Read south west gbaya Matthieu 16 Bible Online

Matthieu 16 - south west gbaya bible

Matthieu 16

¹Hio Farizien nɛ hio Sadusien tiko tɛ ha pɛ Jésus hazu we sila wa. Nɛ mbwa ana wɛnɛ mɛ de ma mɔweka ka osi nde, ziomɔ pɛa tɛ nɛ wal Sɔ.

²Ma, a kiforo wen ha mbwa: «Ka mbolo dea nɛ liswe nɛ gbɛa, ɛnɛ tɔ nde, bhisiri dede swe beba.

³Nɛ ka liswe nɛ gbɛa nɛ sutole sut, ɛnɛ tɔ nde, mɛsɛ kolo beɔl. Mɛgi ɛnɛ ingɔ gbaa soko mɔ ka dung ha liswe. Ma, ɛnɛ ing gbaa soko mɔ ka ngimɔ ɛngɛ ha gbasa na.

⁴Hio wi mɔ ngimɔ ɛngɛ nê gdanga wi! Mbwa bo nɛ mboazu ha li Sɔ na. Nɛ mbwa ha ana ma mɔweka pɛ Sɔ. Ma, wɛnɛ lɛm de ma mɔweka ha mbwa fin na, kanɛ mɔweka pɛ *wan-tɔkuliwen Jonas.» Nɛ wɛnɛ laka mbwa gde, nɛ a lea sɔngu pen.

⁵Ka hio *wan-yambimɔ kuo li tɔ, mbwa kpaa nde, mbwa ela kuo mampa.

⁶Nɛ Jésus tɔa ha mbwa: «Ɛnɛ pangay nɛ yina hasisi mampa pɛ hio Farizien nɛ pɛ hio *Sadusien.»

⁷Hio wan-yambimɔ takara mɔ ha soko mbwa nde, a tɔa mɛgi hazu mbwa tɛ ku mampa na.

⁸Jésus ingɔ takaramɔ pɛ mbwa nɛ tɔa: «Mɛkaramɔ pɛ ɛnɛ nɛ bebea. Hazu ge ka ɛnɛ takara mɔ ha soko may nde, ɛnɛ tɛ ku mampa na, ge nde?

⁹Ɛnɛ tɛ kpa ka ingɔmɔ na? Tazu ɛnɛ biso nɛ wi tomay mɔrkɔ ka mi daya nɛ mampa mɔrkɔ, nde? Ɛnɛ donsa gɛsɛ ge nɛ olo titia, ge nde?

¹⁰Nɛ tazu ɛnɛ biso fin nɛ wi tomay nar ka mi daya nɛ mampa mɔrkɔ zanga bwa, nde? Ɛnɛ donsa gɛsɛ ge nɛ olo titia, ge nde?

¹¹Mi tɛ tɔ wen hazu mampa na. Hazu ge, ɛnɛ tɛ ing yo na? Ma, ɛnɛ pangay nɛ yina hasisi mampa pɛ hio Farizien nɛ pɛ hio Sadusien!»

¹²Mɛgi mbwa ingɔ nde, Jésus tɛ mbo mbwa mɛ de pangay nɛ yina hasisi mampa na, ma, mɛ de pangay nɛ osamɔ pɛ hio Farizien nɛ pɛ hio Sadusien.

¹³Ka Jésus hɔa ha kandɔnu mɔ le Sezare pɛ Philippe, a ana hio *wan-yambimɔ pɛa: «Hio wi tɔ nde, mi, *Bewei pɛ Wi, nê o?»

¹⁴Mbwa kiforo wen: «Hio ma wi tɔ nde, mɛ nê *Jean wan-gdumsiwi. Hio ma nde, mɛ nê *Elie. Nɛ hio ma mbinga tɔ nde, mɛ nê Jérémie mana ma ndang ha soko hio *wan-tɔkuliwen.»

¹⁵Nɛ wɛnɛ ana mbwa: «Ma, ɛnɛ, ɛnɛ tɔ pɛ ɛnɛ nde, mi nê o?»

¹⁶Simon-Pierre kiforo wen: «Mɛ nê Mesi, Bewei pɛ tunɔ Sɔ.»

¹⁷Mɛgi Jésus tɔa ha wɛnɛ: «Totɛ ha mɛ Simon bewei pɛ Jean, hazu yo bo nê wi ka gbasi yo ha mɛ na. Ma, yo nê Bafa mi ha zang ngɔn.

¹⁸Nɛ mi tɔ ha mɛ nde, mɛ nê Pierre, ka tɔ nde, ta. Mi bewesiri zugili wi pɔm ka ɛ sa nde *eglize, gde ha zu ta ɛngɛ. Nɛ ngase ngatɛ pɛ fio lɛm gan zu mbwa na.

¹⁹Mi beha mɛ hio sɔtɛ nutwa mɔ *Kongakandɔ Ngɔn. Mɔ ka mɛ bekafi nde, ɛ ade yo ha nu, Sɔ bekafi yo ha ngɔn. Nɛ mɔ ka mɛ bemɛkiri nde, ɛ ade yo ha nu, Sɔ bemɛkiri yo ha ngɔn.»

²⁰Hapata, a mboa nu hio wan-yambimɔ pɛa nɛngaya nde, ka mbwa atɔ nde, wɛnɛ nê Mesi, ha ma wi ndang na.

²¹Angiri ha ngimɔ ɛngi, Jésus angara gbasa mɔ ɛngɛ ha hio *wan-yambimɔ pɛa, a tɔa: «Lɛma nde, mi anɛ ha Jérusalem, nɛ mi akpa dɔka yimtɛ ha kɔ hio kotowi, hio gasa wan-hasadaka nɛ hio *wan-osi mbonga. Nɛ mbwa begbɛ mi. Ma, ha zetar yala, mi begutɛ ha soko hio fiowi.»

²²Pierre daka tɛ hinɛ Jésus tikiring, nɛ a sɛna wen ha wɛnɛ, a tɔa: «Sɔ akpasisi mɛ, *Kongawan! Way, mɔ ndɔng lɛm kpa may hinɛ mɛ ndang na!»

²³Ma, Jésus kiforo tɛ tɔ ha Pierre: «Mɛ pen ha li mi, *Satan! Mɛ nê ta mɔ kɔ nanga ha liwal pɔm, hazu mɛ takiri mɔ tuka Sɔ na, ma, tuka wi.»

²⁴Nɛ Jésus tɔa ha hio *wan-yambimɔ pɛa: «Ka ma wi ngoy mɛ ndari mi, lɛma nde, wɛnɛ akafi wɔ mɔ nzan fɛt, wɛnɛ agu getakate pɛa gde ha zu bhaka wa, nɛ wɛnɛ andari mi.

²⁵Hazu wi ka ngoy kpasisi tunɔ pɛa, a beyɔsisi yo. Ma, wi ka beyɔsisi tunɔ pɛa hazu mi, a bekpa yo kpoo.

²⁶Ka ma wi yɔsasa tunɔ pɛa nɛ wal kpaa mɔ nzan fɛt, kpaamɔ pɛa bede nɛ ge ha wɛnɛ ge nde? Wi lɛm hɛ fin tunɔ pɛa nɛ mbinga nɛ nge mɔ ge nde? Ma mɔ ndang bona.

²⁷Hazu mi, *Bewei pɛ Wi, betɛ hinɛ hio *telenge pɔm ha zang *lɛkɛ-lɛkɛmɔ pɛ Bafa mi. Nɛ mi bekɛ wi ndang ndang fɛt lɛm nɛ deamɔ pɛ mbwa.

²⁸Kpasawen, mi tɔ ha ɛnɛ, hio ma ha soko ɛnɛ ka dung hakɛ sising lɛm fe na, kanɛ mbwa bezɔk mi, Bewei pɛ Wi ha tɛa tuka *kongapora ha zu Kongakandɔ pɔm.»