Read south west gbaya Matthieu 18 Bible Online

Matthieu 18 - south west gbaya bible

Matthieu 18

¹Ha ngimɔ ɛngi hio *wan-yambimɔ tɛa ha pɛ Jésus tɛ ani wɛnɛ: «O nê gasa wi pen mbinga ha Kongakandɔ Ngɔn, o nde?»

²Nɛ Jésus saa ma bhobem tɛ gde ha li mbwa,

³nɛ tɔa: «Kpasawen, mi tɔ ha ɛnɛ nde, ka ɛnɛ kifiri tɛ ɛnɛ nɛ tɛ tuka bhobem na, ɛnɛ lɛm le Kongakandɔ Ngɔn ndang na.

⁴Wi ka ba tɛ wa nɛ bebea tuka bem ɛngɛ, wɛnɛ bedung nɛ gasaa ha Kongakandɔ Ngɔn pen hio mbinga fɛt.

⁵Nɛ wi ka ba ma wi tuka ɛngɛ nɛ dede kɔ hazu ling mi, wɛnɛ baa mi.»

⁶«Ka ma wi dung ta mɔ kɔ nanga hazu ma bebe wi ka mɛkara mi, nɛdedea nde, ɛ akpo gasa ta hɔn mɔ ha gɛl wia nɛ pi wɛnɛ ha nana-litɔng gbilim.

⁷Yo nê gasa ngɔtɛ ha hio wi mɔ nzan, hazu hio mɔ ang ka lɛma daka mbwa pi ha dea gdangamɔ. Ɛ lɛm dol yo na. Ma, ngɔtɛ ha wi ka ku mɔ mɛgi tɛnɛ!

⁸«Ka kɔ mɛ mana nanga mɛ dak mɛ pi ha dea gdangamɔ, mɛ gɔn yo pi. Nɛdedea nde, mɛ ale ha *tunɔ kpoo nɛ kɔ mana nɛ nanga ndang, pen nde, ɛ pi mɛ nɛ kɔ bwa mana nɛ nanga bwa ha we ka besisi kpoo.

⁹Nɛ ka gbali mɛ dak mɛ pi ha dea gdangamɔ, mɛ kɔti yo pi. Nɛdedea nde, mɛ ale ha tunɔ kpoo nɛ gbali ndang, pen nde, ɛ pi mɛ nɛ gbali bwa ha bhandi we ka bisi na.»

¹⁰«Pangay, ka ɛnɛ aba hio bebe wi ndɔng tuka tum wi na! Hazu mi tɔ ha ɛnɛ nde, hio *telenge pɛ mbwa ha ngɔn dung swe fɛt ha li Bafa mi ha zang ngɔn. [

¹¹Hazu mi, *Bewei pɛ Wi, tɛa tɛ kpasisi wi, ka yɔa.»]

¹²«Ɛnɛ takiri pɛ ɛnɛ nde ge? Ka ma wi nɛ sami pɛa gɔmmay ndang, nɛ ma ndang yɔamɔ, a lak oloa bhukɔa mɔrkɔ zu bhukɔa nar zanga mɔrkɔ gbala nar gde ha zu ngari, mɛ nɛ ha kio ɛngɛ ka yɔamɔ, na nde?

¹³Nɛ ka wɛnɛ kpaa yo, kpasawen mi tɔ ha ɛnɛ nde, a bede totɛ sami ɛngɛ pen oloa bhukɔa mɔrkɔ zu bhukɔa nar zanga mɔrkɔ gbala nar, ka tɛ yɔ mɔ na.

¹⁴Gbesi tuka ɛngi, Bafa ɛnɛ ha zang ngɔn ngoy nde, wi ndang ha soko bebe wi ndɔng ayɔ na.»

¹⁵«Ka ya mɛ dea gdangamɔ sungiri nɛ mɛ, mɛ nɛ, nɛ kpa wɛnɛ nɛ wuso, mɛ gbatɛ hinɛ wɛnɛ. Mɛ gbasi gdangamɔ pɛa ha wɛnɛ. Ka wɛnɛ zea mɛ, wɛnɛ tɛa fin ya mɛ nɛ mbinga.

¹⁶Ma, ka wɛnɛ ze mɛ na, mɛ sa ma wi ndang mana bwa hinɛ mɛ nɛnɛ fin ha pɛa. Tuka nde, wan-kɛwen adung bwa mana tar mɛ gɔn soko wen ɛngɛ, tuka Moïse bagɔn ha takarata pɛ Sɔ.

¹⁷Nɛ ka wɛnɛ ze mbwa na, mɛ tɔ yo ha hio wi mɔ eglize. Nɛ ka wɛnɛ ze mbwa na, mɛ ba wɛnɛ tuka *bhilo mana tuka wan-ndɛm mbɔli garama.»

¹⁸«Kpasawen, mi tɔ ha ɛnɛ nde, mɔ ka ɛnɛ bekafi nde, wi ade yo ha nu, Sɔ bekafi yo ha ngɔn. Nɛ mɔ ka ɛnɛ bemɛkiri nde, wi ade yo ha nu, Sɔ bemɛkiri yo ha ngɔn.»

¹⁹«Kpasawen, mi tɔ fin ha ɛnɛ nde, ka wi bwa ha soko ɛnɛ ha zu nu kpo zuwen mɛ gɔ ma mɔ ha kɔ Bafa mi ka dung ha zang ngɔn, wɛnɛ beha yo ha mbwa.

²⁰Hazu ha bhandi ka wi bwa mana tar wesara may ang nɛ ling mi, mi ang ha soko mbwa.»

²¹Hapata, Pierre tiko nɛ hapɛtɛ Jésus nɛ ani wɛnɛ: «*Kongawan, ka ma ya mi de gdangamɔ kpoo sungiri mi, mi ha tiso ha wɛnɛ ze ge? Zemɔrkɔ zanga bwa?»

²²Jésus kiforo wen ha wɛnɛ: «Dalo! Mi tɔ ha mɛ nde, zemɔrkɔ zanga bwa lɛm na. Ma, mɛ de mɛgi ze bhukɔa mɔrkɔ zu bhuze bwa, nɛ mɛ dɔksi dɔka ɛngɛ fin ze mɔrkɔ zanga bwa.

²³«Hazu wen ɛngɛ, *Kongakandɔ Ngɔn dung tuka ma *kongapora ka ngoy tɔl mɔ ka wɛnɛ gdea ha kɔ hio wan-tom pɛa.

²⁴Ka wɛnɛ angara tɔlamɔ, ɛ ba ma wan-yamando lafu mbɔli pumbang pumbang tɛnɛ ha wɛnɛ.

²⁵Nɛ wei ɛngɛ kpa mbɔli kpe yamando pɛa na. Mɛgi wan pɛa haa nu nde, ɛ agdongi wɛnɛ, ko pɛa, hio bem pɛa, nɛ hio mɔ pɛa fɛt hazu ku mbɔlia kpe nɛ yamando pɛa.

²⁶Mɛgi wan-tom ɛngɛ teka ha si wan pɛa, nɛ a lokatɛ ha wɛnɛ: ‹Wan pɔm, ba sila mɛ wa! Mi bekpe yo fɛt ha mɛ!›

²⁷Nɛ wan pɛa dea kobhe tɛ wa. A biso yamando pɛa fɛt, nɛ a laka wɛnɛ gde sɛɛ pen.

²⁸«Ka wan-tom ɛngɛ gboa, a kpaa ma sɔy-tom pɛa, ka gbakara bebe yamando ha kɔ wa. A tito gɛl wa nging nɛ tɔ ha wɛnɛ: ‹Kpe yamando pɔm!›

²⁹Sɔy-tom pɛa teka ha si wa nɛ ani wɛnɛ: ‹Ba sila mɛ, mi bekpe yo fɛt ha mɛ!›

³⁰Ma, a tɛ mɛkiri na. Nɛ a kuo sɔy-tom pɛa pi ha zɔbhɔ, kanɛ wɛnɛ kpea yamando fɛt.

³¹Ka hio olo sɔy-tom pɛa zɔka mɔ ɛngɛ, ngɔtɛ baa mbwa. Nɛ mbwa nɛa nɛ tɔ kasia fɛt ha wan pɛ mbwa.

³²Mɛgi wan pɛa saa wɛnɛ nɛ tɔ ha wɛnɛ: ‹Gdanga wan-tom! Mi biso yamando pɛ mɛ fɛt, hazu mɛ lokatɛ ha mi.

³³Mi dea kobhe tɛ mɛ. Mɛgi, mɛ lɛma mɛ de kobhe tɛ sɔy-tom pɛ mɛ, na nde?›

³⁴Wan pɛa dea ngambi nɛ pio wɛnɛ ha twa zɔbhɔ nde, ɛ andulsi wɛnɛ, kanɛ a kpea yamando pɛa fɛt.

³⁵«Bafa mi ha zang ngɔn bede nɛ ɛnɛ gbesi, ka ɛnɛ bisi *sɛmbɔ pɛ ya ɛnɛ nɛ sila ɛnɛ fɛt na.»