Read songe Tetusa 2 Bible Online

Tetusa 2 - songe bible

Tetusa 2

¹Ank’obe okule myanda yihwandjikile na lulambukisho lulombane;

²eshi, bana-balume bakulu bekale bampila, basha mudingo, basha lwitongo, mulombane mu lukumino, mu kifulo, na mu lwishinko.

³Banabakashi bakulu mpamunenka (bekale) abashidi mu bikitshino mulombene kuhatulwa-kwi-kishila, bashī bansankakanyi, bashī behane ku nfinyo yibungi, balambukishi ba myanda yilumbulukye;

⁴eshi, balambukishe bansongwakashi kwikala na lwitongo, (bekale) basha kifulo kia balunda, basha kifulo kia bana,

⁵bampila, bakamame be soo, balwēshe ku mashibo kwabo, balumbulukye, basha kukokyela kwi balunda babo bana bene eshi, tala, Mwanda w’Efile Mukulu wakakayibwa.

⁶Bansongwalume mpamune webalangye kwikala basha lwitongo.

⁷Mu bintu bioso weleshe bu kiliwandjikisho kia bikitshino bilumbulukye; mu lulambukisho (mwikale) mushī mufundakane, wedingye;

⁸mīsambo (yikale) yilombane yishyakuhoneshwa’shi, yawa e ku luhese lwa kutuhishena n’enu akwatshishwe būfu, hakukutwa kintu kibi, sunga nkimune kia kwinwisambila.

⁹(Lungula) bahika bakokyele banfumwabo, na kwibatosha ’mashimba mu bioso; kushī kuhūlula dimonyi:

¹⁰kushī kwiiba, anka kulesha kushimata kulumbulukye koso’shi, balumbulushe lulambukisho lw’Efile Mukulu Muhashi etu mu bintu bioso.

¹¹Mwanda bu-muntu bw’Efile Mukulu bubamwekyele bwa kufisha kihandjilo kwi bantu boso;

¹²bwa kwitulambukisha’shi, tutune bushī bwin’Efile Mukulu, na ngabiabi ya hanohansenga, biatudia kwikala na witongo, na kululama, na bu ba bwin’Efile Mukulu hanohansenga;

¹³na kutala kwa lwinyi lutengyelo lwa mwabi, na lufumbuko lwa ntumbo lw’Efile Mukulu etu mukata, Muhashi etu Yesu Kidisitu.

¹⁴Betwihanyine e na mwinyi mwadia kwitukūdila ku bubi boso, na kutosha (atwe) bantu tatudi b’e kwadi e na mwinyi, ba kinsukunsuku kia bikitshino bilumbulukye.

¹⁵Yino myanda webalungule’yo, na kulanga, na kusashila, webahulamishe’yo na matalwa oso. Takukakubenganga muntu, sunga ngumune, ooo.