Read songe Kibafumulwe 13 Bible Online

Kibafumulwe 13 - songe bible

Kibafumulwe 13

¹Baimene ha misengeya ya mem’a-kalunga. Namwene nyama-e-bukyelo atunduka mu mema, badi na mitwe musambodidi na nsengwa ekumi, nahansengwa ye bilongo ekumi, na ha mitwe he mashina a kukaa Efile Mukulu.

²Na nyama-e-bukyelo anamwene mwifwane ngye, na niakasa e bu kimungu, ku kanwa kwe (kubadi) bu ku kanwa kwa ntambwe, ana kinyoka bamuhele bukome bwe, na luhun’a-nsulu lwe na matalwa akata.

³(Namwene) namu umune wa mitwe ye bu ubadi utahibwe elonda ku lufu; henyihaha elonda die dia lufu dibaumine; biabia bahanohansenga boso abakanyine ku nyama-e-bukyelo.

⁴Abalangwile kinyoka, ha mwanda bahele matalwa e kwi nyama-e-bukyelo; abalangwile nyama-e-bukyelo’shi: A nanyi mwifwane nyama-e-bukyelo? A nanyi euku kulwa n’e ngoshi?

⁵Kubamuhelwe namu ku kanwa kwa kwakula myanda yimoo na ya kukaa; kubamuhelwe namu matalwa kwikadidila mieshi makumi ananka na yibidi.

⁶Bāsamine mukanwa mwe kukaa Efile Mukulu, kukaaeshina die, na kibombelelo kie, (nyi) mbaba babombele mwiilu.

⁷Kubamuhelwe namu kulwa ngoshi na bahatuiwe-bekishila na kwibakambila: na matalwa abamuhelwe hanundu ha bisaka bioso, na bantu, na ba ndjimi na mīlo.

⁸Na boso babombele hanohansenga banakamulangwile, boso bashī na mashina’bo abafundjilwe mu mukanda wa muwa wa Mwan’a-Mukoko, mwihayibwe mpaa na ku mbangilo ya hanohansenga.

⁹Su muntu e n’ētwi, ahushe.

¹⁰Yawa akunkusha (bantu) mbuhika, akakunkushwa namu mbuhika, yawa ayihanā na luhete-lwa-ngoshi anakehayibwe na luhetelwa-ngoshi. Hano nyi mufwaka na lukuluhilo lwa bahatulwe bekishila.

¹¹Namwene namu mungi nyama-e-bukyelo kwete kutuka mu nsenga; e badi na nsengwa yibidi bu mwan’a mukoko, anka bākwile bu kinyoka.

¹²Badi afubu na matalwa oso a nyama-e-bukyelo a kwibedi ku mpala kwe. Akokyeshā nsenga n’ababombele mwanka kulangwila winyi nyama-e-bukyelo a kwibedi badi n’elonda dia lufu diume.

¹³E akitshi biakukanya bikata, mpaa na kwisha kālo mwiilu hano ha nsenga ku meso kwa bantu boso.

¹⁴Aongolā’ba babombele ha nsenga, ha mwanda wa bilengyeleshi bibamuhelwe kukita ku meso kwa nyama-e-bukyelo; ākula kwi’ba babombele ha nsenga’shi: Nafushe kihwandjikisho kia nyamae-bukyelo, winyi badi mutahibwe na luhete-lwa-ngoshi, anka bamwene muwa.

¹⁵Badi na bukome bwa kuha kinyi kihwandjikisho kia nyama-e-bukyelo muwa’shi, kihwandjikisho kia nyama-e-bukyelo kiakule, na kwikasha’shi, boso bashyabalangwila kihwandjikisho kia nyama-e-bukyelo behayibwe.

¹⁶Bekasha namu boso, bahela na bakata, bampeta na balanda, baana na bahika, kutambula kitundwilo h’eyasa diabo dibalume, su mpa mahala habo’shi:

¹⁷muntu sunga ngumune anakamone mwa kuula sunga nkuhana, anka yawa e na kitundwilo, (su) eshina dia nyama-e-bukyelo, su nkibadiko ki’eshina die.

¹⁸Hano nyi he kalolo. Yawa e na lushingulwilo, abadikye kibadiko kia nyama-e-bukyelo, mwanda’kio nyi kibadiko kia muntu; na kibadiko kie nyi nkama yisamombo na makumi asamombo na yisamombo.