Read south west gbaya Matthieu 26 Bible Online

Matthieu 26 - south west gbaya bible

Matthieu 26

¹Ka Jésus karsa osamɔ ndɔng fɛt, a tɔa ha hio *wan-yambimɔ pɛa:

²«Ɛnɛ ingɔ nde, ha zang yala bwa, yenga *Pake behɔ. Ha ngimɔ ɛngi, ɛ begde mi, *Bewei pɛ Wi, ha kɔ hio wi hazu ngba mi ha getakate.»

³Mɛgi hio gasa wan-hasadaka nɛ hio kotowi mɔ kandɔ *zuife wesara may ha zang lɛkɛ-lɛkɛ twa pɛ Kaife, *wan-zu hio wan-hasadaka.

⁴Nɛ mbwa kpoa zuwen hazu ba Jésus nɛ likisi mɛ gbɛ wɛnɛ.

⁵Ma, mbwa tɔa ha may: «Ka ɔ aba wɛnɛ ha ngimɔ yenga na, yu nde, hio wi mɛ le betɛ gutɛ sungiri ɔ.»

⁶Jésus dungɔ ha Betani ha twa pɛ Simon ka dungɔ se nɛ zɛlɛ doko.

⁷Ma bhoko tiko tɛ hapɛtɛ Jésus nɛ ma bebe dak ha kɔ wa. Ɛ sɛka dak ɛngɛ nɛ ma ta ka ɛ sa nde, albatre, nɛ ma nga gɛnɛ kulo pɛl kpasa liyama don ha zanga. Wɛnɛ tɛla liyama ha sila zu Jésus ha yɔngamɔ.

⁸Ma, ka hio *wan-yambimɔ zɔka ɛngi, sila mbwa yimɔ nɛ mbwa tɔa: «Goto gdangsa mɔ ɛngɛ nɛ ge?

⁹Ki ɛ gdonga liyama ɛngɛ nɛ nga gɛnɛ, nɛ ha mbɔlia ha hio fabha wi!»

¹⁰Jésus ingɔ wen pɛ mbwa nɛ wɛnɛ tɔa: «Ɛnɛ yeksi bhoko ɛngɛ hazu ge? Mɔ ka wɛnɛ dea ha tɛ mi, yo nê dedea.

¹¹Hazu hio fabha wi dung hinɛ ɛnɛ kpoo. Ma, mi dung ha soko ɛnɛ kpoo na.

¹²A tɛla liyama ɛngɛ ha tɛ mi bingiri hazu bhɔngiri nɛ ngimɔ gun mi.

¹³Kpasawen, mi tɔ ha ɛnɛ: Ha bhandi fɛt ka ɛ bebul *Dede Wen ang, dam nzan fɛt, ɛ betɔ kasi mɔ ka bhoko ɛngɛ dea, tuka nde, tazu hio wi agba nɛ wɛnɛ.»

¹⁴Hapata, ma ndang ha soko *wan-nɛtom bhukɔ gbala bwa, ling wa nde Judas Iskariote, nɛa ha pɛ hio gasa wan-hasadaka,

¹⁵nɛ a tɔa ha mbwa: «Ɛnɛ beha ge ha mi, ka mi agde Jésus ha kɔ ɛnɛ ge?» Nɛ mbwa haa wɛnɛ hio mbɔli mɔ bubolo bhukɔa tar.

¹⁶Angiri ha ngimɔ ɛngi, Judas dungɔ ha kio dede ngimɔ mɛ gde Jésus ha kɔ mbwa.

¹⁷Ha bosi yala yenga mampa ka ha na, hio wan-yambimɔ tɛa tɛ ani Jésus: «Mɛ ngoya nde, ɔ agi yɔngamɔ mɔ yenga Pake ha mɛ ha ndo nde?»

¹⁸A osa ling ma wei ha mbwa nɛ tɔa: «Ɛnɛ nɛ ha gasa le ha pɛ wei kɛ nɛ tɔ ha wɛnɛ nde, wan-osimɔ tɔa: ‹Ngimɔ pɔm koka kari, nɛ mi ngoy mɛ yɔng mɔ yenga Pake hinɛ hio wan-yambimɔ pɔm ha bhandi pɛ mɛ.›»

¹⁹Nɛ hio wan-yambimɔ dea mɔ tuka Jésus haa nua ha mbwa. Nɛ mbwa gio yɔngamɔ mɔ yenga Pake.

²⁰Nɛ ka mbolo dea, Jésus dungɔ ha tabolo hinɛ mbwa bhukɔ gbala bwa.

²¹Ka mbwa boka ha yɔngamɔ, wɛnɛ tɔa: «Kpasawen, mi tɔ ha ɛnɛ nde, wi ndang ha soko ɛnɛ beha kasatɛ mi.»

²²Nɛ ngɔtɛ baa mbwa pentɛ, nɛ mbwa ndang ndang fɛt ana wɛnɛ: «Yo nê mi nde, *Kongawan?»

²³Ma, Jésus kiforo wen: «Yo nê ma wi ka pio kɔ wa ha ndangtɛ zang tasi hinɛ mi, ka beha kasatɛ mi.

²⁴Mi, *Bewei pɛ Wi, befe gbesi tuka ɛ ngɛraka ha zang takarata pɛ Sɔ. Ma, ngɔtɛ ha wan-hakasatɛ Bewei pɛ Wi. Ɛ abhɛ se wɛnɛ na, ki dea se!»

²⁵Judas wan-hakasatɛ wa, ana mɔ: «Yo nê mi nde, wan-osimɔ?» Jésus kɔa: «Ey, mɛ tɔa yo nɛ pɛ mɛ tɛ.»

²⁶Ka mbwa boka ha yɔngamɔ, Jésus baa mampa. Wɛnɛ wola dede wen ha zua, nɛ a gbinɔ yo ha hio wan-yambimɔ pɛa nɛ tɔa: «Ɛnɛ ku yo yɔng, ɛngɛ nê tɛ mi.»

²⁷Hapata, a baa kɔpɔ li vigne. A lukoso Sɔ hazua, nɛ a haa yo ha mbwa nɛ tɔa: «Ɛnɛ fɛt anɔ yo.

²⁸Hazu ɛngɛ nê tɔktɛ mi, ka dung nê nɔa *mbon ha soko hio wi nɛ Sɔ. Yo besɛ hazu bisi *sɛmbɔ pɛ dɔka wi.

²⁹Mi tɔ ha ɛnɛ nde, mi lɛm nɔ li vigne fin na, kanɛ swe ka mi benɔ mbombea hinɛ ɛnɛ ha ngimɔ ka Kongakandɔ pɛ Bafa mi behɔ.»

³⁰Nɛ ka mbwa bea hio *gima pɛ David mɔ yenga *Pake kari, mbwa nɛa ha zu ngari Olivier.

³¹Hapata Jésus tɔa ha hio *wan-yambimɔ pɛa: «Ha zɛ ɛngɛ, ɛnɛ fɛt belak mi gde, hazu Sɔ tɔa ha zang takarata pɛa: ‹Mi begbɛ zaoro sami nɛ zugili sami bepanziki.›

³²Ma, ka Sɔ tunso mi ha soko hio fiowi kari, mi bepen ha Galile sɔngsi nɛ ɛnɛ.»

³³Pierre kafa ha nu wa nɛ tɔa: «Ngase ka hio wi fɛt belak mɛ gde, pɔm, mi lɛm lak mɛ gde ndang na!»

³⁴Jésus kiforo wen ha wɛnɛ: «Kpasawen, mi tɔ ha mɛ nde, ha zɛ ɛngɛ, sɔngsi dɔma gɔlɛ, mɛ bekafi mi zetar.»

³⁵Nɛ Pierre tɔa ha wɛnɛ: «Ngase yo adung nde, mi afe hinɛ mɛ, mi lɛm mɛ kafi mɛ na.» Mɛgi, hio olo wan-yambimɔ fɛt tɔa ndangtɛ wen fin gbesi.

³⁶Hapata, Jésus hinɛ hio *wan-yambimɔ pɛa hɔa ha ma nu fɔ ka ɛ sa nde Getsemani. Nɛ Jésus tɔa ha mbwa: «Ɛnɛ dung hakɛ ha ngimɔ ka mi ha nɛa haki hazu gɔa Sɔ.»

³⁷Nɛ a kuo Pierre nɛ hio bewei pɛ Zebede bwa nɛnɛ. Nɛ wɛnɛ angara dea ngɔtɛ nɛ ke.

³⁸Mɛgi a tɔa ha mbwa: «Sila mi dona nɛ ngɔtɛ tuka nde mi befe fe. Ɛnɛ dung hakɛ nɛ yang la hinɛ mi.»

³⁹Nɛ wɛnɛ tiko nɛ ha sɔngsi tikiring. Haki a teka gok li wa ha nu, nɛ a gɔa Sɔ: «Bafa mi, ka lɛma, mɛ yɛsisi kɔpɔ ngamɔ ɛngɛ nɛ mi. Ma, bo tuka mi ngoya na, ma, tuka mɛ ngoya.»

⁴⁰Nɛ a kiforo tɛ ha pɛ hio wan-yambimɔ. Ka wɛnɛ kpaa mbwa ha ɔala, a tɔa ha Pierre: «Ɛnɛ tɛ kpa ngatɛ mɛ yang la hinɛ mi ngonga ndang sɔna na?

⁴¹Ɛnɛ yang la nɛ gɔ Sɔ tuka nde, *sɛbhalamɔ agan zu ɛnɛ na. Sila wi nɛ hɛl mɛ de mɔ, ma, ngatɛ pɛ wi dɔk na.»

⁴²Ha zebwaa fin, a nɛa nɛyɛa tikiring nɛ gɔa Sɔ: «Bafa mi, ka lɛma nde, mi anɔ kɔpɔ ɛngɛ hazu mɛ lɛm mɛ yɛsisi yo nɛ mi na, ki mɔ ahɔ tuka mɛ ngoya.»

⁴³Nɛ wɛnɛ kiforo fin tɛ kpa mbwa ha ɔala, hazu li mbwa dungɔ nɛ la lɔp-lɔp.

⁴⁴Mɛgi a laka mbwa gde, nɛ nɛyɛa tikiring fin. Nɛ a gɔa Sɔ ha zetara nɛ ndangtɛ wen.

⁴⁵Hapata, a kiforo tɛ ha pɛ hio wan-yambimɔ, nɛ a tɔa ha mbwa: «Ɛnɛ boka ha ɔala nɛ ɔmatɛ nde? Ɛnɛ zɔk, ngimɔ hɛra kari ka ɛ begde mi, *Bewei pɛ Wi, ha kɔ hio *wan-de gdangamɔ.

⁴⁶Ɛnɛ gutɛ, ɔ nɛ! Ɛnɛ zɔk, wan-hakasatɛ mi hɔa kari.»

⁴⁷Nɛ ka Jésus boka ha wolamɔ, Judas, ma ndang ha soko *wan-yambimɔ bhukɔ gbala bwa, hɔa hinɛ hio giliwi ha pata wa. Mbwa dungɔ nɛ hio gbapa nɛ mbiti te ha kɔ mbwa. Yo nê hio gasa wan-hasadaka nɛ hio kotowi pɛ hio *zuife ka tomsa wi ndɔng.

⁴⁸Judas, wan-hakasatɛ Jésus, baosi ha mbwa wal mɛ ing wɛnɛ sɔngsi, a batɔ: «Wi ka mi beduy mbuku wa, yo nê Jésus. Ɛnɛ ba wɛnɛ!»

⁴⁹Mɛgi Judas tiko nɛhasa tɛ ha pɛ Jésus nɛ tɔa: «Wolmɔe, wan-osimɔ!» Nɛ a duyo mbuku wa.

⁵⁰Jésus tɔa ha wɛnɛ: «Dan mi, mɛ de mɔ, ka mɛ tɛa ha dea!» Nɛ hio wi ndɔng tiko tɛ, tɛ bhubhili Jésus nɛ baa wɛnɛ.

⁵¹Ma ndang ha soko wi ndɔng ka dung hinɛ Jésus, daka gbapa sungiri nɛ wan-tom pɛ *wan-zu hio wan-hasadaka nɛ gɔna zala wa pi ha nu.

⁵²Mɛgi Jésus tɔa ha wɛnɛ: «Mɛ pi gbapa pɛ mɛ ha bhandia! Hazu wi fɛt ka ba gbapa, bebhondi nɛ wal gbapa.

⁵³Mi lɛma sa Bafa mi, nɛ wɛnɛ betomsi nɛhasa zugili *telenge pen bhukɔ gbala bwa hazu gbakiri mi. Mɛ ingɔ yo nde?

⁵⁴Ma, ka Sɔ de mɛgi, ki takarata pɛ Sɔ ka tɔa nde, mɔ behɔ mɛgi, belɛmsiri tɛ mɛng?»

⁵⁵Nɛ Jésus tɔa ha giliwi: «Mi nê nagbɛwi mɛ tɔ nde, ɛnɛ atɛ nɛ gbapa nɛ mbiti te mɛ ba nɛ mi nde? Mi dungɔ ha soko ɛnɛ yala ndang ndang fɛt ha osamɔ ha zang *gasa twa Sɔ, nɛ ɛnɛ tɛ ba mi na.

⁵⁶Ma, yo fɛt hɔa mɛgi, tuka nde, mɔ ka hio *wan-tɔkuliwen bangɛriki ha zang takarata pɛ Sɔ alɛmsiri tɛ.» Mɛgi, hio wan-yambimɔ fɛt yuo mɔ pen lak Jésus gde.

⁵⁷Hio wan-ba Jésus kuo wɛnɛ nɛnɛ ha pɛ Kaife, *wan-zu hio wan-hasadaka. Haki hio *wan-osi mbonga nɛ hio kotowi wesara may ang.

⁵⁸Pierre dungɔ nɛyɛa nak nɛ pata wa nɛnɛ, kanɛ lɛkɛ-lɛkɛ twa pɛ wan-zu hio wan-hasadaka. A lea zang dɛl nɛ dungɔnu ha soko hio wan-tom, hazu zɔk mɔ ka behɔ.

⁵⁹Hio gasa wan-hasadaka nɛ hio olo wan-kpo zuwen fɛt kio ma wen dalo sungiri nɛ Jésus, hazu kpa wal mɛ gbɛ wɛnɛ.

⁶⁰Ma, ngase dɔka hio wan-gɔn wen dalo wesara may, mbwa tɛ kpa ma wen ndang mɛ gɔn sungiri nɛ Jésus na. Ha kpogio, hio wan-gɔn wen dalo bwa hɔa,

⁶¹nɛ mbwa tɔa: «Wi kɛ tɔa: ‹Mi lɛma yangili *gasa twa Sɔ fɛt, nɛ mi bebɛ yo fin fɛt ha zang yala tar.›»

⁶²Wan-zu hio wan-hasadaka guotɛ nɛ tɔa ha Jésus: «Mɛ bo nɛ ma wen mɛ kifiri hazu mɔ ka mbwa tɔ sungiri nɛ mɛ na nde?»

⁶³Ma, Jésus dungɔ sɛm. Mɛgi wan-zu hio wan-hasadaka tɔa ha wɛnɛ: «Mi ani mɛ nɛ ling tunɔ Sɔ, mɛ tɔ ha ɔ ka mɛ nê *Mesi, *Bewei pɛ Sɔ.»

⁶⁴Jésus kiforo wen ha wɛnɛ: «Ey, mɛ tɔa yo. Mi tɔ ha ɛnɛ fin nde, ɛnɛ bezɔk mi, *Bewei pɛ Wi, ha dungɔnu ha wekɔ Sɔ ka dung nɛ ngatɛ fɛt. Nɛ ɛnɛ bezɔk mi bin ha ngimɔ ka mi betɛ ha zu buswe.»

⁶⁵Mɛgi ngambi dea wan-zu hio wan-hasadaka nɛ wɛnɛ gba latɛ pɛa nɛ pɛa tɛ. Nɛ wɛnɛ tɔa: «Wɛnɛ fɛngsa Sɔ! Ɔ lɛm ki ma wan-kɛwen fin na! Ɛnɛ zea fɛngsamɔ ka wɛnɛ fɛngsa nɛ Sɔ!

⁶⁶Ɛnɛ takiri pɛ ɛnɛ nde ge?» Mbwa kiforo wen: «Wɛnɛ lɛma nɛ fio!»

⁶⁷Hapata mbwa pɛa tafu ha zang li wa, nɛ mbwa sɔma wɛnɛ. Nɛ hio ma mɛla li wa kpaya,

⁶⁸nɛ tɔa: «Mɛ tɔ nde, mɛ nê Mesi, mɛgi mɛ sum ling wi ka mɛla mɛ!»

⁶⁹Ha ngimɔ ɛngi, Pierre dungɔnu ha zang dɛl. Ma bhoko-de tom pɛ *wan-zu hio wan-hasadaka tiko tɛ ha pɛa, nɛ tɔa ha wɛnɛ: «Mɛ fin, mɛ dungɔ se hinɛ Jésus, wi mɛ Galile.»

⁷⁰Ma, a kafa ha li wi fɛt nɛ tɔa: «Mi ing gotowen ka mɛ ha tɔa na.»

⁷¹Nɛ a nɛa ha nu kin. Ma mbing bhoko-de tom zɔka wɛnɛ, nɛ a tɔa ha hio wi haki: «Wei kɛ dungɔ hinɛ Jésus, wi mɛ Nazaret.»

⁷²Nɛ Pierre kafa fin nɛ kanamɔ: «Mi ing wi ɛngɛ na.»

⁷³Hapata ngimɔ tikiring, hio wi haki tiko tɛ, tɛ tɔ ha Pierre: «Kpasawen, mɛ nê ma ha soko mbwa, wal wolamɔ pɛ mɛ gbasa nde, mɛ nê wi mɔ Galile.»

⁷⁴Mɛgi Pierre angara foma mɔ nɛ kana mɔ, a tɔa: «Mi ing wi ɛngɛ na!» Nɛ ha ndangtɛ ngimɔ, gɔlɛ dɔma.

⁷⁵Nɛ tazu Pierre gbaa nɛ wen ka Jésus tɔa se ha wɛnɛ: «Mɛ bekafi mi zetar ing, ki gɔlɛ tɛ dɔm.» Nɛ wɛnɛ gboa nɛ a hea kwa pentɛ.