Read songe Kibafumulwe 1 Bible Online

Kibafumulwe 1 - songe bible

Kibafumulwe 1

¹Kibafumbulwe kia Yesu Kidisitu, kibamuhele Efile Mukulu kulesha kwi bahika be myanda yitayikyebe kumweka; bekitumine, bekiukishe na mwikeilu e kwi mpik’e Yoano.

²E batemukile bu kamonyi ka Mwanda w’Efile Mukulu, na ka bulungudi bwa Yesu Kidisitu, na ka bintu bioso bibamwene.

³Mwabi kwi yawa abala, na kwi’bo abahusha myanda ya (uno) mutemu, na kulama yaya myanda yifundjibwe mwanka; mwanda kihindji takidi hehi.

⁴Yoano ku bikoñeno bi’Efile musambobidi bi mu (Asia). Bu-muntu na kufukama (bikale) kwanudi, abifu kwi yawa e kwanka binobino, badi kwanka kala, e nyi akafiki, na kwi Bikudi musambobidi bi ku mpala kwa luhun’a nsulu lwe;

⁵na kwi Yesu Kidisitu, kamonyi ka kishima, mwan’a mbedi musangukye ku bafwe, mutontshi a banfumu ba hanohansenga. Kwi yawa betufule kifulo, na kwitusula ku milwisho yetu mu mase e;

⁶e namu betwalulwile tatudi banfumu na batshiite-bakwidi ba kw’Efile Mukulu Nshye; kwadie kwikale ntumbo na bukome mpaa na kwikala-ika. Amena.

⁷Talangai, ngiwafiki mu makumbi; meso oso akamumono, na benyi abamutahile; bisaka bioso bia hanohansenga abikadidi kitumu ha mwanda we. Ee, anka biabia Amena.

⁸Yehowa akula’shi: Ami nyi Alefa na Omega, mbangilo na nfudilo, e kwanka binobino, badi kwanka kala, e nyi akafiki, Shabukomeboso.

⁹Ami Yoano, mukwenu, mubungilwe n’enu mu bishiotshi, na mu bufumu na mu kukankamana kwa Yesu Kidisitu, nadi mu kila akitemuna bu Patamosa ha mwanda wa Mwanda w’Efile Mukulu na ha bulungudi bwa Yesu.

¹⁰Nadi mwalulwe mu Kikudi-E-Selelee h’efuku dia Nfumwetu, nahushishe eyi dikata bu dia mpungi ku mongo kwande,

¹¹adiamba’shi: Biomono, ofunde ha mukanda wa kutuma ku bikoñeno bi’Efile musambobidi bi mu (Asie) kia ku Efesesa, na kia ku Semema, na kia ku Pegamosa, na kia ku Tyatshila, na kia ku Sadise, na kia ku Filadelefia, na kia ku Laodesea.

¹²Biabia nealulwile mwanda wa kumona muntu sh’eyi adisamba n’ami; biabia hakwialula namwena bitulo-bia-matala bia nsahabu musambobidi;

¹³na munkatshi mwa bitulo-bia-matala, (mubadi muntu), wifwane Mwan’a Muntu, mufwale kilamba kifikye mpaa na ku ngwa, na kikoka kia nsahabu kifwale ha kiadikie.

¹⁴Mutwe we na nyene (bibadi) bitoka bu bufufulu bwa mikoko na bu (neige), na meso e (abadi) bwidimi dia kālo.

¹⁵Ngwa ye namu (yibadi) yifwane kilonda kia munyinga kikusulwe, ki hyuu bu ki mu nkyela: n’eyi die dibadi bu kitumo kia mbila ya mema ebungi.

¹⁶Mwiyasa die dibalume mubadi nyenyenyi musambobidi; mukanwa mwe amutuku luhete lwa ngoshi lwi mashi kubidi, na lukyebo lwe lubadi bu nguba atembe bi bukoho.

¹⁷Biabia hanamumwene, nahone ku ngwa ye bu mufwe. Henyihaha bantentekyele eyasa die dibalume’shi: Totshinanga moo; ami nyi akwibedi, n’a nfudilo:

¹⁸Nyi yawa atala, nadi mufwe; na talanga, tandji na muwa wa ikala-ika, Amena. Nyi na nfungulo ya kalunganyembo na ya lufu.

¹⁹Ofunde bintu bibomono, na bintu bi kwanka (binobino) na bintu abilondo bino.

²⁰Kifībwe kia nyenyenyi musambobidi yibomono heyasa diande dibalume, na bitulo-bia-matala musambobidi bia nsahabu. Yinyi nyenyenyi musambobidi nyi bamwikeilu ba bikoñeno bi’Efile musambobidi; na binyi bitulo-biamatala musambobidi bibomono nyi bikoñeno bi’Efile bi musambobidi.