Read south west gbaya Matthieu 24 Bible Online

Matthieu 24 - south west gbaya bible

Matthieu 24

¹Jésus gboa ha gasa twa Sɔ, nɛ ka wɛnɛ ha pena, hio *wan-yambimɔ pɛa tiko tɛ hapɛtɛ wa mɛ osi ha wɛnɛ dede zɛng ka ɛ bɛa nɛ gasa twa Sɔ.

²A kiforo wen ha mbwa: «Ɛnɛ zɔka mɔ ndɔng fɛt nde? Kpasawen, mi tɔ ha ɛnɛ nde, hakɛ, ma ta ndang lɛm bhɔn ha zu ma ta na. Yo fɛt betukili mburr.»

³Ka Jésus dungɔnu ha zu ngari Olivier, hio *wan-yambimɔ pɛa tiko tɛ hapɛtɛ wa. Mbwa dungɔ gbatɛ hinɛ wɛnɛ, mɛgi mbwa ana wɛnɛ: «Mɛ tɔ ha ɔ, mɔ ndɔng behɔ ha nge ngimɔ ge nde? Nɛ nge mɔ begbasi nde, mɛ ha tɛa, nɛ nde, kpogio ngimɔ mɔ nzan ha hɔa, ge nde?»

⁴Nɛ Jésus kiforo wen ha mbwa: «Ɛnɛ pangay, ka ma wi aosili ɛnɛ na.

⁵Hazu dɔka wi betɛ nɛ ling mi, nɛ mbwa betɔ: ‹Mi nê *Mesi!› Nɛ mbwa beosili dɔka wi.

⁶Nɛ ɛnɛ beze wen bulo ka ɛ bi sanga-sanga mana nɛyɛa. Ka sila ɛnɛ abhunziki na. Hazu, lɛma ka nde, mɔ ndɔng ahɔ. Ma, yo tɛ bo ka nɛ kpogio ngimɔ na.

⁷Ma kandɔ begutɛ nɛ bulo sungiri nɛ ma mbinga. Nɛ ma *kongapora begutɛ nɛ bulo sungiri nɛ ma mbinga. Ha hio bhandi nɛtɛ-nɛtɛ ginga foto betek, nɛ nu beyak nɛngaya.

⁸Mɔ ndɔng fɛt bedung tuka bosi yimtɛ bio bhɛ.

⁹«Ha ngimɔ ɛngi, ɛ beba ɛnɛ mɛ yukiti nɛ mɛ gbɛ ɛnɛ. Hio kandɔ fɛt besɛn ɛnɛ hazu ɛnɛ mɛkara mi.

¹⁰Nɛ dɔka wi belak mɛkara Sɔ gde. Mbwa begde may ha kita, nɛ mbwa besɛn may.

¹¹Dɔka *wan-tɔkuliwen dalo behɔ nɛ mbwa beosili dɔka wi.

¹²Hazu dea gdangamɔ beyɛbhi pentɛ, hio dɔka wi lɛm ngoy may fin na.

¹³Ma, wi ka ba nɛ nɔa nging kanɛ kpogio ngimɔ, Sɔ bekpasisi wɛnɛ.

¹⁴Nɛ ɛ bebul *Dede Wen *Kongakandɔ pɛ Sɔ dam nzan fɛt tuka nde, hio wi mɔ hio kandɔ fɛt aze yo. Hapata, kpogio ngimɔ behɔ.»

¹⁵(Mɛ, ka mɛ tɔl wen ɛngɛ, mɛ ze gotoa nɛ kinɔng!) «Ma swe, tuka *wan-tɔkuliwen Daniel batɔ se, ɛ begde ‹gdanga mɔ nyɛl› ha nzɔy bhandi mɔ *gasa twa Sɔ.

¹⁶Ha ngimɔ ɛngi, hio wi ndɔng ka bedung ha kandɔnu Judée, dea nde, mbwa ayumɔ si ha zu ngari.

¹⁷Wi ka bedung ha li dɛl, ka wɛnɛ akifiri le ha zang twa mɛ ba ma toy pɛa fin na.

¹⁸Nɛ wi ka bedung ha fɔ, ka wɛnɛ akifiri fin si ha twa hazu ku gbambusa pɛa na.

¹⁹Oee, gasa mɔ ngɔtɛ ka bekpa hio nazang nɛ hio nanzɔ ha yala ndɔng wa!

²⁰Ɛnɛ gɔ Sɔ nde, ka mɔ ɛngi ahɔ ha ngimɔ kolo ndumbe mana ha *swe ɔmtɛ na.

²¹Hazu ha ngimɔ ɛngi, hio wi bekpa gasa yeksamɔ ka pena hio tili yeksamɔ fɛt. Angiri ha ngimɔ ka Sɔ bade nɛ nzan kanɛ sising nɛ kanɛ kpoo, ma yeksamɔ tuka ɛngi tɛ hɔ na.

²²Nɛ ka bo se nde, Sɔ atikisi ma nu yala yeksamɔ ndɔng na, ki ma wi ndang lɛm mɛ kpasi na. Ma, a tikoso yo hazu wi ndɔng ka wɛnɛ weka mɛ dung hinɛ wɛnɛ.

²³«Nɛ ha ngimɔ ɛngi, ka ma wi tɔ ha ɛnɛ: ‹Ɛnɛ zɔk, *Mesi hakɛ!› Nɛ ka ma tɔ ha ɛnɛ: ‹Zɔk wɛnɛ haki!›, ka ɛnɛ amɛkiri na.

²⁴Hazu hio wan-dalo ka tɔ nde, mbwa nê Mesi, nɛ hio wan-tɔkuliwen dalo behɔ. Nɛ mbwa bede gasa *mɔweka nɛ *mɔkifi, nɛ ka mbwa kpa wal, mbwa beosili nɛ hio wi ndɔng ka Sɔ weka.

²⁵Ɛnɛ ze! Mi tɔ yo ha ɛnɛ bingiri.

²⁶«Ka ɛ tɔ ha ɛnɛ: ‹Ɛnɛ zɔk, wɛnɛ ha kpɛnu!› ka ɛnɛ anɛ na. Nɛ ka ɛ tɔ fin: ‹Ɛnɛ zɔk, wɛnɛ ha wuso tɛ hakɛ!› ka ɛnɛ amɛkiri yo na.

²⁷Hazu mi, *Bewei pɛ Wi, betɛ gbesi tuka piolikolo ka baa ha liswe zikiri hɛrr.

²⁸Ha bhandi wɔl sari, hio nzio wesiri may ang.»

²⁹«Nɛhasa hapata yala yeksamɔ ndɔng, liswe betu, nɛ ze lɛm ba fin na. Hio sɔla ha ngɔn bebhil tek ha nu. Nɛ hio ziomɔ ngɔn beyak.

³⁰Ha ngimɔ ɛngi, ɛ bezɔk ma *mɔweka ha liswe, ka gbasi nde, mi, Bewei pɛ Wi ha tɛa. Nɛ hio kandɔ fɛt ha nu behe kwa. Mbwa bezɔk mi, Bewei pɛ Wi, ha tɛa ha zu buswe nɛ ziomɔ, nɛ gasa *lɛkɛ-lɛkɛmɔ.

³¹Mi betomsi hio *telenge pɔm nɛ kɛnza gɛl mbia, hazu nɛ ha ngbili nu nar. Mbwa bewesiri hio wi ka mi weka, ha bhandi mɔ nzan fɛt.»

³²«Lɛma nde, ɛnɛ ayambi ma mɔ nɛ wal towen hazu te fige. Ha ngimɔ ka hio gbakɔa tɛ bo nɛ mɔka nɛ ka hio waa tɛ bo ha gboa, ɛnɛ ingɔ nde, ngimɔ kolo koka kari.

³³Gbesi tuka ɛngi, ka ɛnɛ bezɔk mɔ ndɔng fɛt, ɛnɛ ing nde, mi, *Bewei pɛ Wi, tɛ bo sanga ha nutwa.

³⁴Mi tɔ kpasawen ha ɛnɛ nde, hio ma wi mɔ ngimɔ ɛngɛ lɛm fe na, sɔngsi mɔ ndɔng fɛt ahɔ.

³⁵Ngɔn nɛ nu bepen. Ma, hio wen pɔm lɛm pen ndang na.»

³⁶«Ma wi ndang ing yala nɛ ngimɔ ka mɔ ndɔng behɔ na. Ngase hio *telenge ha ngɔn, ngase mi, *Bewei pɛ Sɔ, kanɛ Bafa mi sɔna ha ing yo.

³⁷Hio mɔ ka bahɔ ha ngimɔ pɛ Noe, behɔ gbesi ha ngimɔ ka mi, *Bewei pɛ Wi, bekifiri.

³⁸Sɔngsi ka mbeng li tɛ hɔ na, hio wi ha yɔnga nɛ nɔa mɔ, mbwa dungɔ ha sio may, kanɛ swe ka Noe lea zang kuga.

³⁹Mbwa tɛ ing ma mɔ ndang na, kanɛ mbeng li hɔa tɛ kay mbwa fɛt pen nɛ. Mɔ behɔ gbesi tuka ɛngi ha ngimɔ ka mi, Bewei pɛ Wi betɛ.

⁴⁰Ha ngimɔ ɛngi, ha soko wi bwa ka bedung ha fɔ, ɛ beku ndang nɛ lak ndang gde.

⁴¹Ha soko bhoko bwa ka beto mɔ ha zang dok ndang, ɛ beku ndang nɛ lak ndang gde.

⁴²Mɛgi, ɛnɛ yang la, hazu ɛnɛ ing yala ka *Kongawan pɛ ɛnɛ betɛ nɛ na.

⁴³Ɛnɛ ze nɛdedea! Ka wan-twa ingɔ ngimɔ ka wanzu betɛ nɛ zɛ, ki a beyang la nɛ dol wanzu mɛ gba twa pɛa.

⁴⁴Hazu ɛngi, ɛnɛ fin, ɛnɛ dung gdungɛ-gdungɛ hazu mi, Bewei pɛ Wi, behɔ ha ngimɔ ka ɛnɛ takiri ang na.»

⁴⁵«Nge wan-tom ka dung nɛ mboazu nɛ ingɔmɔ ge nde? Yo nê wi kɛ ka wan pɛa begde wɛnɛ ha zu hio olo wan-tom pɛa, nɛ beha wɛnɛ tom mɛ kapini yɔngamɔ ha mbwa ha dede ngimɔ.

⁴⁶Totɛ ha wan-tom ɛngɛ ka wan pɛa bepe tɛ kpa wɛnɛ ha dea tom pɛa.

⁴⁷Kpasawen, mi tɔ ha ɛnɛ nde, a begde wan-tom ɛngɛ ha zu kpaamɔ pɛa fɛt.

⁴⁸Ma, ka bo nê gdanga wan-tom, a betakiri ha sila wa nde, wan pɛa lɛm tɛ nɛhasa na.

⁴⁹Nɛ wɛnɛ beangiri mɛla hio sɔy-tom pɛa, nɛ yɔng nɛ nɔ mɔ hinɛ hio wan-nguru dɔkɔ.

⁵⁰Mɛgi, wan pɛa ka behɔ ngboto nɛ ngbuma,

⁵¹bendulsi wɛnɛ nɛ nyalɔ, nɛ bepi wɛnɛ ha bhandi pɛ hio wan-dambari. Haki a behe kwa nɛ a beyɔng nzata.»