Read south west gbaya Matthieu 12 Bible Online

Matthieu 12 - south west gbaya bible

Matthieu 12

¹Ha ngimɔ ɛngi Jésus gɔna ha zang fɔ kpalmɔ ha swe ɔmtɛ. Nɛ wɔ dea hio *wan-yambimɔ pɛa, nɛ mbwa bhio ma kpalmɔ yɔng.

²Ka hio *Farizien zɔka mɛgi, mbwa tɔa ha Jésus: «Pangay, hio wan-yambimɔ pɛ mɛ ha dea mɔ ka *mbonga pɛ ɔ tɔa nde, ɛ ade yo ha swe ɔmtɛ na.»

³Jésus kiforo wen ha mbwa: «Ɛnɛ tɛ tɔl mɔ ka David nɛ hio wi pɛa bade ha ngimɔ ka mbwa dungɔ nɛ wɔ, na nde?

⁴A lea twa Sɔ hinɛ hio wi pɛa, nɛ mbwa yɔnga mampa ka ɛ haa nɛ sadaka kari, ngase ka mbonga tɔa nde, ma gele wi tuka mbwa ayɔng yo na, kanɛ hio wan-hasadaka sɔna.

⁵Hio wan-hasadaka ha dea tom ha zang *gasa twa Sɔ ha swe ɔmtɛ fin. Ngase ɛngi kita lɛm ba mbwa na. Bo nê ɛnɛ tɔla mɛgi ha zang mbonga pɛ Moïse, na nde?

⁶Ma, mi tɔ ha ɛnɛ nde, mi hakɛ nɛ zioa pen gasa twa Sɔ.

⁷Sɔ tɔa ha takarata pɛa: ‹Mi ngoya nde, ɛnɛ ade kobhe tɛ wi, bo nê sadaka na.› Ka bo se nde, ɛnɛ aing gotoa, ki ɛnɛ tɛ gɔn kita sungiri nɛ hio wan-ngabhala nu na.

⁸Mi, *Bewei pɛ Wi nê wan hazu swe ɔmtɛ.»

⁹Ka Jésus pena haki, a lea ha ma *twa gɔ Sɔ.

¹⁰Haki ma wi ang nɛ yɔmba kɔ. Hio ma wi ka dungɔ ha kio wal mɛ fundi Jésus, ana wɛnɛ: «*Mbonga pɛ ɔ haa wal nde, ɛ akpasisi wan-zɛlɛ ha *swe ɔmtɛ nde?»

¹¹Nɛ Jésus kiforo wen ha mbwa: «Ha soko ɛnɛ, ka ma wi nɛ ndanga sami ndang sɔna, nɛ ka sami ɛngɛ teka ha zang kɔ ha swe ɔmtɛ, wɛnɛ lɛm gbosisi wɛnɛ ha dɛl, na nde?

¹²Ma, bo nɛ wi nɛ zioa pen sami, na nde? Mɛgi mbonga pɛ ɔ ha wal mɛ de dedemɔ ha swe ɔmtɛ.»

¹³Nɛ Jésus tɔa ha wan-yɔmba kɔ: «Yafifi kɔ mɛ!» Wɛnɛ yafafa, nɛ kɔ wa kiforo nɛ dedea tuka mbinga.

¹⁴Nɛ hio *Farizien ndɔng gboa nɛ bhɔngiri wen nde, mbwa agbɛ Jésus.

¹⁵Ka Jésus ingɔ wen ɛngɛ, a laka bhandi ɛngi gde. Giliwi ndara wɛnɛ, nɛ a kpasasa hio wan-zɛlɛ fɛt.

¹⁶Nɛ wɛnɛ mboa nu mbwa nɛngaya nde, ka mbwa agbasi wɛnɛ na.

¹⁷A dea mɛgi hazu lɛmsiri wen ka Sɔ batɔ se nɛ wal nu *wan-tɔkuliwen Esaïe:

¹⁸«Wi ɛngɛ nê wan-tom pɔm ka mi weka, mi ngoya wɛnɛ gdang nɛ mi de totɛ tɛ wa. Mi begde *Nzɔy-Sɔtɛ pɔm ha zu wa, nɛ wɛnɛ beosi nzeng wal deamɔ ha hio kandɔ ka bo nê *zuife na.

¹⁹Wɛnɛ lɛm gdɔri nɛ mɔy hinɛ hio wi na. Nɛ a lɛm tɔ wen nɛ ngagɛl ha zang dɛl na.

²⁰Wɛnɛ lɛm gbin mɔka wi ka dung tuka suo sisongo na. Nɛ a lɛm bisi mɔka wi ka dung tuka bebe we lamba na. A bede mɛgi kanɛ wɛnɛ danga zu hio wi nde, mbwa amɛkiri nzeng wal deamɔ pɛ Sɔ.

²¹Nɛ hio kandɔ fɛt, begde tazu mbwa ha tɛ wa.»

²²Hapata ɛ kuo ma wi tɛnɛ ha pɛ Jésus. Wɛnɛ nê wan-gdɔka li nɛ wan-gdɔka nu hazu gdanga sɔtɛ ha zang tɛ wa. Jésus kpasasa wi ɛngɛ, nɛ wɛnɛ angara zɔka mɔ nɛ wola mɔ.

²³Mɛgi hio giliwi yaksa nɛ mbwa tɔa: «Wi kɛ bo nê *Bewei pɛ David na nde?»

²⁴Ma, ka hio *Farizien zea hio wi ha tɔa mɛgi, mbwa tɔa: «Wi kɛ lɛm yin gdanga sɔtɛ sɔna nɛ ngatɛ pɛ *Satan, wan-zu hio gdanga sɔtɛ.»

²⁵Ma, Jésus ingɔ takaramɔ pɛ mbwa nɛ wɛnɛ tɔa ha mbwa: «Kandɔ fɛt ka kɛtini soko betukili. Nɛ le nɛ nugala fɛt ka kɛtini soko lɛm bhɔn na.

²⁶Ka Satan yin Satan, yo osi nde, a kɛtana soko tɛ wa nɛ pɛa tɛ. Mɛgi kongakandɔ pɛa bebhɔn fin mɛng?

²⁷Nɛ ka bo se nde, mi ayin hio gdanga sɔtɛ nɛ wal ngatɛ pɛ wan-zu gdanga sɔtɛ, hio wi pɛ ɛnɛ yin pɛ mbwa nɛ ngatɛ pɛ o? Mɛgi yo nê mbwa nɛ pɛ mbwa tɛ ka osi nde, ɛnɛ tɔa wen dalo.

²⁸Ma, ka mi yin gdanga sɔtɛ nɛ ngatɛ pɛ *Nzɔy-Sɔtɛ pɛ Sɔ, yo osi nde, *Kongakandɔ pɛ Sɔ hɔa ha soko ɛnɛ kari.

²⁹«Wanzu lɛma le twa pɛ ngawi nɛ kay hio toy pɛa mɛng? Sɔna ka wɛnɛ sanga ngawi ɛngɛ sɔngsi ing, ki wɛnɛ bekay toy pɛa.

³⁰«Wi ka bo hinɛ mi na, wɛnɛ sungiri mi. Nɛ wi ka ndɛm mɔ hinɛ mi na, wɛnɛ ha panzaka mɔ.

³¹Mɛgi, mi tɔ ha ɛnɛ nde, Sɔ lɛma bisi *sɛmbɔ pɛ hio *wan-de gdangamɔ nɛ pɛ hio wan-fɛngsi wɛnɛ fɛt. Ma, Sɔ lɛm bisi sɛmbɔ pɛ wan-fɛngsi Nzɔy-Sɔtɛ na.

³²Nɛ ka ma wi tɔ gdanga wen sungiri mi, *Bewei pɛ Wi, Sɔ lɛma ha *tiso ha wɛnɛ. Ma, ka ma wi tɔ gdanga wen sungiri Nzɔy-Sɔtɛ, Sɔ lɛm ha tiso ha wɛnɛ na. Ngase ha nzan ɛngɛ, ngase ha mbombe nzan ka betɛ.»

³³«Ka te nɛ dedea, wayaa bedung nɛ dedea. Nɛ ka te nɛ gdangaa, wayaa bedung fin nɛ gdangaa. Hazu ɛ ing te nɛ wal wayaa.

³⁴Ɛnɛ, kul pɛ da gɔk! Ɛnɛ nê gdanga wi, mɛgi ɛnɛ lɛm tɔ dede wen ndang na. Hazu wi tɔ sɔna nɛ wen mɔ, ka don zang sila wa.

³⁵Dede wi gbosisi nɛ dedemɔ ka don zang sila wa. Nɛ gdanga wi gbosisi nɛ gdangamɔ ka don zang sila wa.

³⁶Ma, mi tɔ ha ɛnɛ nde, ha swe kita pɛ Sɔ, hio wi betɔ olo nu mbwa hazu tum wen fɛt ka mbwa batɔ.

³⁷Lɛm nɛ wal wolamɔ pɛ mɛ, Sɔ beba mɛ tuka *nzeng wi, mana a begɔn kita ba mɛ.»

³⁸Hapata, hio ma *wan-osi mbonga nɛ hio ma *Farizien tɔa ha Jésus: «Wan-osimɔ, ɔ ngoya nde, mɛ ade ma mɔweka ka osi nde, yo nê Sɔ ka tomsi mɛ.»

³⁹Jésus kiforo wen ha mbwa: «Hio wi mɔ ngimɔ ɛngɛ nɛ gdangaa! Mbwa bo nɛ mboazu ha li Sɔ na, ma, mbwa ha ana mɔweka. Sɔ lɛm de ma mɔweka ha mbwa fin na, kanɛ mɔweka pɛ *wan-tɔkuliwen Jonas.

⁴⁰Gbesi tuka Jonas dea yala tar ha zang gasa kɔyɔ, mi, *Bewei pɛ Wi, bede fin yala tar ha si nu.

⁴¹Ha swe kita pɛ Sɔ, hio wi mɔ kandɔnu Ninive begu bin tɛ, nɛ mbwa bekɛ wen sungiri hio wi mɔ ngimɔ ɛngɛ. Hazu hio wi mɔ Ninive kiforo sila mbwa, ka mbwa zea bulowen pɛ Jonas. Ma, mi ka dung hakɛ, mi pena Jonas.

⁴²Nɛ *kongapora mɔ bhoko mɔ kandɔnu Saba fin begu bin tɛ, nɛ a bekɛ wen sungiri hio wi mɔ ngimɔ ɛngɛ. Hazu wɛnɛ guotɛ nɛyɛa tɛ ha zea wen mbaramɔ pɛ Salomon. Ma, mi ka dung hakɛ, mi pena Salomon.»

⁴³«Ka ma gdanga sɔtɛ gboa ha tɛ ma wi, a bendoti ha kpɛnu hazu ki bhandi ɔmtɛ. Nɛ ka wɛnɛ kpa bhandi na,

⁴⁴a betɔ nde, a bekifiri ha mɔa bhandi pɛa. Nɛ ka wɛnɛ kiforo, a kpaa zang twaa nɛ gomboa nɛ saa, ka ɛ bhɔksa nɛdedea.

⁴⁵A benɛ nɛ sa hio gdanga sɔtɛ mɔrkɔ zanga bwa, ka dung nɛ gdangaa pen wɛnɛ. Mbwa bekifiri gbesi nɛ de le ha zang tɛ wi kɛ. Hapata, dungɔ pɛ wi ɛngɛ tɛ bo nɛ gdangaa pen mɔ sɔngsi. Yo bedung gbesi nɛ hio gdanga wi mɔ ngimɔ ɛngɛ.»

⁴⁶Ka Jésus boka ha wolamɔ ha hio giliwi, nana wa nɛ hio ya wa hɔa tɛ dung ha dɛl. Mbwa kio wal mɛ wolmɔ ha wɛnɛ.

⁴⁷Ma wi tɔa ha Jésus: «Nana mɛ nɛ hio ya mɛ hakɛ ha dɛl. Mbwa ngoya wolmɔ ha mɛ.»

⁴⁸Nɛ Jésus kiforo wen ha wi ɛngɛ: «O nê nana mi nɛ hio ya mi, o nde?»

⁴⁹Nɛ wɛnɛ osa kɔ ha tɛ hio *wan-yambimɔ pɛa, nɛ tɔa: «Ɛnɛ zɔk, nana mi nɛ hio ya mi hakɛ.

⁵⁰Hazu wi ka de mɔ ka Bafa mi ha zang ngɔn ngoya, wɛnɛ nê ya mi mɔ bewei, mɔ bebhoko, nɛ nana mi.»