Read south west gbaya Matthieu 25 Bible Online

Matthieu 25 - south west gbaya bible

Matthieu 25

¹«Hɔa pɛ *Kongakandɔ Ngɔn bedung tuka towen ɛngɛ. Hio pɔlɔmbɔ bhoko bhukɔ kuo lamba pɛ mbwa, nɛ gboa hazu nɛ ha kpaa wan-sibhoko.

²Mɔrkɔ ha soko mbwa nɛ yera, mɔrkɔ nɛ zɔma.

³Hio yeraa dungɔ sɔna nɛ li lamba, ka dung ha zanga.

⁴Ma, hio zɔmaa kuo fin ma li lamba gde hapɛtɛa nɛnɛ.

⁵Ka wan-sibhoko tɛ hɔ nɛhasa na, mbwa fɛt zungbo nɛ ɔala.

⁶«Ha binsila zɛ, ɛ zea gɛl wi ka gdɔra: ‹Ɛnɛ zɔk! Wan-sibhoko ha tɛa. Ɛnɛ nɛ, nɛ we si wa!›

⁷Mɛgi pɔlɔmbɔ bhoko ndɔng fɛt guotɛ bhɔngiri lamba pɛ mbwa.

⁸Hio yeraa tɔa ha hio zɔmaa: ‹Ɛnɛ ha ma li lamba ha ɔ, hazu pɛ ɔ ha bisoa.›

⁹Hio zɔmaa kiforo wen: ‹Way, yo lɛm hazu ɔ hinɛ ɛnɛ na. Ɛnɛ nɛ ha pɛ hio wan-gdongi mɔ, nɛ hɛ pɛ ɛnɛ.›

¹⁰Ma, ha ngimɔ ka mbwa nɛa ha hɛa li lamba, wan-sibhoko hɔa. Hio bhoko ka dungɔ gdungɛ-gdungɛ, lea twa yenga sibhoko hinɛ wɛnɛ, nɛ ɛ gdɔka nutwa nɛ sɔtɛ.

¹¹«Hapata, hio yera bhoko kiforo tɛ, tɛ gdɔri ha nutwa: ‹*Kongawan, Kongawan, gbosisi nutwa ha ɔ wa!›

¹²Ma, a kiforo wen: ‹Kpasawen, mi tɔ ha ɛnɛ nde, mi ing ɛnɛ na.›

¹³«Mɛgi ɛnɛ dung nɛ zɔma. Hazu ɛnɛ ing yala nɛ ngonga ka mi, *Bewei pɛ Wi betɛ nɛ na.»

¹⁴«*Kongakandɔ Ngɔn dung fin tuka towen ɛngɛ. Ma wi, ka ngoya nɛa gɛnɛ, saa hio wan-tom pɛa, nɛ gdea hio mɔ pɛa fɛt ha kɔ mbwa.

¹⁵Wɛnɛ haa mbɔli ha wan-tom ndang ndang fɛt lɛm nɛ zɛng pɛ mbwa. Ma wan-tom kpaa lafu mbɔli mɔrkɔ, ma lafu mbɔli bwa, nɛ ma lafu mbɔli ndang. Nɛ wɛnɛ pena.

¹⁶Wi ka kpaa lafu mbɔli mɔrkɔ nɛa nɛ de tonga nɛ yo. Nɛ wɛnɛ kpaa ma mbinga mɔrkɔ gde ha zua.

¹⁷Wi ka kpaa lafu mbɔli bwa dea gbesi, nɛ wɛnɛ kpaa lafu mbɔli bwa gde ha zua.

¹⁸Ma, wi ka kpaa lafu mbɔli ndang, nɛa nɛ zaa nu wusi mbɔli pɛ wan pɛa ang.

¹⁹«Ka yala pena nɛdɔka, wan pɛ mbwa kiforo, nɛ wɛnɛ angara tɔla mɔ ka wɛnɛ gdea ha kɔ mbwa.

²⁰Wi, ka kpaa lafu mbɔli mɔrkɔ, hɔa nɛ osa fin mbinga mɔrkɔ, nɛ tɔa: ‹Wan pɔm, mɛ baha mi lafu mbɔli mɔrkɔ. Mɛ zɔk, mi kpaa fin ma mɔrkɔ gde ha zua.›

²¹Wan pɛa tɔa ha wɛnɛ: ‹Nɛ dedea gdang, mɛ nê dede wan-tom nɛ mboazu. Mɛ dungɔ nɛ mboazu ha zu bebe mɔ, mɛgi mi begde mɛ ha zu dɔka mɔ. Mɛ tɛ, tɛ de totɛ hinɛ mi.›

²²Nɛ wi ka kpaa lafu mbɔli bwa, hɔa fin, nɛ tɔa: ‹Wan pɔm, mɛ baha mi lafu mbɔli bwa. Mɛ zɔk, mi kpaa fin ma bwa gde ha zua.›

²³Wan pɛa tɔa ha wɛnɛ: ‹Nɛ dedea gdang, mɛ nê dede wan-tom nɛ mboazu. Mɛ dungɔ nɛ mboazu ha zu bebe mɔ, mɛgi mi begde mɛ ha zu dɔka mɔ. Mɛ tɛ, tɛ de totɛ hinɛ mi.›

²⁴Nɛ fin, wi ka kpaa lafu mbɔli ndang, hɔa nɛ tɔa: ‹Wan pɔm, mi ingɔ nde, mɛ nɛ ngaya. Mɛ bhi kpalmɔ ha bhandi ka mɛ tɛ pɛ ang na. Nɛ mɛ wesiri kpalmɔ ha bhandi, ka mɛ tɛ pɛfi ang na.

²⁵Mɛgi mi yuo ke nɛ wuso mbɔli pɛ mɛ ha si nu. Mɛ zɔk, mɔ pɛ mɛ ga.›

²⁶Ma, wan pɛa kiforo wen ha wɛnɛ: ‹Gdanga pɔsa wan-tom! Mɛ ingɔ nde, mi bhi kpalmɔ ha bhandi ka mi tɛ pɛ ang na, nɛ mi wesiri kpalmɔ ha bhandi ka mi tɛ pɛfi ang na.

²⁷Mɛgi, mɛ lɛma gde mbɔli pɔm ha kɔ hio wan-pam mbɔli nde, ha pea, mi akpa mɔ pɔm nɛ ma ganga ha zua.

²⁸Ɛnɛ ku lafu mbɔli ɛngɛ ha kɔ wa yunɛ, nɛ ɛnɛ ha yo ha wi ka kpaa lafu mbɔli bhukɔ.

²⁹Hazu ka ma wi nɛ mɔ ha kɔ wa, ɛ begde ma ha zua. Nɛ wɛnɛ bedung ha zang yɛbhɛ-yɛbhɛ kpaamɔ. Ma, wi ka bo nɛ mɔ ha kɔ wa na, ɛ bezin ngase bebe mɔ ka dung ha kɔ wa yunɛ.

³⁰Ɛnɛ ba gdanga pɔsa wan-tom ɛngɛ pi ha dɛl ha zang ngɛ-ngɛ-ngɛ tutum. Haki a behe kwa nɛ a beyɔng nzata.›»

³¹«Ha ngimɔ ka mi, *Bewei pɛ wi, betɛ hinɛ hio nzɔy *telenge ha zang *lɛkɛ-lɛkɛmɔ pɔm, mi bedung ha zu lɛkɛ-lɛkɛ solowan pɔm.

³²Nɛ hio kandɔ fɛt bewesiri may ha si mi, nɛ mi bekɛtini soko mbwa gbesi tuka zaoro kɛtini nɛ soko sami nɛ gbele mbori.

³³Mi begde hio sami ha wekɔ mi, nɛ hio gbele mbori ha gare mi.

³⁴Nɛ mi, *Kongawan, betɔ ha wi ndɔng ha wekɔ mi: ‹Sɔ, Bafa mi, wola dede wen ha zu ɛnɛ. Mɛgi ɛnɛ tɛ tɛ kpa dede mɔ pɛ *Kongakandɔ pɛ Sɔ, ka wɛnɛ bhɔngara bingiri hazu ɛnɛ ha ngimɔ ka wɛnɛ dea nɛ nzan.

³⁵Hazu wɔ dea mi, nɛ ɛnɛ haa mi yɔngamɔ. Wɔ li dea mi, nɛ ɛnɛ haa mi li mɛ nɔ. Mi dungɔ gɔn-gɛnɛ wi, nɛ ɛnɛ baa mi nɛ dede kɔ.

³⁶Mi dungɔ nɛ sɔngɛrɛ, nɛ ɛnɛ yola la ha tɛ mi. Mi dungɔ nɛ zɛlɛ, nɛ ɛnɛ tɛa tɛ pam mi. Mi dungɔ ha twa zɔbhɔ, nɛ ɛnɛ tɛa tɛ zɔk mi.›

³⁷Mɛgi hio *nzeng wi bekifiri wen ha mi: ‹Kongawan, ɔ zɔka mɛ nɛ wɔ, nɛ ɔ ha mɛ yɔngamɔ ha nge ngimɔ ge nde? Mana nɛ wɔ li, nɛ ɔ haa mɛ li mɛ nɔ ha nge ngimɔ ge nde?

³⁸Nɛ, ɔ zɔka mɛ tuka gɔn-gɛnɛ wi, nɛ ɔ baa mɛ nɛ dede kɔ ha nge swe ge nde? Ɔ zɔka mɛ nɛ sɔngɛrɛ, nɛ ɔ yola la ha tɛ mɛ ha nge swe ge nde?

³⁹Ɔ zɔka mɛ nɛ zɛlɛ mana ha twa zɔbhɔ, nɛ ɔ nɛa ha pɛ mɛ ha nge swe ge nde?›

⁴⁰Nɛ mi betɔ ha mbwa: ‹Kpasawen, mi tɔ ha ɛnɛ nde, mɔ fɛt ka ɛnɛ dea ha tɛ ma ndang ha soko hio bebe ya mi ndɔng, ɛnɛ dea yo ha tɛ mi.›

⁴¹«Hapata, mi betɔ ha wi ndɔng ha gare mi: ‹Sɔ foma ɛnɛ. Mɛgi ɛnɛ pen hapɛtɛ mi le ha we ka beysi kpoo, ka Sɔ lɛa hazu *Satan hinɛ hio wan-tom pɛa.

⁴²Hazu wɔ dea mi, nɛ ɛnɛ tɛ ha mi yɔngamɔ na. Wɔ li dea mi, nɛ ɛnɛ tɛ ha mi li mɛ nɔ na.

⁴³Mi dungɔ gɔn-gɛnɛ wi, nɛ ɛnɛ tɛ ba mi nɛ dede kɔ na. Mi dungɔ nɛ sɔngɛrɛ, nɛ ɛnɛ tɛ yol la ha tɛ mi na. Mi dungɔ nɛ zɛlɛ nɛ ha twa zɔbhɔ, nɛ ɛnɛ tɛ tɛ zɔk mi na.›

⁴⁴Nɛ mbwa fin bekifiri wen ha mi: ‹Kongawan, ha nge swe ɔ zɔka mɛ nɛ wɔ, mana nɛ wɔ li, mana tuka gɔn-gɛnɛ wi, mana nɛ sɔngɛrɛ, mana nɛ zɛlɛ, mana ha twa zɔbhɔ, nɛ ɔ tɛ gbakiri mɛ na, ge nde?›

⁴⁵Mɛgi, mi, Kongawan, bekifiri wen ha mbwa: ‹Kpasawen mi tɔ ha ɛnɛ nde, mɔ fɛt ka ɛnɛ tɛ de ha tɛ ma wi ndang ha soko hio bebe ya mi ndɔng na, ɛnɛ tɛ de yo fin ha tɛ mi na.›

⁴⁶Nɛ wi ndɔng benɛ ha bhandi ndulsi mɔ kpoo. Ma, hio nzeng wi benɛ ha bhandi *tunɔ kpoo.»