Read songe Ii Petelo 1 Bible Online

Ii Petelo 1 - songe bible

Ii Petelo 1

¹Shimona Petelo mpika na bu mutumibwa a Yesu Kidisitu, kwi baba abatambwile lukumino luneme, hamune n’atwe ha kululama kw’Efile Mukulu etu na Muhashietu Yesu Kidisitu;

²Bu-muntu bufwimishibwe kwanudi, na kufukama ha kiukidilo ki’Efile Mukulu na kia Yesu Nfumwetu.

³Bu bukome bwa bwifile bwe bubetuhele bintu bioso (binemene) ku muwa na ku bwin’Efile Mukulu, ha kiukidilo kia yawa betwitanyine ku ntumbo na buwa bukalabale,

⁴nyi henyi habetuhele milayilo yeneme yikilekile bukata’shi; kwi yinyi ’yo nyi kwatudi bekele bakwibungila ku bwin’Efile, hakuhwa kuhanda ku kunyanga kwi hanohansenga, ha mwanda wa bia ngabiabi.

⁵Ha uno mwanda namu hakuhwa kusasakata, nutentekye ku lukumino lwenu bukome bw’eshimba, na ha bukome bwe’shimba kiukilo,

⁶na ha kiukilo butontshi bwa mbidi, na ha butontshi bwa mbidi mufwaka, na ha mufwaka bwin’Efile;

⁷na ha bwin’Efile kalolo ka ba mukwabo na mukwabo, na ha kalolo ka ba mukwabo na mukwabo kifulo.

⁸Mwanda su yino myanda yi mwanudi, na kufwima yifwimi, (biabia) yikenukitshine kwikala bashī na iotolo sunga mba kukutwa bikuba ku kiukidilo kia Nfumwetu Yesu Kidisitu.

⁹Anka yawa akutwa yino myanda e mpofu, e na meso e mindjua, baīlwe kusulwa kwe kwa milwisho ye ya kala.

¹⁰Binyibiabia bakwetu, nukishekishe kwilundjila kwenu’shi, lwitamino lwenu na kusangudibwa kwenu bikale binyiñamane hoo; mwanda su anukitshi yino myanda tanukakokola sunga mpa kinyi sunga mpa kinyi, ooo,

¹¹Nyi anka biabia anukahebwa kitwēlo kikilekile bukata kia mu bufumu bwa ikala-ika bwa Nfumwetu Yesu Kidisitu.

¹²Ha uno mwanda ami tankahuftanya kwinutentekyesha bukyelebukyele mu yino myanda sunga anwiyiuku, na kukankamikwa mu biabinyibinyi bia bino.

¹³Ee, natentekyesha ngulombane’shi: ha nki mu kino kibombelelo (nyi mbidi) kwinubasula hakwinunangushena:

¹⁴hakwiuka’shi, kukumba kwa kino kibombelelo kiande ku luhese takudi hehi, anka mubandesheshe Nfumwetu Yesu Kidisitu.

¹⁵Nankasasakata namu’shi, nwiukye kunangushena mafuku oso yino myanda, hatampwile kufwa.

¹⁶Mwanda’twe tatubalondanga miele yibakitshinwe na bulamalama hatubenuukishe bukome na hakufika kwa Nfumwetu Yesu Kidisitu, anka tubadi tumonyi twa bukata bwe bukalabale.

¹⁷Mwanda bahahwile kutambula kw’Efile Mukulu Yaiya kinemo na ntumbo, hakubatukile eyi di bino kwadie, ku ntumbo yikilekile buwa’shi: Uno’u nyi Mwan’ande mutomibwe kifulo, andji mutokyele bibuwa mwishimba.

¹⁸Dino eyi namu dibatukile mwiilu, tubedihushishe hatubadi n’e mu yinyi ngulu yiliatulwe-yi-kishila.

¹⁹Twi na Mwanda utemukwe ukambe kukankamikwa hoo, nyi kwaudi’o nukite bibuwa biakwiudimuka, hamune buitala adimunyika hantu he mufito, mpaa nāhamweka lutokyela, mpaa nāhakatunduka lwenyenye lwa munkyelo mu mashimb’enu,

²⁰hakwiuka kino kia kwibedi’shi, takwi lutemuko lwa Bifundwe-bi’Efile alwihatulwila lu na mwinyi.

²¹Mwanda lutemuko talubafikile su mpa kihindji kinyi su mpa kihindji kinyi bu mubakyebel’eshimba dia muntu, ooo, anka bantu bahatulwe-be-kishila b’Efile Mukulu abākwile mwabatwadilwe na Kikudi-E-Selelee.