Read south west gbaya Matthieu 19 Bible Online

Matthieu 19 - south west gbaya bible

Matthieu 19

¹Ka Jésus karsa osa mɔ ndɔng, a guotɛ ha kandɔnu Galile nɛ ha bhalkɔ kandɔnu Judée ɛngɛ ka dung ha kuli Jourdain.

²Gasa zugiliwi nɛa ha pata wa. Nɛ wɛnɛ kpasasa hio wan-zɛlɛ.

³Hio ma *Farizien tiko nɛ ha pɛa hazu we sila wa, nɛ mbwa ana: «*Mbonga pɛ ɔ haa wal nde, wei ayangsi ko pɛa gele nde?»

⁴Nɛ wɛnɛ kiforo wen ha mbwa: «Ɛnɛ tɛ tɔl takarata pɛ Sɔ, na nde? Ɛ ngɛraka nde, ha kudom mɔ, Sɔ dea tili wi bwa, wei nɛ bhoko.

⁵Nɛ wɛnɛ tɔa nde, hazu ɛngi, wei belak bafa wa nɛ nana wa gde, nɛ wɛnɛ bedol tɛ ha ko pɛa. Nɛ mbwa bwa fɛt tɛ bo nê wi ndang sɔna.

⁶Mɛgi mbwa bo fin bwa na, ma, mbwa nê wi ndang sɔna. Mɔ ka Sɔ ndara ha may, yo nɛdedea nde, wi abhaki sokoa na.»

⁷Nɛ mbwa tɔa ha wɛnɛ: «Ka yo bo mɛgi, hazu ge Moïse haa nu nde, wei aha takarata yangsi may ha ko pɛa, sɔngsi yangsa wɛnɛ ge nde?»

⁸Jésus kiforo wen: «Moïse haa wal ha ɛnɛ mɛ yangsi hio ko pɛ ɛnɛ hazu sila ɛnɛ nɛ ngaya. Ma, ha kudom mɔ, mɔ tɛ dung tuka ɛngi na.

⁹Ma, mi tɔ ha ɛnɛ nde, ka ma wi yangsa ko pɛa ka tɛ de wanza na, nɛ wɛnɛ sio mbinga, a dea wanza.»

¹⁰Nɛ hio *wan-yambimɔ pɛa tɔa ha wɛnɛ: «Ka wen dung tuka ɛngɛ ha soko wei nɛ bhoko, nɛdedea nde, wei asi bhoko na.»

¹¹Jésus kiforo wen ha mbwa: «Wi fɛt lɛm ing goto wen ɛngɛ na, kanɛ ɛ ndɔng ka Sɔ haa mbwa mbaramɔ mɛ ing yo.

¹²Hio ma wi ang, ka si may na, hazu mbwa nê nakomba, angiri ha bhɛ pɛ mbwa. Nɛ hio ma wi ang, ka si may na, hazu ɛ gdɔka wal ha mbwa. Nɛ hio ma wi ang fin, ka si may na, hazu tom pɛ *Kongakandɔ Ngɔn. Wi ka lɛma mɛ ba osamɔ ɛngɛ, wɛnɛ amɛkiri yo.»

¹³Hapata, hio ma wi kuo hio bhobem tɛnɛ ha Jésus nde, wɛnɛ agde kɔ nɛ gɔ Sɔ ha zu mbwa. Ma, hio *wan-yambimɔ pɛa gaya wi ndɔng.

¹⁴Nɛ Jésus tɔa: «Ɛnɛ gde hio bhobem atɛ ha pɔm. Ka ɛnɛ adol mbwa na, hazu *Kongakandɔ Ngɔn nê pɛ hio wi ka dung tuka bhobem.»

¹⁵Nɛ ka wɛnɛ gdea kɔ ha zu mbwa, wɛnɛ pena haki.

¹⁶Ma wan-kpamɔ tɛa ha pɛ Jésus tɛ ani wɛnɛ: «Wan-osimɔ, mi ade nɛ nge dedemɔ hazu kpa *tunɔ kpoo ge nde?»

¹⁷Jésus kiforo wen ha wɛnɛ: «Mɛ ani mi hazu mɔ ka dung nɛ dedea hazu ge? Yo nê Sɔ ndang sɔna ka dung nɛdedea. Ka mɛ ngoya kpa tunɔ kpoo, dea nde, mɛ apam hio *mbonga pɛ Sɔ.»

¹⁸Nɛ wɛnɛ ana Jésus: «Nge mbonga ge nde?» Jésus kiforo wen: «Ka mɛ gbɛ wi na. Ka mɛ de wanza na. Ka mɛ zu mɔ na. Ka mɛ gɔn dalo gde ha nu ma wi na.

¹⁹Mɛ ba bafa mɛ nɛ nana mɛ nɛ zioa. Mɛ ngoy ma mɛ tuka tɛ mɛ.»

²⁰Pɔlɔmbɔ wei ɛngɛ tɔa ha wɛnɛ: «Mi pama mbonga ndɔng fɛt. Mi ade fin nɛ nge mɔ ge nde?»

²¹Jésus tɔa ha wɛnɛ: «Ka mɛ ngoy lɛm wɛɛ, mɛ nɛ, nɛ gdongi mɔ pɛ mɛ fɛt, mɛ kapini mbɔlia fɛt ha hio fabha wi. Mɛgi mɛ bekpa kpaamɔ ha zang ngɔn. Hapata mɛ tɛ tɛ ndari mi!»

²²Ka pɔlɔmbɔ wi ɛngɛ zea wen ndɔng, wɛnɛ sio nɛ ngɔtɛ hazu kpaamɔ pɛa nɛdɔka.

²³Mɛgi Jésus tɔa ha hio *wan-yambimɔ pɛa: «Kpasawen, mi tɔ ha ɛnɛ nde, yo nɛ ngaya hazu wan-kpamɔ mɛ tɛ wi mɔ *Kongakandɔ Ngɔn.

²⁴Nɛ mi tɔ fin ha ɛnɛ nde, yo nɛ ngaya nɛ toyfok mɛ pen ha lok ndɔ. Ma, yo nɛ ngaya fin pentɛ nɛ wan-kpamɔ mɛ le ha *Kongakandɔ pɛ Sɔ.»

²⁵Ka hio wan-yambimɔ zea mɛgi, mbwa yaksa pentɛ nɛ mbwa tɔa: «Ka bo mɛgi, o bekpasi o nde?»

²⁶Jésus gɛra mbwa gdoo, nɛ tɔa ha mbwa: «Mɔ ɛngɛ gana hio wi, ma, Sɔ lɛma de mɔ fɛt.»

²⁷Nɛ Pierre kiforo wen ha wɛnɛ: «Mɛ zɔk, ɔ laka mɔ fɛt gde, nɛ ɔ ndara mɛ. Ɔ bekpa nɛ nge mɔ ge?»

²⁸Nɛ Jésus tɔa ha mbwa: «Kpasawen, mi tɔ ha ɛnɛ nde, ha ngimɔ ka mi, *Bewei pɛ Wi, bedung *kongapora ha zu lɛkɛ-lɛkɛ solowan pɔm ha mbombe nzan, ɛnɛ fɛt bhukɔ gbala bwa ka ndara mi, ɛnɛ bedung ha zu solowan mɛ gɔn kita ha zu hio kandɔ pɛ *Israel bhukɔ gbala bwa.

²⁹Nɛ wi ndang ndang fɛt ka belak twa pɛa, hio ya wa, bafa wa, nana wa, hio bem, mana fɔ pɛa gde hazu mi, wɛnɛ bekpa mɔ ze gɔmmay ndang pen mɔ sɔngsi. Nɛ wɛnɛ bekpa tunɔ kpoo.

³⁰Ma, dɔka wi ka dung bosia bedung ha kpogio, nɛ dɔka wi ka dung ha kpogio bedung bosia.»