Read songe Bena Bahebelu 11 Bible Online

Bena Bahebelu 11 - songe bible

Bena Bahebelu 11

¹Biabia lukuluhilo nyi nkwiukidilo kwa bintu abitengyelwa, nyi lushingulwilo lwa’ya myanda yishyamwekyele.

²Mwanda nyi nku lwinyi’lo kubatemwinwe bakulu (ba-kala) kitemwino.

³Ha lukuluhilo atushingula’shi, hanohansenga hoso habalumbulwilwe ku Mwanda ubakwilwe kw’Efile, biabia bintu abimonwa tabibakitshinwe ku bintu abimweka, ooo.

⁴Nyi mpa lukuluhilo Abele balambwile Efile Mukulu kitahilo kifinyine kia Kana buwa, nyi mpa kinyi’kio e batemwinwe’shi, mululame, Efile Mukulu (namu) bamutemwinanga ha milambu y’e; nyi anka h’ayo e tadi mufwe kiakulā,

⁵ha lukuluhilo Enoke batentwilwe (mwiilu), tamumone lufu; tamusananwe, mwanda Efile Mukulu bamutentwile; mwanda kwibedi kwa kutentulwa kwe, badi atemunwa’shi; e mutoshe eshimba di’Efile Mukulu.

⁶Anka kushī lukuluhilo nkukutshidilwe kutosh’eshimba (die,) mwanda yawa akwifubula kw’Efile Mukulu wadi n’ao ngwa kukumina’shi, e kwanka, atushā bwedi kwi’bo abamukimbā na kusasakata.

⁷Ha lukuluhilo Noa badimwinwe kw’Efile Mukulu ha myanda yishyabandjile kumweka, habakwatshilwe na moo (wa kw’Efile,) bebakile bwato bwa kiha ndjilo kia ba ku nshibo ye, nyi henyi’ho habahoneshe bia hanohansenga, bālulukile tampyanyi a kululama kwiyile lukuluhilo.

⁸Ha lukuluhilo Abalahama habaitanyinwe ku katuka kwenda kuntu kwadia kutambula buhyanyi kumongo, bakokyele; e bakatukile, ēnda, kwa shyeuku kwinyi kwēnde, ooo.

⁹Ha lukuluhilo batembele mu yinyi nsenga ya mulayilo, hamuneka bu (mu) nsenga yishī y’e, bashalanga mu mahema na Isaka na Yakoba, bampyanyi hamune n’e baha mulayilo umunenka wīnyi.

¹⁰Mwanda badi atengyela kibalo, bibangilo bia’kio, Efile Mukulu nyi mwibaki na mukitshi akio.

¹¹Ha lukuluhilo Sala, e na mwinyi batambwile bukome bwa kwimita eimi, e tabadi mukile ahatandjilwa batandjile, mwanda bahwandjikishe’shi: Winyi bandayile nga kishima.

¹²Binyibiabia nyi habatukile umunenka, e namu badi bu mufwe, anka hamune mwikele nyenyenyi mwiilu bungi, na bu mafwenkenyi a ku bukunkula kwa mema-akalunga ashyabadikwa.

¹³Bano boso abafwile mu lukuluhilo, bashī batambule milayilo, anka babeyimwena na kwiyimuna kula, abesokwele’shi: Twi benyi, na balukilo hano ha nsenga.

¹⁴Mwanda’bo abākulā biabia abahatula hatoka’shi: Atukimbi nsenga y’atwe bana bene.

¹⁵Na binyibinyi, su abādi abatentekesha a’yā (nsenga) yiabakatukile, hangi abadi akumona mwa kwalukila (kwanka.)

¹⁶Anka binobino abelombā kwi yiyifinyine buwa, kuhatula’shi, nyi ngiā’mwa mwiilu; binyibiabia Efile Mukulu te na būfu kutemunwa bu Efile Mukulu abo; mwanda e babalumbulwidile kibalo.

¹⁷Ha lukuluhilo, Abalahama habatompelwe, balambwile Isaka, biabia e winyi batambwile milayilo, balambwile Mwan’e eleka.

¹⁸Mwinyi mwadi e ubākwilwe’shi: Mu Isaka twikulu tu’obe atukaudikwa.

¹⁹Bashingulwile’shi, Efile Mukulu euku kumusangula, sunga nku bafwe; kwinyi’ko namu bamutambwile mu kihwandjikisho.

²⁰Ha lukuluhilo Isaka bahele Yakoba na Esau mwabi ha mwanda wa myanda ayikamweka ku meso.

²¹Ha lukuluhilo Yakoba, habadi tāfu, bahēle bana babidi ba Yosefe mwabi; balangwidile Efile Mukulu mubandamine hanundu ha mukombo w’e.

²²Ha lukuluhilo Yosefe habadi tāfu, batemukile mwanda wa kukatuka kwa Bena Isalele; bakamikile ha mwanda wa mifufwa y’e.

²³Ha lukuluhilo, Mosesa, habatandjilwe, bafīlwe kwi babamutandjile mieshi yisatu, mwanda abamumwene bu mwana mulumbulukye; tambatshīne kishila kia nfumu moo.

²⁴Ha lukuluhilo, Mosesa habakule, bahele kwitanyinwa bu mwan’a Halo mukashi;

²⁵Basangwile kufwambuka mu bishiotshi na bantu b’Efile Mukulu, he kwikala na kusehela kwa mu bia milwisho ha kihindji kihela;

²⁶Bahwandjikishe’shi: misābulo ha mwa nda wa Kidisitu ngikile buheta bwa bineme bia mu Ndjihitu bukata, mwanda e badi atengyela kuhebwa bwedi.

²⁷Ha lukuluhilo nyi habakatukile mu Ndjihitu kushī kutshina bukyelo bwa nfumu bwinyi, mwanda bañyinamene bia kumona winyi shyamwekā.

²⁸Ha lukuluhilo nyi habakitshine kia Paque, na kumamina enyi mase, tala winyi mwihanyi a bana ba-kwibedi ebakuma.

²⁹Ha lukuluhilo ababukile kishiba kimonga hashi haume; nyi habasomokyele Bena Ndjihitu, batukile boso ’mema.

³⁰Ha lukuluhilo mbumbo ya Yeleko yibabumbukile, hayibefunyinwe mafuku musambobidi.

³¹Ha lukuluhilo nyi hashī halwikye Lahaba na benyi bashī badi bakokyele, mwanda e batambwile benyi bampūha na muloo.

³²A kiañakula dimonyi nkinyi? kihindji kibadia ku kutshikwa kia kulungula kia kukuma Ngideone, na Balaka, na Samesone, na Ndjeheta na Dafida, na Samwele, na batemuki;

³³abo benyi ha lukuluhilo abatshimwine mafumu, abakitshine bia kululama, abatambwile milayilo, abamumishe makanwa a ntambwe,

³⁴abashimine bukome bwa kālo, abahandjile ku mashi a mpete ya ngoshi, mu kubofula kwa mbidi abālulukile tabadi bukome; abanyishwe na ntshitshiba mu ngoshi, ababingile bibumba bia bēnyi babalwanga n’abo.

³⁵Bana bakashi (namu) abatambwile bafwe babo ha kusanguka dimonyi ku muwa; bangi namu abanyengeshibwanga malwa akata, kushī kutambula kuhashībwa; mwabadia kutambwila lusangukilo lufinyine buwa.

³⁶Bangi’nyi namu abatompibwa na kudidikwa kwa (kifita) na bikuhilwa, ee, dimonyi na kwibānya na kwelwa mu nkano.

³⁷Abāshilwe mabwe, ababalwilwe mpese, abatompelwe, abayihailwe na luhete lwa ngoshi; abakindakene bafwale misokya ya mikoko na ya mbushi; abalobele bi moo, abamwene bishiotshi na kumweshibwa malwa;

³⁸(bahanohansenga; tabahwandjikile n’abo); abakindakene mu tubāka, na (mu) mangulu, na mu mena a mbwebwe na mu twina twefile bia hano ha nsenga.

³⁹Na bano boso, abatemunwanga bibuwa ha lukuluhilo, tambatambule mulayilo, ooo,

⁴⁰(mwanda) Efile Mukulu betushingulwidile kintu kibuwa bufinyine’shi; abo, tabakalombashwa bisumanga atwe.