Read songe Bena Bahebelu 8 Bible Online

Bena Bahebelu 8 - songe bible

Bena Bahebelu 8

¹Biabia kihatulwilo kiatubākwile (kino nyi) kikumbesho; Atwe twi na tshiite-mwakwidi-mukata e biabia, tahwile kushala ku mboko yibalume ya luhun’a-nsulu lwa winyi mukilekile kinemo e mwiilu;

²mufubi e Efile a bintu bihatulwebikishila, n’a kibombelelo ki’Efile kia binyibinyi, kibaibakile Efile Mukulu, tambantu’bo, ooo.

³Mwanda batshiite-ba-kwidi-bakata boso mbasangwilwe kulambula milambu na bitahilo; biabia uno namu wadi na’o ngwa kwikala na bia kulambula.

⁴Mwanda su badi hano hansenga, (biabia) tabadia kwikala tshiite-mwakwidi sunga mpahelehela, mwanda bangi batshiite-bakwidi be kwanka abalambulā milambu mwiyile mukanda-wa-bishila:

⁵abafubila kihwandjikisho na mwesheshe wa bintu bia mwiilu, mubalangilwe Mosesa kw’Efile Mukulu, habadi tadi akyebe kukita kibombelelo ki’Efile; mwanda bakwile’shi: Tala biokitshi bintu bioso mwiyile kihwandjikisho kibakuleshwe mu ngulu.

⁶Anka binobino batambwile bufubi bw’Efile bukilekile buwa, ha mwanda w’e namu nyi musengi a kilombeno kikilekile kulumbuluka, yishidikwe ku milayilo yikilekile buwa.

⁷Mwanda su kinyi kilombeno kia kwibedi kibadi kishī kitohekwe, (biabia) tahabadi akukyebwa kia kabidi, ooo,.

⁸Anka ha kumona ya kutohekwa kwabadi, Yehowa bakwile’shi: Talai, mafuku anakafikye hankakumbasha kilombeno kihya na ba ku nshibo ya Bena Isalele, na ba ku nshibo ya Yuda:

⁹kushī mwiyile kilombeno kinalombene na bashabo-kulu mu di’efuku dinebakwete ku mboko, nebakunkusha kutuka n’abo mu nsenga ya Ndjihitu; mwanda tambayididile na kilombeno kiande, ami namu nebatondele; nyi mubākwidile Yehowa.

¹⁰Mwanda kino nyi nkilombeno kiankalombana na ba ku nshibo ya Isalele ha kukila aa mafuku; nyi mubākwidile Yehowa: Nankatulu bishila biande mu binangu biabo, na kwibifunda mu mashimb’abo; n’ami nankebekēla bw’Efile Mukulu abo, abo namu banakekale kwandji bu bantu bande.

¹¹Tabakelambukishena muntu na mwikashi n’e, n’ese muntu mukwabo’shi: Nwiukye Yehowa, ooo; mwanda boso abakañuku, kubangila kwi bakilekile buhela mpaa na kwi bakilekile bukata.

¹²Mwanda nankekala na lusa ku kushikululama kwabo, na milwisho, na kushula kwabo kwa bishila tankebinangushena dimonyi, ooo.

¹³Hakwakula’shi: Kilombeno kihya, nyi habālulwile kia kwibedi, tankikulu. Bino akiendā’ kikulanga na kununu’ha, takidi ha kushimina.