Read songe Kibafumulwe 18 Bible Online

Kibafumulwe 18 - songe bible

Kibafumulwe 18

¹Ku nyima kwa yino myanda namwene mungi mwikeilu ayiki mwiilu, badi na matalwa akata; na nsenga yibatosheshwe na ntumbo ye.

²E belele musase n’eyi dikilekile bukata’shi: Babelone mukata bahono, bāluluka ta nkibombelelo kia biso, na bu nshibo ya lukano ya bikudi bioso bibubi, na bu kikutu kia tonyi toso twi butete na tushikībwe.

³Mwanda mīlo yoso yibatomene ku nfinyo ya bukyelo bwa lukyebanokyebano lwe, na banfumu ba ha nsenga abakitshine lukyebanokyebano n’e, na bansunga ba ha nsenga abafwimishe buheta ha mwanda wa bukome bwa bukitekite bwe.

⁴Nahushishe dingi eyi mwiilu’shi: Anwe bantu bande nukatukye mwabadi, tala nwakeabishena na milwisho ye, na kutambula kwa bihuha bie.

⁵Mwanda milwisho ye yibafikile mpaa na mwiilu, n’Efile Mukulu tahwile kunangushena yihename ye.

⁶Mulubwilei hamune mubalubudile bangi, mulubwilei namu misusa yibidi mulombene bikitshino bie; mu kihulu kibasangakene, numusangakene misusa yibidi.

⁷Bungi bwa mubetumbish’e na mwinyi na lulakalaka lwe, anka biabia namu numumweshe mitanyo na mālo; mwanda ākula mwishimba die’shi: Nashalā bu ndalamumba mubikale; ami nki mukashi-a-mufwe’mi, ami tankamono mālo’mi, ooo, sunga mpahelahela.

⁸Binyibiabia mwifuku diinune bihuha bie bianakafikye, lufu, na mālo, na kihuha kia nsala; n’e akatatshidila fututu na kālo; mwanda Yehowa Efile Mukulu amutshibila kimu, e mbukome.

⁹Na banfumu ba ha nsenga, abo abakitshine lukyebanokyebano, na kwikala n’e na muwa wa lulakalaka, abakadidi na kōkakana ha mwanda we, habakatala ha mwishi wa kutata kwe.

¹⁰Abakemana kula ha mwanda wa kutshina mitanyo ye’shi: Aa! Aa! kibalo kikata Babelone, kibalo ki bukoho! mwanda mu nsa umune kitshibilo kiobe kibafiki.

¹¹Na bansunga ba ha nsenga banakadile na kumwinyongwela, mwanda takwi muntu akaulu biakusunga kwabo dimonyi.

¹²Biakusunga bia nsahabu, na nfeda, na mabwe aneme, n’a perle, na bilamba bia lin binane, na bia bimongolokye, na bia nswa, na bimonga hyū; na bihaso bioso bia mitshi ya senteur, na bihaso bioso bia bihulu bia mbanga, na bia mitshi yikilekile kinemo, na bia munyinga, na bia kilonda-kifita, na bia mabwe atoka;

¹³na bukula bwa eanelle, na bwa malashi, na mwimu wi malashi, na bukula bwa mahembwe, na nfinyo, na mwimu, na bukula bunane, na ngano, na bimunwa, na mikoko (biakusunga) bia nfalasa, na makalo, na bahika, na miuwa ya bantu.

¹⁴Na bikuba bibābile eshimba diobe bianakakatukye kodi, na bintu bioso bia bukundwe, na buwa bukalabale bishimishwe kodi, na (bantu) tabanakebimone dimonyi sunga mpahelaliela.

¹⁵Bansunga ba bino bintu abadi abafwimisha buheta, banakēmane kula ha mwanda wa kutshina mitanyo ye, bakwete kudila na kōkakana’shi:

¹⁶Ae! Ae! kibalo kikata, kinyi kibadi kifwale bilamba bia lin binane, na bia bimongolokye, na bi monga hyū, na mushingwe na nsahabu, na mabwe aneme n’a perle!

¹⁷mwanda mu nsa umune buheta bukata bwi biabia bubāluluka ta musalu. Na basha masua, na boso abēnde ha mema su nkunyi su nkunyi, na bafubi ba ha masua, na boso abasungā ha mema abemene kula,

¹⁸bela musase hābamwene mwishi wa kutata kwe’shi: A nkibalo kinyi ki hamunenka na kinyi kino kibalo kikata?

¹⁹N’abo abēle mitende ku mitwe yabo, bela musase, kudila na kōkakana’shi: Ae! Ae! kinyi kibalo kikata mubahetelanga boso babadi na masua abo ha mema, abadi bafwimishe buheta ha mwanda wa buheta bwa’kio! mwanda mu nsa umune kibasadika.

²⁰Sehelai ha mwanda w’akio obe eilu, n’anwe bahatulwe-bekishila, n’anwe batumibwa, na batemuki; mwanda Efile Mukulu tahwile kwinuobwēla hakidi.

²¹Henyihaha mwikeilu e bukome batulwile ebwe bu dibadi adihēlwa dikata, bediele mu mema-a-kalunga’shi: Anka biabia na kifunko kikata, Babelone, kinyi kibalo kikata kianakahoneshibwe hashi, takianakamwekye’nyi, sunga mpahelahela.

²²N’eyi dia bañomba ba nsese, na dia bañomba ba biombwanga, na dia bōmbi ba nshiba, na dia bēdi ba mpungi tadianakahushibwe dimonyi modi, sunga mpahelahela;

²³n’etata dia kimunyi tadianakamunyikye dimonyi modi; n’eyi dia mubambi-a-mukashi sunga ndia mukashi-mubambibwe tadianakahushibwe dimonyi modi sunga mpahelahela; mwanda bansunga bobe babadi bantu bakata ba hanohansenga; mwanda mīlo yoso yibōngwelwe na masende obe.

²⁴Munkatshi mwe mubasanenwe mase a batemuki, n’a bahatulwe-bekishila, n’a boso abehayibwe hano ha nsenga.