Read south west gbaya Matthieu 13 Bible Online

Matthieu 13 - south west gbaya bible

Matthieu 13

¹Ha swe ɛngɛ, Jésus gboa ha twa, nɛ a dungɔnu ha nukolo tɔ Galile.

²Hazu dɔka giliwi wesara may hapɛtɛ wa, a lea sɔngu nɛ dungɔnu ha zanga. Hio giliwi dungɔ ha nukolo.

³Nɛ wɛnɛ osamɔ ha mbwa nɛdɔka nɛ wal towen. A tɔa: «Ɛnɛ ze, ma wi nɛa ha fɔ hazu pɛ kpalmɔ.

⁴Nɛ ka wɛnɛ pɛa, hio ma teka ha liwal. Nɛ hio nɔy hɔa tɛ saki yo.

⁵Hio ma teka ha zu gogo ha bhandi ka nu bo ang nɛdɔka na. Hio kpalmɔa kpɔatɛ nɛhasa, hazu nu bo nɛ gdukoa na.

⁶Ka swe hɔa ha sila zu, yo yɔmba nɛ yo kota hazu kua le nu nɛdedea na.

⁷Hio ma teka ha soko yak ngombia, ka kpɔatɛ nɛ luo kpalmɔ ndɔng.

⁸Hio ma teka ha dede nu, nɛ yo waya. Ma waya gɔmmay ndang, ma waya bhukɔa mɔrkɔ zu bhukɔa ndang, nɛ ma waya bhukɔa tar.»

⁹Nɛ Jésus tɔa fin: «Wi ka bo nɛ zala mɛ ze mɔ, wɛnɛ aze.»

¹⁰Hio *wan-yambimɔ tiko nɛ ha pɛ Jésus, nɛ ani wɛnɛ: «Mɛ wolmɔ ha mbwa nɛ wal towen hazu ge nde?»

¹¹Nɛ wɛnɛ kiforo wen ha mbwa: «Pɛ ɛnɛ, mɔ ka badung nɛ wuso hazu *Kongakandɔ Ngɔn, Sɔ gbasa yo ha ɛnɛ. Ma, pɛ hio oloa, Sɔ gbasi yo ha mbwa na.

¹²Hazu ɛ beha mɔ ha wi ka dung nɛ mɔ ha kɔ wa. Nɛ wɛnɛ bedung ha zang yɛbhɛ-yɛbhɛ kpaamɔ. Ma, wi ka bo nɛ ma mɔ na, ngase bebe mɔ ka dung ha kɔ wa, ɛ beku yo yunɛ.

¹³Yo nê ɛngi, ka mi wolmɔ ha mbwa nɛ wal towen. Hazu ngase ka mbwa ha gɛra mɔ, mbwa zɔk yo na, nɛ ngase ka mbwa ha lɛnga zala, mbwa ze nɛ ing yo na.

¹⁴Mɛgi, kuliwen ka Sɔ batɔ nɛ wal nu Esaïe, lɛmsara tɛ ha mbwa: ‹Ɛnɛ belɛngi zala, ma, ɛnɛ lɛm ze mɔ na. Ɛnɛ begɛri mɔ, ma, ɛnɛ lɛm zɔk mɔ na.

¹⁵Hazu sila wi mɔ kandɔ ɛngɛ tɛ bo gdingbiti. Mbwa gdɔka zala mbwa nɛ li mbwa tuka nde, li mbwa azɔk mɔ na, nɛ zala mbwa aze mɔ na, nɛ sila mbwa aing gotomɔ na. Yu nde, mbwa betɛ kifiri sila mbwa nɛ mi betɛ kpasisi mbwa.›

¹⁶«Ma, totɛ ha ɛnɛ, hazu li ɛnɛ ha zɔka mɔ, nɛ zala ɛnɛ ha zea mɔ!

¹⁷Kpasawen, mi tɔ ha ɛnɛ nde, dɔka *wan-tɔkuliwen nɛ dɔka *nzeng wi dea hɛl mɛ zɔk mɔ ka ɛnɛ ha zɔka. Ma, mbwa tɛ zɔk yo na. Mbwa dea hɛl mɛ ze mɔ ka ɛnɛ ha zea. Ma, mbwa tɛ ze yo na.»

¹⁸«Mɛgi, ɛnɛ ze goto towen hazu wan-pɛ kpalmɔ:

¹⁹Hio ma wi zea wen hazu *Kongakandɔ Ngɔn, ma, mbwa ing yo na. Mɛgi *Satan tɛ, tɛ ku yo ha sila mbwa yunɛ. Pɛ mbwa, yo gbesi tuka kpalmɔ ka teka ha liwal.

²⁰Pɛ hio ma wi, yo gbesi tuka kpalmɔ ka teka ha gogo. Mbwa zea wen pɛ Sɔ nɛ baa yo nɛhasa nɛ totɛ.

²¹Ma, wena le sila mbwa nɛdedea na, hazu mbwa bo nɛ nɔa na. Ka ɛ yeksa mana namala mbwa hazu wen pɛ Sɔ, mbwa laka mɛkaramɔ Sɔ gde nɛhasa.

²²Pɛ hio ma wi, yo gbesi tuka kpalmɔ ka teka ha soko yak ngombia. Mbwa zea wen pɛ Sɔ, ma, mbwa nɛ nɔzang hazu mɔ mɛ nzan ɛngɛ, nɛ hɛl yɛbhɛ-yɛbhɛ mɔ osili mbwa. Mɛgi yo luo wen pɛ Sɔ ka lɛm way fin na.

²³Ma, pɛ hio ma wi, yo gbesi tuka kpalmɔ ka teka ha dede nu. Yo nê wi ndɔng ka zea nɛ ingɔ goto wen pɛ Sɔ. Nɛ mbwa waya, ma gɔmmay ndang, ma waya bhukɔa mɔrkɔ zu bhukɔa ndang, nɛ ma waya bhukɔa tar.»

²⁴Jésus tɔa ma towen ha mbwa fin: «*Kongakandɔ Ngɔn dung gbesi tuka ma wi ka pɛa dede kpalmɔ ha fɔ pɛa.

²⁵Ka hio wi ha ɔala, ngana pɛa tɛa, tɛ pɛ gdanga pala ha sokoa nɛ pena.

²⁶Ka kpalmɔ ha kpɔatɛ mɛ way, gdanga pala fin ha kpɔatɛ gbesi.

²⁷Mɛgi hio wan-tom nɛa, nɛ ani wan pɛ mbwa: ‹Wan pɛ ɔ, mɛ pɛa dede kpalmɔ ha fɔ pɛ mɛ. Ma, gdanga pala ndɔng gutɛ fin ha ndo?›

²⁸Nɛ wɛnɛ tɔa ha mbwa: ‹Yo nê ngana pɔm ka dea yo.› Hio wan-tom ana fin wɛnɛ: ‹Mɛ ngoya nde, ɔ anɛ, nɛ zuri gdanga pala ndɔng yunɛ, nde?›

²⁹Wɛnɛ kafa nɛ tɔa: ‹Dalo, yu nde, ɛnɛ betɛ zuri hio dede kpalmɔ nɛ pala ndɔng gbesi.

³⁰Ɛnɛ gde mbwa akpɔtɛ gbesi kanɛ ngimɔ bhi kpalmɔ. Ha ngimɔ ɛngi, mi betɔ ha hio wan-bhi kpalmɔ nde, mbwa awesiri gdanga pala sɔngsi, nɛ hɛl yo nɛ zika hazu besisi yo. Hapata, mbwa bewesiri dede kpalmɔ gde ha zang gulo pɔm.›»

³¹Jésus tɔa ma mbing towen ha mbwa: «Kpɔatɛ pɛ *Kongakandɔ Ngɔn dung gbesi tuka gbala mutarde, ka ma wi pɛa ha fɔ pɛa.

³²Gbalamɔ ɛngɛ nɛ bebea pen oloa fɛt. Ma, ka yo kpɔatɛ kari, yo tɛ bo nê gasa wakpo pen mbinga fɛt. Yo tɛ bo nê te, nɛ hio nɔy tɛa, tɛ de twa ha hio gbakɔa.»

³³Nɛ Jésus tɔa ma mbing towen ha mbwa: «Kpɔatɛ pɛ *Kongakandɔ Ngɔn dung tuka yina hasisi mampa ka ma bhoko kuo tikiring vɔtiki nɛ dɔka fok, kanɛ mbɔrɔa fɛt haa don toy.»

³⁴Jésus wolamɔ ndɔng fɛt ha giliwi nɛ wal towen. Ma wen ka wɛnɛ tɔa ha mbwa, ka bo nê towen na, bona.

³⁵Mɛgi, wen ɛngɛ ka Sɔ batɔ nɛ wal nu *wan-tɔkuliwen lɛmsara tɛ: «Mi bewolmɔ ha mbwa nɛ wal towen. Mi begbasi ha mbwa mɔ ka dungɔ nɛ wuso nisi ha kudom nzan.»

³⁶Hapata Jésus laka hio giliwi gde nɛ lea twa pɛa. Hio *wan-yambimɔ pɛa tiko nɛ hapɛtɛ wa, nɛ tɔa: «Mɛ osi goto towen hazu gdanga pala ha ɔ.»

³⁷Jésus kiforo wen ha mbwa: «Wi ka pɛ dede kpalmɔ ha fɔ, yo nê mi, *Bewei pɛ Wi.

³⁸Nɛ fɔ ɛngɛ, yo nê nzan. Dede kpalmɔ, yo nê hio wi mɔ *Kongakandɔ Ngɔn. Nɛ gdanga pala, yo nê hio wi pɛ *Satan.

³⁹Ngana ka pɛa gdanga pala, yo nê Satan. Ngimɔ bhi kpalmɔ, yo nê kpogio ngimɔ pɛ nzan ɛngɛ. Nɛ hio wan-bhi kpalmɔ, yo nê hio *telenge.

⁴⁰Gbesi tuka ka ɛ wesiri gdanga pala nɛ besisi yo ha we, mɔ bedung mɛgi ha kpogio ngimɔ pɛ nzan ɛngɛ.

⁴¹Mi, Bewei pɛ Wi, betomsi hio telenge pɔm, nɛ mbwa bewesiri mɔ ka dak wi pi ha dea gdangamɔ nɛ hio *wan-de gdangamɔ fɛt gbosisi ha Kongakandɔ pɔm.

⁴²Nɛ hio telenge bepi mbwa ha gbaguru we. Haki mbwa behe kwa nɛ yɔng nzata.

⁴³Ma, hio *nzeng wi beba gbesi tuka swe ha zang Kongakandɔ pɛ Bafa mbwa. Wi ka bo nɛ zala mɛ ze mɔ, wɛnɛ aze.»

⁴⁴«*Kongakandɔ Ngɔn dung fin tuka dɔka mbɔli ka ɛ wuso ha zang ma fɔ. Ma wi kpaa yo, ma, a gdea yo ha wusoa. Gasa totɛ dona sila wa, mɛgi a gdonga mɔ pɛa fɛt, nɛ hɛa fɔ ɛngɛ.»

⁴⁵«*Kongakandɔ Ngɔn dung fin tuka ɛngɛ: Ma wan-gdongimɔ ang ka ki dede mɛtɛtɛ.

⁴⁶Wɛnɛ zɔka ma ndang nɛ ngagɛnɛ, mɛgi a nɛa nɛ gdongi mɔ pɛa fɛt, nɛ hɛa yo.»

⁴⁷«*Kongakandɔ Ngɔn dung fin tuka yɔk ka ɛ pio ha li, nɛ ka wesara tili kɔyɔ fɛt.

⁴⁸Ka yo dona, ɛ daka yo pi ha nubɛlɛ. Ɛ dungɔnu nɛ kaya hio dede kɔyɔ a ha toy, nɛ pi hio gdangaa.

⁴⁹Mɔ bedung mɛgi ha kpogio ngimɔ pɛ nzan ɛngɛ: Hio *telenge betɛ tɛ kɛtini soko hio gdanga wi hinɛ hio *nzeng wi.

⁵⁰Nɛ mbwa bepi hio gdanga wi ndɔng ha gbaguru we. Haki mbwa behe kwa nɛ yɔng nzata.»

⁵¹Jésus ana hio *wan-yambimɔ pɛa: «Ɛnɛ ingɔ mɔ ndɔng fɛt nde?» Mbwa kɔa: «Ey!»

⁵²Nɛ a tɔa ha mbwa fin: «Mɛgi hio *wan-osi mbonga ndang ndang fɛt ka tɛ bo nê wan-yambimɔ mɔ *Kongakandɔ Ngɔn, mbwa dung tuka ma wan-twa ka gbosisi mbombe nɛ mɔa mɔ ha bhandi toy pɛ mbwa.»

⁵³Ka Jésus karsa tɔa hio towen ndɔng, a pena haki,

⁵⁴nɛ ha le Nazaret, ka wɛnɛ kpɔatɛ ang. A angara osamɔ ha zang *twa gɔ Sɔ mɔ lea. Nɛ hio wi haki yaksa nɛ tɔa: «Wɛnɛ kpaa mbaramɔ ɛngɛ nɛ ziomɔ mɛ de *mɔkifi ndɔng ha ndo?

⁵⁵Wi kɛ bo nê bewei pɛ wan-sɛkte na? Nana wa bo nê Marie na? Nɛ bo nê hio ya wa nê Jacques, Joseph, Simon nɛ Jude na?

⁵⁶Bo nê hio ya wa mɔ bebhoko fɛt ha soko ɔ hakɛ, na nde? Ma, a kpaa mɔ ndɔng fɛt ha ndo?»

⁵⁷Mɛgi, mɔ ndɔng fɛt dolsa mbwa mɛ mɛkiri Jésus. Nɛ Jésus tɔa ha mbwa: «Hio wi ba *wan-tɔkuliwen nɛ zioa ha bhandi fɛt. Ma, ha le ka wɛnɛ kpɔatɛ ang, nɛ ha soko hio nam pɛa, ɛ ba wɛnɛ ang nɛ zioa na.»

⁵⁸Mɛgi Jésus tɛ de dɔka mɔkifi haki na, hazu mbwa tɛ mɛkiri wɛnɛ na.