Read songe Ii Temote 4 Bible Online

Ii Temote 4 - songe bible

Ii Temote 4

¹Biabia nakukayikila n’eshimba dioso ku mpala kw’Efile Mukulu na kwa Nfumwetu Yesu Kidisitu, tadi akatshibi (myanda) y’abatalanaya bafwe hakufumbu kana bufumu bwe.

²Lungula Mwanda (w’Efile;) wekale na mpulu halombene na hashī halombene, webashimikye (mīsambo,) webahatulwile, webalangye na kuhuñanya koso na lulambukisho.

³Mwanda kihindji akikafiki kiabakahele lulambukisho lulombane; anka mwiyile ngabiabi yabo abakefwimisha kwi’bo bana bene balambukishi, basha matwi e na kibāba;

⁴abakashiki matwi abo ku biabinyibinyi, na kutadila ku miele.

⁵Ank’obe ohile mu bintu bioso, kankamana mu bishiotshi, fuba mufubo wa bu mulungudi e’Efile, okumbashe bulungudi bobe bw’Efile biya.

⁶Mwand’ami nyi mwimene kuhongolwa bu kitahilo, na kihindji kiande kia kufiluka kibafiki.

⁷Nahu kulwa ngoshi yilumbulukye, nahu kushiyana kwande, tampwile kulama lukumino;

⁸biabiakubambikilwe kilongo kia kululama, kiankahebwa kwi Nfumwami nsushi mululame, ku dia di’efuku; tañanka kwandji’mi buhenka, ooo, anka kwi’bo boso abasehela kufumbuka kwe.

⁹Osasakate kufika kwandji mendo;

¹⁰mwanda Demase, habatomo bia hanohansenga kifulo, bambomboka, bende ku Tesalonika. Kelesense (namu) nkwenda ku Ngalatea, Tetuse (namu) ku Ndalamatea.

¹¹Anka Luka nyi andji n’e; wate Mako ofikyen’e, mwanda nyi andjia kumwena mwadi mu bulungudi bw’Efile.

¹²Tyekikusa namutumine ku Efisesa.

¹³Mutwelo wa mūshi unalekyele ku Toloasa kwi Kapūsa, ofikye n’ao hotofiki, na mikanda, tokiokwamba mikanda ya bikoba.

¹⁴Alekesande nsendwe a bilonda-bia-munyinga bankitshine bibubi bwimoo. Nfumwetu amulubwile mwiyile bikitshino bie.

¹⁵Obe, namu odimukye kwadi, mwanda e basabulwile myanda yetu bikata.

¹⁶Ha mwalulo wande wa (mu kimu) kia kwibedi, takubadi sunga ngumune baimene n’ami ooo, anka boso abampalakene: (Nateka) Efile Mukulu ami’shi: Tala akebalondola n’ao.

¹⁷Anka Nfumwetu badi mwimane n’ami, bankankamikile’shi: bulungudi bw’Efile būkidilwe, na Badjentaila boso bahushe: Namañunwinwe namu mu kanwa mwa ntambwe.

¹⁸Na Nfumwetu akamañuna ku mifubo yoso yibi, akambombelesha mpaa na ku bufumu bwe bwa mwiilu; kwadi e kwikale ntumbo mpaa na ikala-ika. Amena.

¹⁹Nyimwine Peleseka, na Akwila, na ba ku nshibo ya Onesefolusa.

²⁰Elasatusa bashele ku Kodinda, anka Tolofimusa namulekye ku Miletusa akumbu.

²¹Sasakata kufika hashyabandjile kufika kia mashika. Eubulusa akwimuna, na Pudenesa, na Kalaudia, na bakwetu boso hamune.

²²Nfumwetu ekale na kikudi kiobe. Bumuntu bw’Efile bwikale n’enu.