Read songe Kibafumulwe 4 Bible Online

Kibafumulwe 4 - songe bible

Kibafumulwe 4

¹Talangai, kumongo kwa yino (myanda) namwene kibi akishitulwa mwiilu; n’eyi dia kwibedi dinahushishea (dibabi) bu mpungi dikwete kwisamba n’ami; dibakwile’shi: Kaminakuno, n’ami nankulesha myanda yi’anka na wa kufika kumongo.

²Kahindji n’ākanā lulwilwe mu Kikudi (E-Selelee,) talangai, luhun’a nsulu lubatulwe mwiilu, na umune badi mushale ha luhun’a nsulu.

³Na yawa badi mushale, ha kumutala, badi bwibwe dia jaspe na dia sardoine; na nkongolo yifunye luhun’a nsulu, ha kumona yibadi bwibwe dia l’emeraude.

⁴Na mpun’a nsulu makumi abidinayinanka (yibadi) yifunyi lwinyi luhun’a nsulu, na ha mpun’a nsulu (namwene) bakulu makumi abidi na bananka bashale hanka, bafwale bilamba bitoka; na ha mitwe yabo habadi bilongo bia bushindji bia kilonda kia nsahabu.

⁵Mubatukile mu luhun’a nsulu kuhenyahenya kwa mpeshi, na mikungulu, na mayi; ku mpala kwa luhun’a nsulu bimunyi bia kālo musambobidi bibadi abitembe, abio nyi m’Bikudi musambobidi bi’Efile-Mukulu.

⁶Ku mpala kwa luhun’a nsulu (kubadi) bwishiba di mbadibadi dia kelobe; munkatshi mwa luhun’a nsulu namu na kwifunya kwa’lo (mubadi) nyamaya muwa yinanka, yiule na meso ku mpala na ku nyima.

⁷Nyama a kwibedi badi muhwandjikile ntambwe, a kabidi bu mwan’a ñombe, a kasatu badi na lukyebo bu lwa muntu, na nyama a kananka badi bu mpungwe ahahula.

⁸Na nyama ya muwa yinanka yibadi na mbaba yisamombo, (yibadi) yiule meso (ebungi) kwifunya na munda; n’ayo tayikishā kanya na bufuku, ayo’shi: Muhatulwe-Ekishila (nyi) Yehowa Efile Mukulu Shabukome-boso, e badi kala, e kwanka binobino, n’e anakafikye.

⁹Ahakatumbishā’ya nyama ya muwa na kunemeka, na kutumbula’wa mushale ha luhun’a nsulu, e winyi e na muwa wa ikala-ika,

¹⁰(biabia) bakulu makumi abidi na bananka abahone hashi ku mpala kwa yawa badi mushale ha luhun’a nsulu, na kumulangwil’e na muwa wa ikala-ika, na kwela bilongo bia bushindji bwabo ku mpala kwa luhun’a nsulu’shi:

¹¹Obe we muhwamdjikile, Nfumwetu, Efile Mukulu etu kutambula ntumbo, na kinemo, na bukome; mwanda bohangile bintu bioso, na ha mwanda wa bikyebe eshimba diobe bibadi kwanka na kuhangibwa.