Read songe I Petelo 5 Bible Online

I Petelo 5 - songe bible

I Petelo 5

¹Binyibiabia nalanga bakulu (ba bikoñeno bi’Efile) be munkatshi mwenu, ami mukulu n’abo, na bu kamonyi ka bia kufwambuka kwa Kidisitu, mubungilwe namu ku yinyi ntumbo yianakafumbulwe.

²Lamai lombe lw’Efile Mukulu lwi munkatshi mwenu, nuate bukulu bwa kilelo, bushī bwa kufinyikwa, ooo, anka bwa musanku, bushī mwanda wa kukimba mono yifutulukye, anka bw’eshimba dimene.

³Sunga mbu bakambi kumunana hanundu ha buhyanyi bw’Efile Mukulu, ooo, anka nwikale bihwandjikisho kwi lombe.

⁴Biabia ahakafumbulwa Mumunyi mukilekile bukata, nwanakatambule kilongo kia ntumbo kishyakikalwila.

⁵Anwe be bu bakulu bwa binyibiabia, nwibofushe anwe bana bene kwi bakulu. Ee, nwibofushene kwi muntu na muntu, nwikale bafwadikwe na kwihelesha kw’eshimba, mwanda Efile Mukulu etuhishena na basha kwinemeka, anka ahanā bu-muntu kwi bahohele.

⁶Biabia nwihoheleshei mushi mweyasa dikata di’Efile Mukulu’shi, enukamishe ha kihindji akikalombana.

⁷Nusumbule bia kwibasukila bienu hadie, mwanda e enusambā.

⁸Nuhilei, nutengyelei, mwanda mwituhishyanyi n’obe diabola, akindakana bu ntambwe kwete kukumba na kukimba adia kukokota:

⁹e winyi numushikilei anka hoo mu lukumino, ha kwiuka’shi, kwinyi kufwambuka kubamwene bakwenu be hanohansenga.

¹⁰Anka winyi Efile Mukulu sha bu-muntu boso, winyi e betwitanyine ku ntumbo ye ya ikala-ika kwi Kidisitu Yesu, hanukahu kufwambuka kihindji, enulombashe biya, na kwinukankamisha, na kwinunyisha, na kwinushadisha.

¹¹Kwadie kwikale lubikyelo lwa kwikala mpaa na ikala-ika, Amena.

¹²Kwi Shifanusa mukwetu a kishima, nyi ntentekyesha, nenufundjile bihela, kwinulungula ha bukoho na kwinulanga ’shi: Buno mbu-muntu bwa biabinyibinyi bw’Efile Mukulu bwa nwibemanyinyine.

¹³(Kikoñeno ki’Efile) ki ku (Babylone) kisangudibwe hamune n’anwe, kibenwimuna; na mwan’ande Mako namu.

¹⁴Nwīmushenei anwe bana bene na kwififyena kwa kifulo. Kufukama kwikale kwanudi’nwe boso mu Kidisitu, Amena.