Read songe Kibafumulwe 9 Bible Online

Kibafumulwe 9 - songe bible

Kibafumulwe 9

¹Binyibiabia mwikeilu a katano bōmbele, n’ami namwene luenyenyi alwīki mwiilu kuhona hano ha nsenga. Kubamuhelwe lufungulo lwa luhongo lushī na nfudilo.

²Biabia babulwile luhongo lushī na nfudilo; kubatukile mwishi mu luhongo, bu mwishi wa mwilungu dikata; biabia nguba na luwa bibafitshishibwa ku mwishi wa luhongo.

³Kubatukile nshiye mu mwishi ha nsenga, yihebwe matalwa bu tuminu twa ha nsenga twi na matalwa.

⁴Abeyikamikile’shi: Tanulwishanga lubishi lwa ha nsenga, sunga nkingi kintu kibishi, sunga mutshi; anka (baba) bantu bashī na kitundwilo ki’Efile Mukulu ha mahala’bo.

⁵Yibahelwe’shi: Tanwibehanga, anka kwibamwesha malwa ku mieshi yitano; na mitanyo yabo yibadi bu mitanyo ya kaminu hakasumu muntu.

⁶Mu aa mafuku bantu abakakimbi lufu, tabakelumono, ooo; abakakyebe kufwa, na lufu alukebasuku.

⁷Bihaso bia nshiyi (bibadi) bifwane nfalasa yilumbuiwilwe ngoshi; na ha mitwe hayo habadi bu bilongo bia nsahabu, na mahala’yo abadi efwane mahala a bantu.

⁸Yibadi na nyene bu nyene ya bana-bakashi, na meno ayo abadi bu a ntambwe.

⁹Yibadi na ngabo ku biadi, bu ngabo ya kilonda-kifita; na kitumo kia mbaba yayo kibadi bu kitumo kia makalo a nfalasa yibungi akama lubilo ku ngoshi.

¹⁰Yibadi na minungi mu tubayi twayo, na matalwa ayo abadi kumwesha bantu malwa mieshi yitano.

¹¹Yibadi na nfumu hanundu hayo, nyi mwikeilu a mu luhongo lushī na nfudilo, eshina die mwidimi dia Bena Hebelu nyi: Abadone, anka mwidimi dia Bena Ngidiki e n’eshina dia bu: Apolyone.

¹²Mpombo ya kwibedi yibakidi, talangai, yingi mpombo yibidi yibashala ku mongo kwa yino.

¹³Henyihaha mwikeilu a kasamombo bōmbele, n’ami nahushishe eyi adituku ku masengwa a kitala kia nsahabu ki ku mpala kw’Efile Mukulu.

¹⁴Adiakula kwi mwikeilu a kasamombo badi na mpungi’shi: Hosola bamwikeilu bananka bōnyibwe ku mwela ukata wa l’Eufalate.

¹⁵Biabia bamwikeilu bananka abahoswelwe, abadi balumbudibwe kala ha mwanda wa nguba, n’efuku, na mweshi, na kihwa’shi, bayihe kihindji kia kasatu kia bantu.

¹⁶Na bungi bwa mafita a basha nfalasa bubadi binunu nkama yibidi ya binunu; n’ami nahushishe bungi bwabo.

¹⁷Biabia namwene nfalasa mu kimonwa, n’aba abadi batentame hanka, abadi na mangabo ku biadi a kālo, n’a ebwe dia hyacinthe na dia soufre; na mitwe ya nfalasa (yibadi) bu mitwe ya ntambwe; na mu kanwa mwa’yo mubatukile kālo na mwishi na soufre.

¹⁸Ku bino bisatu nyi kubehayilwe kihindji kia kasatu kia bantu, ku kālo, na ku mwishi, na ku soufre bibatukile mu kanwa mwa’yo.

¹⁹Mwanda bukome bwa nfalasa bwi mu kanwa mwa’yo, na mu mikila mwa’yo; mwanda mikila yayo (yibadi) bu manyoka e na mitwe, nyi n’ayo yiabasumana.

²⁰Bangi bantu abashele bashi behayibwe na bino bihuha, tambelangye ha mwanda wa mifubo ya ku maasa’bo’shi: Tatulangwilanga mikishi, na mankishi a kilonda kia nsahabu, n’a nfeda, n’a munyinga, n’a mabwe, n’a mitshi; ashyaeuku kumona, sunga nkuhusha, sunga nkutambuka;

²¹tambelangye namu ha mwanda wa buntomboshi bwa’bo sunga ngwa masende abo, sunga ngwa lukyebanokyebano lwabo, sunga ngwa bwifi bwabo, ooo.