanga na kufwima kwa ku bubi, na kōngoshena na kwiongola (bana bene).

¹⁴Anka okankamane mu myanda yibōmbwile, na yiobweukishwe, hakwiuk’aba babakulambukishe’yo’shi,

¹⁵Tobohwile lewiuka Bifundwe bilamunwe-bikishila ku bukinga, (bobe) biuku kukuukisha binangu mpaa na ku kihandjilo, mu lukuluhilo lwi mu Kidisitu Yesu.

¹⁶Bifundwe bi’Efile bioso mbihebwe ku muwa uhwilwe w’Efile Mukulu, abimwenwa namu ku lulambukisho, ku kutahwa kw’eshimba, ku lukalasheno, ku kuhasha mu kululama’shi,

¹⁷muntu Efile Mukulu ekale mukumbane, mulumbuludile ku mifubo yoso yilumbulukye.