Read songe Kibafumulwe 6 Bible Online

Kibafumulwe 6 - songe bible

Kibafumulwe 6

¹Namwene habalamwine Mwan’a Mukoko kimune kia biukilo musambobidi, na kuhusha bu umune a ku nyama ya muwa yinanka kwete kwakula n’eyi bu mukungulu’shi: Fwōtale.

²Talangai, namwene namu nfalasa toka, na yawa badi mutentame hanka badi na buta bwa miketwe; badi muhebwe kilongo kia bushindji; bayile kwete kushinda na kushindana.

³Habalamwine kiukilo kiakabidi, nahushishe nyama a muwa a kabidi’shi: Fwōtale.

⁴Biabia kubatukile mungi nfalasa monga; na yawa badi mutentame hanka badi muhebwe kukatusha kufukama hanohansenga’shi, betahene; kubamuhelwe namu luhete lwa ngoshi lukata.

⁵Habalamwine kiukilo kia kasatu, nahushishe nyama a muwa a kasatu kwete kwakula’shi: Fwōtale. Natadile, namona nfalasa fita; na yawa badi mutentame hanka badi na kihimo mwiyasa die.

⁶Nahushishe bwīyi dia munkatshi mwa nyama ya muwa yinanka, adiamba’shi: Kihimo kiangano ku lufalanga lwa ndenadi lumune, na bihimo bisatu bia d’orge ku lufalanga lwa ndenadi lumune. Tolwishanga mwimu na nfinyo.

⁷Na habalamwine kiukilo kia kananka, nahushishe nyama a muwa a kananka’shi: Fwōtale.

⁸Natadile, namona nfalasa mutokolokye; n’eshina dia yawa badi mutentame hanka dibadi Lufu, na Kalunganyembo kabadi akalondo ku nyima kwe. Kubebahelwe namu matalwa hanundu ha luhese lwa kananka lwa bahanohansenga kwilwika ku luhete lwa ngoshi, na ku kihuha kia nsala, na ku kihuha kia lufu, na ku nyama yi bukyelo ya hanohansenga.

⁹Habalamwine kiukilo kia katano, namwene mushi mwa kitala (kia bitahilo) bikudi bia’ba abehayibwe ha mwanda wa Mwanda w’Efile Mukulu, na ha mwanda wa bulungudi bwabadi na’bu.

¹⁰Abēle musase n’eyi dikata’shi: A Nfumwetu, muhatulwe-e-kishila n’a binyibinyi, a nku kihindji kinyi kiokalekye kwitutshibila na kōbola mase etu kwi’ba babombele hanohansenga?

¹¹Na mitwelo yitoka yibahelwe boso, muntu na w’e, muntu na w’e; ubebalungwile’shi: nwikishe ku kikihindji mpaa na ha kehayibwa bafubi n’enu na bakwenu namu hamunenka n’anwe.

¹²Natadile habalamwine kiukilo kia kasamombo, tala, kubadi kutenkatenka kukata kwa nsenga; na nguba bālulukile ta difita fututū bwikutu di bwaa, na mweshi ubālulukile bu mase;

¹³na nyenyenyi ya miilwu yibahōne ha nsenga, bu mutshi wa kikuku aukukusha bikuba biao bibishi ha kuhukwa na luhahi lukata.

¹⁴Eilu namu dibefungile bu mukanda wi mufungofungo aufungwa, na mangulu oso na bisangi bioso bibakatushwa ku mbalo yabio.

¹⁵Na banfumu ba hanohansenga, na bantu bakata, na bampeta, na bimankinda bikilekile bukata, na bantu be bukome, na mpik’ese na muān’ese, abafwama mu twina tw’efile, na mu mbwebwe ya mangulu;

¹⁶abalungwile mangulu na mbwebwe’shi: Etuhonene kwitufya ku mpala kwa yawa mushale ha luhun’a nsulu na ku nsunga ya Mwan’a Mukoko;

¹⁷mwanda efuku dikata dia nsungu ye dibafiki; biabia a nanyi euku kwimana?