Read songe Yakoba 3 Bible Online

Yakoba 3 - songe bible

Yakoba 3

¹Bakwetu, tanufwimishanga balambukishi bebungi, hakwika’shi, twanakatambule kimu kikila bukoho.

²Mwanda atukokola mu myanda yibungi. Su kwi muntu shyakokolā mu mwisambo, yawa nyi muntu mukumbane, euku namu kutonta mbidi (ye) yishima.

³Talangai, atutwesha bikokyesho mu makanwa a nfalasa’shi, yitukokyele; biabia atwalula mbidi yabo yishima.

⁴Talangai, masua namu sunga ngakata, na kutakulwa na mpahi yibukoho, anyengwa na kidimba kihelahela, koso akukyebe munyengi a masua kunyenga.

⁵Nyi mpamunenka n’edimi namu nyi nka ku mbidi kahela, adilungulā mu myanda yibungi. Talangai, amuhila mutamba na kudimi ka kalo kahelahela!

⁶N’edimi (namu) nyi nkālo, di bu nsenga yishima ya bubi munkatshi mwa biambidiyetu, adilwisha mbidi yishima, adiokyesha kālo moso muyile muwa, dibaoshwa kālo ku Ngehena.

⁷Mwanda bihaso bioso bia nyama, na bia tonyi, na bia bintu abilandala, na bia bintu bi mu menta a kalunga nyi mbibofushibwe, bibabofwishwe namu kwi bantu,

⁸anka edimi takwi muntu euku kwidibofusha, ooo, sunga ngumune; di bubi tandji tāle, ndjiule ndā na bulembe bwa lufu.

⁹N’adio diatutumbisha Efile Mukulu Yaiya, n’adio’nyi diatuela bantu miloa, babahangilwe bu kīfwano ki’Efile Mukulu.

¹⁰Mu kanwa mwinyi nyi amutukā bia mwabi na bia miloa. Bakwetu yino yi biabia tangilombane ooo.

¹¹A nsulo ayituka mema esasa n’ēbulo heiso dimune su?

¹²A bakwetu, mutshi wa kikuku awiuku kuha bikuba bia mpafu su? Sunga moshi wa nfinyo kuha bikuku, aaa, mpamune na nsulo ya mema tayiuku kutusha mema e mungwa n’ē mashika, ooo.

¹³A nanyi a munkatshi mwenu muhebwe kalolo na kiukilo? A leshe mu nyikashi ye yibuwa bikitshino bie mu kuhohela kwa binangu.

¹⁴Anka su nwi na mukao wibulo na mpaka mu mashimb’enu, tanwitumbishanga, na kudimba ku biabinyibinyi.

¹⁵Bino binangu tambiyikye mwiilu, ooo; nyi mbia hano hashi, bia bu mbidi, na bia mikishi.

¹⁶Mwanda he mukao na mpaka nyi he tulē na bikitshino bioso bibubi.

¹⁷Anka binangu bitukye mwiilu kia kwibedi nyi nkutoka selelee, ku mongo nkui’ukama, kasendeleshi, abibofula ha kusendelwa, mbiule na lusa na bikuba bilumbulukye, bishī na mpaka, na bunsesa.

¹⁸Binyibiabia bikuba bia kululama nyi mbikunwe mu kufukama kwi’ba abalombasha kufukama.