Read songe Kibafumulwe 2 Bible Online

Kibafumulwe 2 - songe bible

Kibafumulwe 2

¹Kwi mwikeilu a kikoñeno ki’Efile kia ku Efisesa ofunde’shi: yawa mukwate nyenyenyi musambobidi mwiyasa die dibalume, winyi atambuka munkatshi mwa bitulo-bia-matala musambobidi, bākwile bino bintu’shi:

²Neuku bikitshino biobe, na mifubo yiokita, na lwishinko lobe lwa mufwaka, na moshyouku kukumina aba be bubi, na mu botompele baba abetemuna’shi: twi batumibwe, biosobi ta be biabia, anka bwebatundwile bu basha madimi,

³boñyinamene na lwishinko, bofwambukile namu ha mwanda w’eshina diande, twemukokye.

⁴Anka nyi n’obe uno mwanda’shi: bolekye kifulo kiobe kia kwibedi.

⁵Tentekyesha hobohono, welangye mwishimba, okite bikitshino bia kwibedi; su tokitshi nankafiki kodi, nankakatusha kitulo-ki’etala kiobe kumbalo y’akio, anka su’elanga mwishimba.

⁶Anka biodi na uno wakwamba’shi, oshikwā bikitshino bia bena Nikolaitene nyi mwibishikwe n’ami namu.

⁷Yawa e n’ētwi, ahushe bibākula Kikudi-(E-Selelee) ku bikoñeno bi’Efile. Kwi yawa akambila nankamuha kudia ku mutshi wa muwa, wi munkatshi mwa Paladisa ’Efile Mukulu.

⁸Na kwi mwikeilu a ku kikoñeno ki’Efile kia mu Sermena ofunde’shi: Yawa a kwibedi n’a nfudilo, badi mufwe, binobino atala, ākula yino myanda’shi:

⁹Neuku bikitshino biobe na bishiotshi na bulanda bobe, (anka we mpeta) na milomo yā’ba abetemuna’shi: Twi bena Yuda, biosobi ta n’abo, anka mba kikoñeno kia Satana.

¹⁰Totshinangā’ya myanda (yamalwa) yiotokyebe kukala, sunga ngumune; talanga, kafilefile takyebe kwela bamo b’enu mu nshibo ya lukano nutompibwe; anukamono bishiotshi mafuku ekumi; wekale mushimate mpaa na ku lufu, n’ami nankakuha kilongo kia muwa.

¹¹E n’ētwi, ahushe bibākula Kikudi-(E-Selelee) ku bikoñeno bi’Efile. Yawa akambila takakumbu ku lufu lwakabidi, ooo.

¹²Na kwi mwikeilu a ku kikoñeno ki’Efile kia mu Pergame ofunde’shi: yawa e na luhete lwa ngoshi lwi mashi kubidi ākula yino myanda’shi:

¹³Neuku (bikitshino biobe) na kodi mubombele, nyi kwi luhun’a nsulu lwa Satana: olamate kwishina diande, kushī kutuna lukumino lwande, sunga mu ā mafuku a Antepase kamonyi kande ka kishima, bayihailwe munkatshi mwenu, mubombele Satana.

¹⁴Anka nyi na myanda yibadidye kodi, mwanda kwakwa kodi we na bamo balamate ku lulambukisho lwa Balāma, winyi balambukishe Balaka kutula kia kukokosha ku mpala kwa Bena Isalele; na kudia bintu bitahilwe mankishi, nakukita lukyebanokyebano.

¹⁵Biabia namu we na baba balamate kululambukisho lwa Bena Nekolaitene, kinyi kiandji mushikwe.

¹⁶Welange mwishimba diobe; su tokitshi, nankafiki kodi lubilo, nankālu ngoshi n’abo na luhete lwa ngoshi lwa mu kanwe mwande.

¹⁷E n’ētwi, ahushe abiakula Kikudi (E-Selelee) ku bikoñeno bi’Efile. Kwi yawa akambila nankamuha manna afwame a kudia, nankamuha’nyi kabwe katoka, na ha kabweeshina dihya difundwe hanka, dishyadiukwa na muntu, sunga ngumune, anka yawa ekatambula.

¹⁸Kwi mwikeilu a ku kikoñeno ki’Efile kia mu Tyatire ofunde’shi: Yawa Mwan’Efile e na meso bwidimi dia kālo, ngwa ye bu kilonda kia munyinga kikusulwe, akula’shi:

¹⁹Neuku bikitshino biobe, na kifulo kiobe, na lukuluhilo lobe, na bulungudi bw’Efile bobe, na lwishinko lobe lwa mufwaka, na bikitshino biobe bia kunfudilo mbikile’bia bia kwibedibungi.

²⁰Sunga mbiabia nyi n’obe uno mwanda’shi, bolekyela (yawa) mwana mukashi Yesebela, etemuna na mwinyi bu mutemuki; kwete kulambukisha na kubembula bafubi bandebakite lukyebanokyebano, na kudia bintu bitahilwe mankishi.

²¹Namuhele kihindji kia kwilanga mwishimba ku lukyebanokyebano lwe anka e tamwilange.

²²Talangai, nankamwele mu lusala, na baba abakitshi n’e lusandji mu bishiotshi bikata, anka su abelanga mu mashimba ku bikitshino bie.

²³Nankeha bana be na lufu, na bikoñeno bi’Efile bioso abikeuku’shi, ami nyi e akokōla mu nfyo na mashimba: nankaha kwi muntu ese enu mwiyile bikitshino bienu.

²⁴Anka kwi’nwe, bakwabo ba mu Tyatire kwi baba boso bashī na luno lulambukisho, bashyabeuku myanda yifwame ya Satana bu biabākula, namba’mi’shi: Tankenutenteka kingi kita,

²⁵anka kiakia kia nwi n’akio, nukankamane hanka mpaa na hankafiki.

²⁶Yawa akambila, alama bikitshino biande mpaa na ku nfudilo, kwadi nankamuha matalwa hanundu ha mīlo.

²⁷E akebamunu n’elanga dia kilonda; bu bintu bia mbufi abitanyibwa bifingifingi; nyi munatambwidile kwi Yaiya.

²⁸Nankamuha lwenyenyi lwa namashika.

²⁹Yawa e n’ētwi, ahushe abiakula Kikudi-E-Selelee ku bikoñeno bi’Efile.