Read songe Kibafumulwe 10 Bible Online

Kibafumulwe 10 - songe bible

Kibafumulwe 10

¹Namwene namu mungi mwikeilu a bukome ayiki mwiilu, mufwadikwe n’ekumbi; nkongolo namu badi ha mutwe, na mpala ye yibadi bu nguba, na ngwā bu manūmbo a kālo.

²Mwiyasa die mubadi kakanda kabūle, bāshine lwā lwe lubalume ha mem’a-kalunga, na lwā lwe lubakashi ha nsenga;

³belele musase n’eyi dikata, bu ntambwe akumbā; na habēle musase, mikungulu ya mpeshi musambobidi yibele mayi ayo.

⁴Habēle mikungulu ya mpeshi musambobidi mayi ayo, nadi tanakyebe kufunda; nahushishe eyi adituku mwiilu’shi: Lamika yayo myanda yibākwile mikungulu musambobidi, tweyifundanga.

⁵Biabia mwikeilu anamwene mwimane ha mem’a-kalunga, na ha nsenga, bemikile mboko ye yibalume kwiilu,

⁶batshihile mutshiho kwi’wa atala mpaa na kwikala-ika, bahangile eilu na bintu bi mwanka, na nsenga, na bintu bi mwanka, na mem’a-kalunga, na bintu bi mwanka’shi, tahakikwishyanyiho:

⁷anka mu mafuku a eyi dia mwikeilu a musambobidi, hakabanga kōmba, nyi ahakahwibwa kifībwe ki’Efile Mukulu, anka mubakudile kwi bahika be batemuki.

⁸N’eyi dinahushishe kwiilu dibandungwile dimonyi’shi: Nd’okate kakanda kabūle ke mwiyasa dia mwikeilu mwimane ha mem’a-kalunga na ha nsenga.

⁹Biabia nayile kwi mwikeilu, namwamba’shi: Mpe kaka kakanda. E bandungwile’shi: Ekāte, wekādye koso; akakāluluka būlo munda mobe, anka mu kanwa mobe akakekala nsasa bu būki.

¹⁰Biabia nātshile kakanda kwiyasa dia mwikeilu, nekadya, kabadi mu kanwa mwande nsasa bu būki; anka hakuhwa kwikadya, mwifu diande dibekele būlo.

¹¹Henyihaha bambile’shi: Odi n’ao ngwa kutemuka dimo ku mpala kwa bantu bebungi, na mīio, na ku ba ndjimi, na kwi banfumu.