Read songe I Yoano 4 Bible Online

I Yoano 4 - songe bible

I Yoano 4

¹Anwe batomibwe kifulo, tanukuminanga bikudi bioso, anka tompai bikudi su mbia kw’Efile Mukulu; mwanda batemuki ba madimi bebungi mbahalakane hanohansenga.

²Nyi ha uno mwanda anwiuku Kikudi-E-Selelee e Efile Mukulu’shi: Kikudi kioso akikumina’shi: Yesu Kidisitu bafikile mu mbidi nkia kw’Efile Mukulu

³Na kikudi kioso kishyakikumina, (’shi) Yesu Kidisitu mufikye mu mbidi, ta nki ’Efile Mukulu; kino nyi nkia kituhishena na Kidisitu, kianubahushishe’shi, akikafiki; na binobino ki hanohansenga.

⁴Anwe nwi b’Efile Mukulu, bakinga batomibwe kifulo, nubebikambile, mwanda yawa e munda mwenu ’mukile e hanohansenga bukata.

⁵Abo mbahanohansenga, biabia abakulā bia hanohansenga, na bahanohansenga abebahushishā.

⁶Atwe twi b’Efile Mukulu; yawa euku Efile Mukulu etuhushishā; yawa shya kw’Efile Mukulu tetuhushishā, ooo. Nyi ha uno mwanda atushingula kikudi kia biabinyibinyi, na kikudi kia kuluba.

⁷A bakuminyibwe, twifulenei kifulo; mwanda kifulo nki’Efile Mukulu; n’ese muntu afulā kifulo nyi mu tandjibwe n’Efile Mukulu, e namu euku Efile Mukulu.

⁸Yawa shyafulā kifulo teuku Efile Mukulu; mwanda Efile Mukulu nyi nkifulo.

⁹Mu uno nyi mubamwekyele kifulo ki’Efile Mukulu kwatudi’twe, mwanda’shi, Efile Mukulu batumine Mwan’e eleka mutandwe hanohansenga, mwatudia kwikala na muwa hadie.

¹⁰Nyi muno mwikele kifulo, kushī kwamba’shi, tubadi n’Efile Mukulu kifulo, ooo, ank’e betufūle kifulo, batumine Mwan’e (kwikala bu kilombeno kia milwisho yetu.)

¹¹A batomibwe kifulo, su Efile Mukulu betufūle kifulo bino, atwe namu watudi n’ao ngwa kwifulena kifulo.

¹²Takwi muntu, sunga ngumune bamwene Efile Mukulu sunga mpa kihindji kinyi, ooo. Su atwifulena kifulo, (biabia) Efile Mukulu ’mwikadidile munda mwetu, na kifulo kie nkikumbashwe munda mwetu.

¹³Nyi ha uno mwanda atwiuku’shi, twibekadidile mwadie, n’e (namu) munda mwetu, mwanda wa Kikudi-E-Selelelee abetuhele.

¹⁴N’atwe tubahu kumona, na kwakula bu kamonyi’shi, Yaiya batumine winyi Mwana kwikala Muhashi a bahanohansenga.

¹⁵Ese muntu akakumina’shi, Yesu nyi Mwan’Efile Mukulu. Efile Mukulu ekadidile munda mwe, n’e namu mw’Efile Mukulu.

¹⁶Atwe namu, tubahu kwiuka na kuhwa kukumina kinyi kifulo ki n’akio n’etu Efile Mukulu munda. Efile Mukulu nyi nkifulo ank’akio; na yawa ekadidilā mu kifulo mwikadidile mw’Efile Mukulu, n’Efile Mukulu mwadie.

¹⁷Muno nyi mubakumbeshwa kifulo kietu’shi, twikale na kukankamana mwifuku dia kimu; mwanda mwadi mwikele, anka biabia n’atwe namu hanohansenga.

¹⁸Takwi moo mu kifulo, ooo, mwanda kifulo kikumbane akibingi moo; mwanda moo wi na malwa. Yawa atshinyi moo, tamukumbane mu kifulo, ooo.

¹⁹Twi n’e kifulo, mwand’e babadidile n’etu kifulo.

²⁰Su muntu amba’shi: Nyi n’Efile Mukulu kifulo, a kunyi ashikwa mukwabo, (biabia) e nsha madimi: mwanda yawa shi na kifulo na mukwabo abamwene, akafula Efile Mukulu kifulo na minyi ashī mumone?

²¹Na uno mulangilo twi n’ao kwadī’shi: Yawa afulā Efile Mukulu kifulo ekale na mukwabo kifulo, namu.