Read songe Kibafumulwe 14 Bible Online

Kibafumulwe 14 - songe bible

Kibafumulwe 14

¹Namwene, aaa! Mwan’a-Mukoko badi mwimane ha ngulu ya Siona, na lukama na makumi ananka na binanka a binunu, babadi n’eshina dia Nshye difundwe ha mahala’bo.

²Nahushishe namu eyi adifu mwiilu, bu eyi dia mema ebungi, na bu eyi dia mukungulu ukata; n’eyi dinahushishe (dibadi bwiyi) dia bañomba abōmbo nsese yabo.

³Abo abayimbile bu lono luhya ku mpala kwa luhun’a nsulu, na ku mpala kwa nyama-ya-muwa yinanka na kwa bakulu; takubadi muntu sunga ngumune beukile kwambula lwalwa lono, anka baba be binunu lukama na makumi ananka na binanka babadi bakulwe ku bahanohansenga.

⁴Bano nyi mbaba tambalwishwe na bana-bakashi, mwanda’bo ntumame. Bano nyi mbaba abalondo Mwan’a-Mukoko kosokwēnde. Bano abakūlwe munkatshi mwa bantu; (nyi) mbikuba bia kwibedi bia kw’Efile Mukulu na kwi Mwan’a-Mukoko.

⁵Mukanwa mwabo tamusananwe madimi, ooo; tabe na kilema.

⁶Namwene namu mungi mwikeilu ahahula munkatshi mw’eilu, badi na mukāndu-wibuwa wa ikala-ika kulungula babombele ha nsenga, na kwi milo yoso, na hisaka bioso, na ba ndjimi yoso, na bantu boso.

⁷Bākwile n’eyi dikata’shi: Tshinai Efile Mukulu, numutumbishe, mwanda kutshiba kwe kwa kimu kubafiki, nulangwilei yawa bahangile eilu na nsenga, na mem’a kalunga, na masulo a mema.

⁸Mungi mwikeilu a kabidi balondele’shi: Muhone, muhone Babelone mukata, batomeshe mīlo yoso nfinyo ya bukyelo bwa lukyebanokyebano lwe.

⁹Mungi mwikeilu namu a kasatu bebalondele, ākula n’eyi dikata’shi: Su muntu alangwila nyama-e-bukyelo na kihwandjikisho kie, atambula namu kitundwilo ha mpala he, su h’eyasa die,

¹⁰(biabia) e namu anakatome ku nfinyo ya bukyelo bw’-Efile Mukulu, yilumbulwe yishī yisangakane mu kihulu kia nsungu ye; n’e anakamweshibwe malwa na kālo na soufre ku mpala kwa bamwikeilu bahatulwe-bekishila, na ku mpala kwa Mwan’a-Mukoko:

¹¹na mwishi wa malwa’bo wanakakamine mpaa na kwikala-ika; tabe na kikisho kanya na bufuku, abo abalangwila nyama-e-bukyelo na kihwandjikisho kie, n’aba banakatambule kitundwilo ki’eshina die.

¹²Hano nyi mufwaka wa bahatulwe-bekishila; baba balame milangilo y’Efile Mukulu na lukumino lwa Yesu.

¹³Nahushishe namu eyi adifiki mwiilu’shi: Funda’shi: Be na mwabi mbaba abafwila mwi Nfumwetu kwatshila lelo na ku mpala; ee, (nyi) bibākwile Kikudi (E-Selelee)’shi, bekishe ku mifubo, mwanda bikitshino biabo abiende n’abo.

¹⁴Biabia namwene, talangai, ekumbi ditoka, na h’ekumbi habadi hashale (umune) mwifwane Mwan’a-Muntu, badi na kilongo kia nsahabu ha mutwe he, na luhete-lubinde lwi māshi lwa kunua n’alo mwiyasa die.

¹⁵Mungi mwikeilu batukile mu ntempelo, kwete kwela musase n’eyi dikata kwi yawa mushale h’ekumbi’shi: Twesha lubinde lobe, onue; mwanda kihindji kia kunuā kibafiki; mwanda biakuūmbula bibahu kumonga.

¹⁶Biabia yawa badi mushale h’ekumbi batwesheshe luhete-lubinde hano ha nsenga, na (bia ha) nsenga bibanoībwa.

¹⁷Henyihaha mungi mwikeilu batukile mu ntempelo yi mwiilu, e namu badi na luhete-lubinde lwi māshi.

¹⁸Mungi’nyi mwikeilu batukile ku kitala kia mulambu, badi na matalwa hanundu ha kālo; bēle’yi dikata kwi yawa badi na luhete-lubinde lwi māshi’shi: Twesha luhete lobe lubinde lwi māshi, okūle bisasa bia mutshi wa nfinyo bia ha nsenga; mwanda bikuba biao bibamongo biya.

¹⁹Binyibiabia mwikeilu batwesheshe luhete lwe lubinde hano ha nsenga, takūlu mutshi wa nfinyo wa ha nsenga, bebiele mu kyengyelo kikata kia bukyelo bw’Efile Mukulu.

²⁰Na kyengyelo kibāshinwe hasha ha kibalo, na mase abatukile ku kyengyelo mpaa na kufika ku nkano ayikunkushā nfalasa, na ku kihindji bu kilometre makumi asatu na yibidi.