Read songe I Petelo 3 Bible Online

I Petelo 3 - songe bible

I Petelo 3

¹Hamunenka namu, bakashi bakokyele balume babo’shi, su kwi bamo bashyabakokyela Mwanda, biabia babofushibwe kushī kwibesambila mwanda ha nyikashi ya bakashi babo.

²Mwanda abamwene nyikashi yenu yiselelee na kutshina.

³Kulenga kwena kwa ha mbidi takwikalanga kwa hasha kwa kwanya nyene, na kwa kufwala kwa tukano twa nsahabu, sunga nkwitalatala ku bifwalwa, ooo;

⁴anka kwikale kufwame kwa muntu e munda, mu biabia bishyabinyangā, bi’eshimba dia kuhohela di nyaa, binyi’bio nyi mbineme bimoo ku mpala kw’Efile Mukulu.

⁵Nyi’anka biabia ha kala, bana bakashi bahatulwe-bakishila namu abadi bakuluhile mw’Efile Mukulu, abelengele’bo bana bene, abadi bakokyele balume babo;

⁶Anka bu Sala mubakokyelele Abalahama, na kumutemuna’shi: A nfumwami; kwadi e nyi kwanudi bealule bu bana be banabakashi, hanukianukitshi bibuwa, na moo tanwi n’ao na lubasu.

⁷Anwe balume namu mpamune, nubombele n’abo mulombene kiukilo, na hutula kinemo kwi mukashi, biadi bu sha bukome buhela, na biabadi bampianyi n’enu ba bu-muntu bwa muwa’shi; nteko yenu tayibambibwa.

⁸Mwanda wa nfudilo, (nwikale) n’eshimba dimune, na kwimonena lusa, nwitomeshenei kifulo bu bana na bana, (nwikale) na kanya na mudingo.

⁹Na kushī kwalula bibubi ku bibubi, ooo, sunga mulomo ku ungi mulomo; anka nwalushei mwabi; mwanda kwi yinyī’yo nyi kwanubaitanyinwe’shi, nuhyane mwabi.

¹⁰Mwanda yawa akyebe muwa na kumona mafuku ebuwa, ashīle edimi die ku bibubi, na milomo ye kwakula bia bulamalama.

¹¹Afutale bibubi, akite bibuwa, akimbi kufukama na kulondā ’ko.

¹²Mwanda meso a Yehowa e ha balulame, na matwi e ngatee ku nteko yabo, anka mpala ya Yehowa ayituhishena n’aba abakitshi bibubi.

¹³E nanyi akenukitshina mwanda ushī buwa, su nwi belekyeshi ba yibuwa?

¹⁴Anka su anufwambuka ha mwanda wa kululama, (biabia) muloo ngwenu; tanwikalanga’nyi na moo ha kufunafuna kwabo, sunga nkukalakasha munda;

¹⁵anka Kidisitu ekale mulamunweselelee mu mashimb’enu, ta nfumwenu; nwikale bemane bukyelebukyele kwalula mwalulo kwi muntu ese enwihusha mwikele lutengyelo lwū munda mwenu, na kuhohela na moo,

¹⁶nwikale n’eshimba dia munda dibuwa’shi, mu yinyi’yo yiabenusongyela, ’shi, (mbakitshi ba bibubi), aba abenukunkila nyikashi yenu yibuwa mu Kidisitu, abakwatshishwe būfu.

¹⁷Mwanda su eshimba di’Efile Mukulu adikumina, nkikile buwa kufwambuka ha kukita bibuwa he kukita bibubi.

¹⁸Mwanda Kidisitu bafwambukile mususa umunenka ha mwanda wa milwisho, e mululame ha mwanda wa bashībalulame’shi, biadia kwitukunkusha kw’Efile Mukulu, baihailwe ku mbidi, anka basangwilwe na muwa kwi Kikudi;

¹⁹mu kinyi’ kio bayile, talungula bikudi bi mu lukano;

²⁰abio kalā bibadi bishī na kukokyela, habadi kahuñanyi k’Efile Mukulu akēsha mu maluku a Noa, habalumbulwanga bwato, bwinyi bubahandjile bahela, (kuhatula’shi nyi mbantu mwanda), abatwelwe bakumbane mu mema.

²¹Kinyi kihwandjikisho kia lubatshisho hamunemka alwituhashā (kushī kukashibwa kwa biko bia mbidi, ooo, anka nyi nkukyeba kw’eshimba dibuwa dia munda kw’Efile Mukulu) ha lusangukilo lwa Yesu Kidisitu,

²²e tabahwile kutwela mwiilu, mushale namu ku mboko yibalume y’Efile Mukulu; bamwikeilu na bamatalwa na babukome ababofwishwe kwadie.