Read songe Kibafumulwe 20 Bible Online

Kibafumulwe 20 - songe bible

Kibafumulwe 20

¹Henyihaha namwene mwikeilu ayiki mwiilu, badi na lufungulo lwa luhongo lushī na nfudilo, na lukano lukata mwiyasa die.

²E bakwete kinyoka, nyi ngwinyi nyoka a kala, nyi n’Kafilefile, Satana, bamwanyine bihwa kinunu kimune:

³Bamwele mu luhongo lushī na nfudilo, bamushitshile mwanka, batudile kiukilo hadi’shi, takōngola mīlo ya bantu dimonyi, mpaa n’ahakakumbana bihwa kinunu kimune; ku mongo kwa’bio anakahosolwe kihindji kihela.

⁴Namwene namu mpun’a nsulu n’aba bashale hanka, mbahebwe kitshibilo. (Namwene’nyi) bikudi bi’aba abatshibilwe mitwe ha mwanda wa bulungudi bwa Yesu, na ha mwanda wa Mwanda w’Efile Mukulu nyi mbaba bashī badi abalangwila nyama-e-bukyelo, sunga nkihwandjikisho kie, sunga nkutambula kitundwilo kie ha mahala’bo, sunga ha maasa’bo; abekele na muwa na kubikala na Kidisitu bihwa kinunu kimune.

⁵Anka bangi bafwe babashele tambamone muwa dimonyi mpaa n’ahakakumbana bihwa kinunu kimune. Luno nyi lusangukilo lwa kwibedi.

⁶Sha mwabi na muhatulwe-e-kishila nyi ngiawa mwibungile mu lusangukilo lwa kwibedi; ha bano, lufu lwa kabidi talwi na matalwa, anka’bo banakekale batshiite-bakwidi b’Efile Mukulu na ba Kidisitu, banakabikale n’e bihwa kinunu kimune.

⁷Hanakakumbane bino bihwa kinunu kimune, Satana anakahosolwe mu nshibo ye ya lukano,

⁸anakatuke kōngola mīlo ya bantu yi ku mahaka ananka a nsenga, Ngoga na Mangoga, kwi bakongola hamune kulwa ngoshi; bungi bwabo bwi bu misengeiya ya ku mema.

⁹N’abo abahalakene kosokoso ku bula bwa nsenga, abefunyine kibombelelo kia bahatulwe-bekishila, na kinyi kibalo kitomibwe kifulo; henyihaha kālo kabayikile kwiilu kw’Efile Mukulu, kabebatatshishe fututu.

¹⁰Na kafilefile, winyi bebōngwele, belelwe mwishiba dia kālo na soufre, mwi nyama-e-bukyelo na mutemuki a madimi; banakamweshibwe mitanyo kanya na bufuku, mpaa na kwikala-ika.

¹¹Namwene namu luhuna lutoka lukata, na yawa mushale hanka, ku mpala kwe nyi kubasukile nsenga n’eilu, tankumonwe mbalo yabio, ooo.

¹²Biabia namwene bafwe, bahela na bakata bemane ku mpala kw’Efile Mukulu; na mikanda yibabulwilwe; na ungi mukanda ubabulwilwe, nyi mukanda wa muwa; na bafwe abatshibilwe kimu ku yaya myanda yifundjibwe mu mikanda, mulombene bikitshino biabo.

¹³Memaa-kalunga abalubwile bafwe (babadi) mwanka, lufu na kalunganyembo namu bibalubwile bafwe (babadi) mwanka; n’abo boso abatshibilwe kimu mulombene bikitshino biabo, muntu na bie, muntu na bie.

¹⁴Lufu na kalunganyembo bibelwe mwishiba dia kālo. Luno nyi lufu lwa kabidi.

¹⁵Na muntu oso shī musananwe (eshina die) difundjibwe mu mukanda wa muwa, ēlwa mwishiba dia kālo.