Read songe Kibafumulwe 7 Bible Online

Kibafumulwe 7 - songe bible

Kibafumulwe 7

¹Ku nyima kwa yino myanda, namwene bamwikeilu bananka mbemane ha mahaka ananka a hanohansenga, bakwate mpahi yinanka ya hano hashi’shi, luhahi taluhukanga ha nsenga, sunga mpa mema, su mpa mitshi.

²Namene namu mungi mwikeilu akamina kutunduka, badi na kiukilo ki’Efile Mukulu a muwa; e bēle musase n’eyi dikata kwi bamwikeilu bananka, bahebwe (matalwa) a kumwesha nsenga na mem’a-kalunga malwa’shi:

³Tanumweshanga nsenga malwa, sunga mema-a-kalunga, sunga mitshi, mpaa na hatuhu kutula kitundwilo ha mpalahabafubi b’Efile Mukulu.

⁴Nahushishe bungi bwa’ba batudibwe kitundwilo; (babadi) lukama na makumi ananka na binanka bia binunu ba ku bisaka bioso bia bena Isalele.

⁵Ku kisaka kia Yuda binunu ekumi na bibidi bibatudilwe kitundwilo, ku kisaka kia Leubena binunu ekumi na bibidi. Ku kisaka kia Ngada binunu ekumi na bibidi.

⁶Ku kisaka kia Ashe binunu ekumi na bibidi. Ku kisaka kia Nafatale binunu ekumi na bibidi. Ku kisaka kia Manase binunu ekumi na bibidi.

⁷Ku kisaka kia Shimeone binunu ekumi na bibidi. Ku kisaka kia Lefi binunu ekumi na bibidi. Ku kisaka kia Isakale binunu ekumi na bibidi.

⁸Ku kisaka kia Sebulone binunu ekumi na bibidi. Ku kisaka kia Yosefe binunu ekumi na bibidi, na ku kisaka kia Bendjamine (namu kubadi) binunu ekumi na bibidi.

⁹Ku nyima kwa yino myanda namwene, kibumbu kikata kishyakiuku kubadikwa na muntu, kia ku mīlo yoso, na ku bifuko bioso, na ku bantu boso, na ku ndjimi yoso, bemane ku mpala kwa luhun’a nsulu na ku mpala kwa Mwan’a Mukoko, bafwadikwe na mitwelo yitoka, na malala a mabo mu maas’abo:

¹⁰abēle musase n’eyi dikata’shi: Kihandjilo (kikale) kw’Efile Mukulu etu mushale ha luhun’a nsulu, na kwi Mwan’a Mukoko namu.

¹¹Henyihaha bamwikeilu boso abemene na kwifunya luhun’a nsulu, na bakulu, na nyama ya muwa yinanka; abahōne mahala’bo hashi, abalangwile Efile Mukulu,

¹²bambanga’shi: Amena: Mwabi, na ntumbo, na binangu, na kutumbula, na kinemo, na bukome, na ntshishiba bikale kw’Efile Mukulu etu mpaa na kwikala-ika. Amena.

¹³Biabia umune a bakulu bālulwile anamba’shi: A bano bafwadikwe mitwelo yitoka mbanyi? na kwabadi bafikye nkunyi?

¹⁴N’ami namwalulwile’shi: A Mwanana, obe weuku. E bandungwile’shi: Bano nyi mbenyi abatukile ku kishiotshi kikata, abasula mitwelo yabo, abaitosha selelee mu mase a Mwan’a Mukoko.

¹⁵Binyibiabia nyi biabadi ku mpala kwa luhun’a nsulu lw’Efile Mukulu; abamufubila kanya na bufuku mu kibombelelo kie ki munda; na yawa ashala ha luhun’a nsulu akabombela munkatshi mwabo.

¹⁶Tabakasumibwa na nsala dimo, sunga nyota; nguba namu takebashiki, sunga nkālo.

¹⁷Mwanda Mwan’a Mukoko e munkatshi mwa luhun’a nsulu anakebamune, anakebakunkushe namu ku masulo a mema a muwa: n’Efile Mukulu anakebakumune mpolo yoso ku meso kwabo.