Read songe Yakoba 5 Bible Online

Yakoba 5 - songe bible

Yakoba 5

¹Twendei binobino anwe bampeta, dilai nankaloha mwanda wa bishiotshi bikiabifiki.

²Bulieta bwenu bubalwila, na bifwalwa bienu bibadibwa na mpesu.

³Nsahabu na nfedha yenu tayibadīlwe; na ndjamalonda y’abio ayikākula bu kamonyi kwanudi, ayikadi mbidi yenu bu kālo. Nwibebikile mono ya kinemo mu mafuku a kunfudilo.

⁴Talangai, efuto dia bafubi abaumbula mafuba enu, dinyi’dio nubedilamunwine, nwediongola, adiele musase ukata; na misase y’aba abaumbula yibafikile mu matwi a Nfumwetu a Sabaote.

⁵Nubekele na muwa wenu unemene ku biatuseho bia hano ha nsenga, na kutwelelela mu bia kwisehesha anwe bana bene, nubanunyishe mashimb’enu hamune, bu mwifuku dia kutukisha.

⁶Nubahīshishe na kwiha (winyi) mululame, n’e tamwinushikile.

⁷Biabia bakwetu nwishinkei ’mashimb’enu mpaa na lia kufika kwa Nfumwetu. Talangai, mudimi ēfuba ēshā bikuba bineme bia ha nsenga, e na lwishinko lula ha mwanda w’abio, mpaa n’ahakatambula mpeshi a kwibedi n’ā kunfudilo.

⁸Anwe namu mpamunenka eshinkei ’mashimba; kankamishai mashimb’enu: mwanda kufika kwa Nfumwetu takudi hehi.

⁹Anwe bakwetu tanwiununushenangai, tala nwakahīshibwa: talangai nsushi mwimane ha kibelo.

¹⁰Kuhwandjikisha bakwetu, talai batemuki babākwile mwishina dia Nfumwetu bu bileshesho bia kufwambuka na bia mufwaka.

¹¹Talangai, biatutemuna aba bakankamane bu ba mwabi. Nubahushishe mwanda wa kukankamana kwa Yobo mwabamwenene na mwabafwidile Yehowa’shi: Yehowa e na kanya ke moo, na kutshitshimukā’nyi.

¹²Anka hakukila yino myanda bakwetu, tanutshihanga mutshiho sunga nguhela’shi, na bi mwiilu sunga mpano ha nsenga, sunga mpa ungi mutshiho, su ngwa na minyi, su ngwa na minyi; anka eyo enu ekale’nka, eyo; ayoyo enu namu ekale’nka, ayoyo; tala nwakahona mu kitshibilo kia kimu.

¹³Kwi e amweshibwa malwa munkatshi mwenu su? (biabia) atekye. Su kwi mungi e n’eshimba disangulu kyeayimbi ñono ya milangwilo.

¹⁴Su kwi mungi ’nyi munkatshi mwenu e na busungu, (biabia) aitanyine bakulu ba kikoñeno ki’Efile; abo namu bamutekyele na kumushinga mw’imu mwishina dia Nfumwetu.

¹⁵Na luteko lwa lukuluhilo alukahasha abakumbu, na Nfumwetu akamubusha; su basole myanda ayikamulekyelwa.

¹⁶Nwisokoshenei milwisho yenu, na kwdtekyeshena’shi, nuhashibwe. Luteko lwa kukankamana alukitshishā’lwa muntu mululame alukitshi bikilekile.

¹⁷Elaidja badi muntu anka mwikele’twi mu biakusuasua, e batekyele na kunyiñamana’shi, mpeshi tanokanga, n’e namu tamunokye’e hano ha nsenga bihwa bisatu na mieshi yisamombo.

¹⁸Batekyele’nyi dimo’shi, eilu dinokye mpeshi, biabia nsenga yibahēle bikuba biayo.

¹⁹Bakwetu, su kwi umune a munkatshi mwenu aluba ku biabinyibinyi, na mungi amwalushe,

²⁰eukye’shi, yawa alusha mulwishi ha kuluba kwishinda die, akahasha muntu ku lufu, na kubwikila mituto na mituto ya milwisho.