Read songe Bena Bahebelu 5 Bible Online

Bena Bahebelu 5 - songe bible

Bena Bahebelu 5

¹Mwanda ese tshiite-mwakwidi mukata tahatwilwe munkatshi mwa bantu, ’musangwilwe ha mwanda wa bantu, mu bintu bia kw’Efile Mukulu’shi, alambule milambu na bitahilo ha mwanda wa milwisho,

²euku kwikala na kasendeleshi kwi ba bashī na kalolo n’abēhengy’eshinda; mwanda e na mwinyi namu ’mufunyishwe na butūba.

³Nyi haudi uhwandjikile’shi anka mwalambwila ya bantu, e namu elambwile y’e.

⁴Takwi muntu eatshila (kino) kinemo kwi na mwinyi, ooo, anka e mwitanyinwe n’Efile Mukulu, hamune Alona.

⁵Na Kidisitu namu tamwitumbishe na mwinyi kwikala bu tshiite-mwakwidi-mukata, ooo, anka yawa bamulungwile’shi: Obe we mwan’ande mulume, lelo uno nakutanda.

⁶Mulombene mubākwilwe hangi’shi: Obe we tshiite-mwakwidi a kwikala-ika mwiyile mulongo wa Meletshisedeka.

⁷E, mu mafuku e a ku mbidi habatekyele nteko na miyayo hamune na kudila kukata na mpolo, kwi yawa beukile kumuhasha ku lufu, e namu bahushishwe ha mwanda wa kutshina kwe kw’Efile:

⁸sunga badi mwana bāmbwile lukokyelo ku myanda yibafwambukile n’ayo,

⁹na hakukumbashwa, bālulukile ta mubangi a kihandjilo kia ikala-ika kwi’ba boso abamukokyela,

¹⁰baitaminwe n’Elile Mukulu bu tshiite-mwakwidi-mukata mwiyile mulongo wa Meletshisedeka,

¹¹ha kumukuma twi na myanda yibungi kwisamba, na yi bukoho kuhatulwa, biosobi nwibalulukye bu basha kitwi.

¹²Mwanda mbinyibinyi anka hano nyi hakibenulombena kwikala balambukishi, nyi na lukalo lwa (muntu) kwinulambukisha dimonyi, yaya ngia kwibedi ya miakwilo y’Efile Mukulu; anka nubāluluka bu ba be na lukalo lwa mabele, bashī ba bidibwa bi bukoho, ooo,

¹³Mwanda ese adishwa na mabele e te na kalolo mu Mwanda wa kululama, mwanda, e nyi mwana mukinga.

¹⁴Anka bidibwa bibukoho mbia ba batabahwile kukula, nyi nkwi’ba ha mwanda wa kuubila, be na bihushisho biabo binyishwe bia kushingula bibuwa na bibubi.