Read songe Kibafumulwe 12 Bible Online

Kibafumulwe 12 - songe bible

Kibafumulwe 12

¹Binyibiabia kitundwilo kikata kibamwekyele mwiilu; mwana-mukashi mufwadikwe nguba, na mweshi mushi mwa ngwa ye, na ha mutwe we habadi kilonga kia nyenyenyi ekumi na yibidi.

²Badi mwimite mwana, tabadi adidi mwanda badi kwete kusumwa na munda, badi akumbu mitanyo ya hakutanda.

³Na kingi kitundwilo kibamwekyele mwiilu; talangai, kinyoka kikata kimonga hyū, kibadi na mitwe musambobidi na nsengwa ekumi; bilongo musambobidi namu bibadi ha mitwe y’e.

⁴Mukila we ubakakile kihindji kia kasatu kia nyenyenyi ya mwiilu, beyiele ha nsenga; biabia kinyoka bemene ku mpala kwa mwana-mukashi badi takyebe kutanda, mwanda wa kudia mwana ha kutandwa.

⁵N’e batandjile mwana, mwana-mulume, winyi anakabikale ku milo yoso n’elanga dia kilonda; na mwan’e bebosheshwe kw’Efile Mukulu, na ku luhun’a nsulu lwe.

⁶Biabia mwana-mukashi basukile mu kabāka, ku mbalo yimulumbulwile Efile Mukulu ’shi, bamudishe mwanka ha mafuku kinunu na nkama yibidi na makumi asamombo.

⁷Kubadi ngoshi mwiilu, Mikaele na bamwikeilu be babaluanga ngoshi na kinyoka; kinyoka namu badi ku ngoshi na bamwikeilu be;

⁸anka’bo tambebakambile, ooo, na mbalo yabo tangisananwe dimonyi mwiilu.

⁹Henyihaha kinyoka kikata basumbwilwe hashi, yawa nyoka a kala, batemwinwe bu Kafilefile, na bu Satana, winyi mōngodi a bahanohansenga boso; basumbwilwe hashi ha nsenga, bamwikeilu be namu abasumbwilwe n’e.

¹⁰Henyihaha nahushishe eyi dikata mwiilu, adiamba’shi: Binobino kihandjilo, na bukome, na bufumu bw’Efile Mukulu etu, na matalwa a Kidisitu e bibafiki, mwanda winyi mwimukishi a bakwetu, ’musumbulwe hashi, badi ebemukisha ku mpala kw’Efile Mukulu kanya na bufuku.

¹¹N’abo abamukambile na mase a Mwan’a-Mukoko, na ha mwanda wa bulungudi bwabo bw’Efile; abo tababadi na miuwa yabo kifulo, mpaa na ku lufu, ooo.

¹²Binyibiabia sehelai anwe mailu, n’anwe babombele mwanka. Mpombo kwi babombedi ba ha nsenga na ba ha mem’akalunga! mwanda kafilefile bayiki kwanudi, e na nsungu yikata, mwanda euku’shi: kihindji kiande nkihela.

¹³Biabia kinyoka habamwene’shi: Nasumbulwa hashi, babingabinga mwana-mukashi batandjile (mwana) mulume.

¹⁴Na mbaba yibidi ya mpungwe yikata yibahelwe mwanamukashi’shi, ahahule mu kabāka, mpaa na mu mbalo ye, kubadi adishwa ku kihindji, na ku bihindji, na ku kihindji kia kihindji, (kukatuka) ku mpala kwa nyoka.

¹⁵Biabia nyoka bafidile mema mu kanwa mwe ku londa mwana-mukashi, bu kieshi (kia mpeshi) mwadia kumushimisha ku kieshi.

¹⁶Na nsenga yibakwashishe mwana mukashi, yibabulwile mu kanwa mwa’yo, yiamina kinyi kieshi kibafīle kinyoka mu kanwa mwe.

¹⁷Biabia kinyoka badi na nsungu na mwana-mukashi, bayile kulwa ngoshi na bashale ku lubio lwe, benyi abalama milangilo y’Et’ile Mukulu, n’abalamata ku bulungudi bwa Yesu Kidisitu.