Read songe Yakoba 1 Bible Online

Yakoba 1 - songe bible

Yakoba 1

¹Yakoba mpika ’Efile Mukulu n’a Nfumwetu Yesu Kidisitu ku bisaka ekumi na bibidi bibahalakene ku mpese yoso, nenwimunai.

²Bakwetu, nwiyihwandjikishe ya kusehela hanuhonā mu ya mitompo ya bihaso na bihaso,

³hakwi-uka’shi, kutompibwa kwa lukumino lwenu akufisha mufwaka.

⁴Anka mufwaka ukite mufubo wa’o ukumbane’shi, nwikale bakumbane na balumbuedidīle, bashī balobeshe kintu.

⁵Anka su kwi umune ’ēnu mulobeshe binangu, atekye Efile Mukulu nyi aheyā boso na mpango, tekusulā, ooo, n’akio akikamuhebwa.

⁶Anka atekye na lukuluhilo, lushī na mialasheno. Mwanda yawa e na mialasheno, e bu ntanki ya mema a kalunga ayitakulwa na luhahi na kuhalakashwa.

⁷Mwanda yawa muntu tatentekyeshanga’shi: Nankatambula kintu kwi Nfumwetu, ooo.

⁸Muntu e mashintba abidi e muteakane mu nyikashi ye yoso.

⁹Mukwenu shī na kinemo, etumbishe hakunemekwa,

¹⁰anka mpeta etumbishe hakuheleshwa, mwanda e akashimina bu tulongo twa mu lubishi.

¹¹Mwanda nguba bakāmine na kibobo kie akishikā, kibaumishe lubishi, na tulongo twa’lo tubafumbile, na kushālama kwa’to kubalwikile: anka biabia na mpeta namu, akashimina mu nyikashi ye.

¹²Mwabi kwi (yawa) muntu anyiñamana mu kutompibwa, mwanda e hakushisha mwanka anakatambule kilongo kia bushindanyi kia muwa, kibalayile Nfumwetu kwi’ba abamufulā kifulo.

¹³Muntu hakutompibwa, takumanga kwakula’shi: Nyi mutompibwe n’Efile Mukulu, ooo; mwanda Efile Mukulu teuku kutompibwa na bubi, n’e namu tutompa muntu, ayoyo,

¹⁴anka muntu ese e mutompibwe hakukakibwa na bia ngabiabi yi’e namwinyi nakubembibwa.

¹⁵Henyihaha habahwile kwimita ngabiabi ayitandā milwisho, na milwisho (namu) hakukumbana ayitanda lufu.

¹⁶Tanulubishibwanga bakwetu batomibwe kifulo.

¹⁷Biabuntu bioso bibuwa na biabuntu bioso bikumbane abifika mwiilu, abiyikā kwi Yaiya a matata, winyi e teuku kwaluluka, sunga mpahelahela, sunga nkwihwandjikisha kwāluluka.

¹⁸Nyi anka amukyebela eshimba die betutandjile ku Mwanda wa biabinyibinyi’shi, twikale hamune bu bikuba bibedi bia bihangibwe bie.

¹⁹Binyibiabia bakwetu batomibwe kifulo, muntu ese ekale na lubilo ha kuhusha, eshinke ha kwisamba na ha nsungu ye;

²⁰mwanda nsungu ya bantu taikita kululama kw’Efile Mukulu.

²¹Binyibiabia hakuhenga bibutete bioso na kukishakisha kwa bibubi, nutambule na luhohelo Mwanda ukunwe (munda,) winyi awiuku kuhasha bikudi bienu.

²²Anka nwikale bakitshi ba Mwanda, kushī anka (bu) bahushi, na kwibembula, ooo.

²³Mwanda su muntu (nganka) muhushi a Mwanda, shī mukitshi (ao,) e, e hamune na muntu atala mpala ye ya butandwa mu lumwene.

²⁴Mwanda ētal’e na mwinyi, akatuka, kahindji n’aka eilwa na kihaso kia mwadi mwikele.

²⁵Anka yawa ashinkika mu kishila kikumbane kia buluñantu, na kwididila (mwanka,) e, hakwikala (bu) muhushi shī na kilwa, anka (bu) mukitshi a kikitshino, uno (muntu) akedibwa mwabi na bikitshino bie.

²⁶Su kwi muntu munkatshi mwenu ahwandjikisha’shi: nyi mwina Efile, n’e takakā edimi die, anka ēdimba eshimba die, biabia bwin’Efile bwa yawa muntu mbwa bisumanga.

²⁷Bwin’Efile bwi selelee na bushī kushūlwa kishila ku mpala kw’Efile Mukulu Yaiya nyi mbuno: Kutembela bana-ba-nshiye na bakashi-ba-bafwe mu bishiotshi biabo na kwilama e na mwinyi kushī n’ebashi dia bubi dia hanohansenga.