Read songe Kibafumulwe 15 Bible Online

Kibafumulwe 15 - songe bible

Kibafumulwe 15

¹Namwene namu kingi kitundwilo mwiilu, kikata na kiakukanya, bamwikeilu musambobidi abadi na bihuha musambobidi bia nfudilo; mwanda nyi mwanka mubakumbena bukyelo bw’Efile Mukulu.

²Namwene namu bwishiba di mbadibadi dia kelobe disangakane na kālo, n’abo abakambile nyama-e-bukyelo, na kihwandjikisho kie, na kitundwilo kie, na kibadiko ki’eshina die, bēmane h’eshiba di mbadibadi dia kelobe, abadi na nsese y’Efile Mukulu.

³N’abo abayimbi lono lwa Mosesa mufubi e Efile Mukulu, na lono lwa Mwan’a-Mukoko’shi: Bikitshino biobe mbikata na biakukanya, obe Yehowa Efile Mukulu Shabukomeboso; nyikashi yobe ngilulame na ya binyibinyi (obe) Nfumu a milo yoso.

⁴A Yehowa, a nanyi shyakakutshinyi na kutumbisha eshina diobe? mwand’ank’obe nyi muhatulwe-e-kishila; mwanda mīlo yoso yanakafike kulangwila ku mpala kobe; mwanda bikitshino biobe bilulame bibafumbwilwe.

⁵Talangai, ku nyima kwa yino myanda namwene, ntempelo ya kibombelelo ki’Efile kia bulungudi mwiilu yibadi yishitulwe;

⁶na bamwikeilu musambobidi abatukile mu ntempelo, abadi na bihuha musambobidi; abadi bafwale (bilamba) bia lin bitoka selelee, abadi na biadi biabo bianyibwe mpu ya nsahabu.

⁷Henyihaha umune a yinyi nyama ya muwa yinanka, bahele bamwikeilu musambobidi bihulu bia nsahabu musambobidi, biule bukyelo bw’Efile Mukulu atala kwikala-ika.

⁸Na ntempelo yibaule mwishi wa ku ntumbo y’Efile Mukulu, na wa ku bukome bwe; biabia muntu sunga ngumune beukile kutwela mu ntempelo, mpaa n’ahabakumbene bihuha bia bamwikeilu musambobidi.