Read songe Bena Bahebelu 12 Bible Online

Bena Bahebelu 12 - songe bible

Bena Bahebelu 12

¹Binyibiabia atwe namu twibafunyishibwe na kibumbu kia tumonyi, tufule bibushito bioso na mulwisho winyi awitubembelā, tukame lubilo na kunyiñamana mu kwinyi kwishiena kwi ku mpala kwetu,

²twikyebulei kwi Yesu, kimankinda na mukumbashi a lukumino, winyi e ha mwanda wa kusehela kubatudilwe ku mpala kwe, bañyinamene (ku) nkulusu, basabulwile būfu, tadi mushale ku mboko yibalume ya luhun’a nsulu lw’Efile Mukulu.

³Mwanda nuhangidishe biya yawa muñyinamene mifutulo yi biabia kwi baiwishi, tala nwakakoka na kwikala bash’ehungi mu mashimb’enu.

⁴Tanwi babande kwikingila mpaa na ku mase, ha kulwa na milwisho.

⁵Nubailwa elango adiakulā kwanudi bu kwi bana’shi: Mwan’ande tosabulanga kuhasha kwa Y’ehowa, ooo, sunga nkwehūngi hosashilwa n’e;

⁶Mwanda yawa mufudibwe kifulo na Yehowa, e ahashā, akuhilā ese mwana ātambula.

⁷Su anunyiñamana mu kuhashwa, (biabia) Efile Mukulu enukitshina bu kwi bana; mwanda, a mwana kinyi shyahashwa na nshye?

⁸Anka su tanuhashibwā, n’ako kwinyi kwibungile boso, biabia nwi bana ba makuhi, tanwi bana (binyibinyi) ooo.

⁹Dimonyi, tubadi na bayaiya ba ku mbidi abetuhashīshe, kwibanemeka tubebanemekyele, anka kwi Yaiya a bikudi a na minyi, tatukakidi kumukokyela na kumona muwa?

¹⁰Mwanda’bo binyibinyi abetuhashīshe mafuku ahela mwiyile mwabahwandjikishe’ mbilombane; anka yawa ha mwanda wa kumwena (kwetu) mwatudia kwikala bebungile ku kuhatulwa-kwa-kishila kwe.

¹¹Anka kuhashwa kwa ha kinyi kihindji takumwekwa bu kwa muloo, ooo, nyi nkwa kufitshish’eshimba; anka kumongo akuheya bikuba bia kufukama, bilulame bi’eshimba kwi’bo bamweshibwe n’ako.

¹²Binyibiabia olai maboko akokye, na manwi abofule;

¹³tēmeshai mashinda a kwenda ngwa yenu, tala’shi alwa alusumpikita lwakehenga kungi; anka lwikale luhwibwe.

¹⁴Londai bia kufukama na boso, na kuhatulwa kwa-kishila, bisumanga’bio takwi sunga ngumune akamono Nfumwetu.

¹⁵Nutale kalolo kuhela muntu akalobela ku bu-muntu bw’Efile Mukulu, tala kibangilo kia lwima kiakebwā kwinukalakasha, biabia bebungi bakashūlwa kishila ha lwinyi’lo.

¹⁶Tala kwakekala sha lusandji, su sha kufutula bu Esau, winyi e ha mwanda wa kiseso kia mwita, bahēne buhyanyi bwe.

¹⁷Mwanda nwibeukye bu habadia ku hyana winyi mwabi ku mongo, badi mutunyibwe; mwanda tamumone’nyi bia kwilanga, sunga bebikokolwele na mpolo.

¹⁸Mwanda’nwe tanwibafikye ku (yawa) ngulu, akukumibwa, yibatembele kālo, ooo, sunganku kufitana mufito, sunga nku kihahi kimoo,

¹⁹sunga kwīyi dia mpungi, sunga nkwīyi dia bishima; biabihushishe’bo tabasendela’shi: tatwakwilwanyi dimo mwanda, ayoyo.

²⁰(Mwanda abakutshilwe kunyiñamena akia kibakamikilwe’shi, sunga nyama bakumu ngulu akāshibwe mabwe.

²¹Mwanda kinyi kimonwa kibadi kia malwa e moo, Mosesa bambile’shi: Ami nakishakisha na moo na kusūsa.)

²²Anka’nwe nubafiki ku ngulu ya Siona, ku kibalo ki’Efile Mukulu a muwa, ta Yelusalema a mwiilu, na ku bibumbu na bibumbu bia bamwikeilu,

²³ku kikumbeno kia kikoñeno ki Efile kia bana babedi, babafundjilwe mwiilu, kwi Efile Mukulu nsushi a boso, na kw’i bikudi bia balulame bibakumbeshwe;

²⁴na kwi Yesu musengi a kilombeno kihya, na ku mase a bamaminwe, aesambā bintu bifinyine buwa na ku ā Abele.

²⁵Talai tanulelanga yawa akulā, mwanda su baba abatune yawa bakwile ha nsenga, tambahande, kukilakila biabia n’atwe namu mpamune, su atufutala yawa etudimuna a kwiilu.

²⁶Eyi dia kiakia kihindji dibatenkakeshe nsenga: anka binobino balayile’shi: Ungi mususa nankatenkakasha tañanka nsenga, ooo, anka n’eilu namu;

²⁷na bino bishima: Ungi mususa, abifunkila kukashibwa kwa’bia bintu bibatenkakeshwe bu ku bintu bibahangilwe’shi, abia bintu bishībitenkakashwe bikale kwanka.

²⁸Binyibiabia atwe hakutambula bufumu bushyabuuku kutenkakana, twikale na bu-muntu, mu bwinyi’bo, nyi mwatufubil’Efile Mukulu ya kusangash’eshimba na kinemo, na mutshinyīsha kw’Efile.

²⁹Mwanda Efile Mukulu etu, e nyi nkālo akatatshishā.