Read south west gbaya Matthieu 27 Bible Online

Matthieu 27 - south west gbaya bible

Matthieu 27

¹Nɛ sutole sut, hio gasa wan-hasadaka nɛ hio kotowi mɔ kandɔ *zuife kpoa zuwen mɛ gbɛ Jésus.

²Mbwa sanga wɛnɛ, nɛ mbwa baa wɛnɛ nɛnɛ ha pɛ gɔfɔrma Ponse Pilate. Nɛ mbwa gdea wɛnɛ ha kɔ wa.

³Ka Judas, wan-hakasatɛ Jésus, zɔka nde, ɛ gɔna kita fio ha zu Jésus kari, wɛnɛ dea ngɔtɛ hazua. Mɛgi a kiforo hio mbɔli mɔ bubolo ndɔng bhukɔa tar ha hio gasa wan-hasadaka nɛ hio kotowi,

⁴nɛ tɔa: «Mi dea gdangamɔ, ka mi gdea wan-ngabhala nu ha fio.» Ma, mbwa kiforo wen ha wɛnɛ: «Ɛngɛ zɔk ɔ na. Yo nê wen pɛ mɛ.»

⁵Nɛ a gɔsa mbɔli ndɔng ha nu *gasa twa Sɔ warr. Hapata, wɛnɛ nɛa gɛsi tɛ wa ha pɛl.

⁶Hio gasa wan-hasadaka kaya mbɔlia nɛ mbwa tɔa: «*Mbonga gdɔki wal ha ɔ mɛ gde mbɔli ndɔng ha zang kubha mbɔli mɔ gasa twa Sɔ, hazu yo nê mbɔli tɔktɛ wi.»

⁷Mbwa kpoa zuwen nɛ kuo mbɔli ndɔng hɛ nɛ fɔ pɛ wan-bhu kpana, hazu gun hio gɔn-gɛnɛ wi ang.

⁸Hazu ɛngi, ɛ sa ling fɔ ɛngɛ nde, «Fɔ tɔk», gbo swe mɛsɛ.

⁹Mɛgi, wen pɛ *wan-tɔkuliwen Jérémie lɛmsara tɛ: «Hio wi mɔ kandɔ *Israel weka gɛnɛ tɛ wa nɛ mbɔli mɔ bubolo bhukɔa tar. Mbwa kuo mbɔli ndɔng,

¹⁰hɛ nɛ fɔ pɛ wan-bhu kpana, gbesi tuka *Kongawan Sɔ osa ha mi.»

¹¹Jésus yola ha li gɔfɔrma Pilate, ka ana wɛnɛ: «Mɛ nê *kongapora pɛ hio *zuife nde?» Jésus kiforo wen: «Yo nê mɛ ka tɔ yo.»

¹²Ka hio gasa wan-hasadaka nɛ hio kotowi ha fundo wɛnɛ, a kifiri wen ndang na.

¹³Mɛgi Pilate ana wɛnɛ: «Mɛ ze hio dɔka wen ndɔng ka mbwa ha tɔa sungiri nɛ mɛ, na nde?»

¹⁴Ma, Jésus tɛ kifiri wen ha wɛnɛ hazu ma wen ndang na. Mɛgi gɔfɔrma yaksa pentɛ.

¹⁵Ha yenga *Pake, bɛlɛ ndang ndang fɛt, gɔfɔrma dung mɛ gbosisi ma wan-zɔbhɔ ka zugiliwi ngoya.

¹⁶Ha ngimɔ ɛngi, ma wan-zɔbhɔ ang ka hio wi ingɔ nɛdɔka, ling wa nde Jésus Barabas.

¹⁷Ka giliwi wesara may, Pilate ana mbwa: «Ɛnɛ ngoy nde, mi agbosisi nɛ nge wi ha ɛnɛ ge nde? Jésus Barabas, mana Jésus ka ɛ sa nde, *Mesi, nde?»

¹⁸Hazu wɛnɛ ingɔ nde, ɛ gdea Jésus ha kɔ wa nɛ wal silamɔ.

¹⁹Ka Pilate boka ha dungɔnu ha zu kiti gɔn kita, ko pɛa tomsa ha wɛnɛ wen mɛgɛ: «Mɛ agu kɔ mɛ ha tɛ *nzeng wi ɛngɛ. Hazu ha zɛ ɛngɛ, sila mi tukolo nɛdɔka ha zɔka lisɔ ha wen pɛa.»

²⁰Ma, hio gasa wan-hasadaka nɛ hio kotowi aa sɔkira ha giliwi nde, mbwa a-ani mɛ gbosisi Barabas, nɛ mɛ gbɛ Jésus.

²¹Gɔfɔrma Pilate ana mbwa fin: «Ha soko wi ndɔng bwa, ɛnɛ ngoy nde, mi agbosisi nɛ o ha ɛnɛ o nde?» Nɛ mbwa tɔa: «Barabas!»

²²Nɛ Pilate ana mbwa fin: «Mɛgi mi bede mɛng nɛ Jésus ka ɛ sa nde Mesi ge nde?» Mbwa fɛt gdɔra: «Ngba wɛnɛ ha getakate!»

²³Pilate tɔa: «A dea nɛ nge gdangamɔ ge?» Ma, mbwa gdɔra nɛngaya pen mɔ sɔngsi: «Ngba wɛnɛ ha getakate!»

²⁴Ka Pilate zɔka nde, a lɛm gan zu giliwi na, nɛ ka woto-wotomɔ penatɛ, wɛnɛ ana li, a taya kɔ wa ha li hio wi fɛt nɛ tɔa: «Fio pɛ wi ɛngɛ zɔk mi na! Yo nê wen pɛ ɛnɛ!»

²⁵Nɛ zugiliwi fɛt kɔa: «Fio pɛa atek ha zu ɔ, nɛ ha zu hio bem pɛ ɔ!»

²⁶Mɛgi, wɛnɛ gbosasa Barabas ha mbwa. Nɛ a gdea Jésus ha kɔ wan-bibulo pɛa nde, mbwa azuri wɛnɛ nɛ zambala sɔngsi mɛ ngba wɛnɛ ha getakate.

²⁷Mɛgi hio wan-bibulo baa Jésus nɛnɛ ha zang dɛl mɔ gasa twa pɛ Gɔfɔrma Pilate. Haki mbwa wesara hio zugili-bulo fɛt zikiri wɛnɛ.

²⁸Mbwa kpɔsa la pɛa, nɛ mbwa yola ma gbɛ gbambusa pɛ wan-bibulo ha tɛ wa.

²⁹Nɛ mbwa pana ma ndutu wan nɛ yak ngombia a ha zu wa. Nɛ fin, mbwa gdea te sisongo ha wekɔ wa tuka tongolo wan. Mɛgi mbwa ngbio zigolo ha si wa, nɛ mbwa mama wɛnɛ nɛ tɔa: «Wolmɔe, *kongapora pɛ hio *zuife!»

³⁰Mbwa pɛa tafu ha tɛ wa nɛ baa te sisongo mɛl nɛ wɛnɛ ha zu.

³¹Ka mbwa mama wɛnɛ kari, mbwa kpɔsa gbambusa ɛngɛ ha tɛ wa, nɛ yola la pɛa ha wɛnɛ. Hapata mbwa kuo wɛnɛ nɛnɛ ha ngbaa ha getakate.

³²Ka mbwa ha gboa ha gasa le, mbwa kpaa ma wi mɔ Sirene, ling wa nde Simon. Hio wan-bibulo nɔsasa wɛnɛ mɛ gu getakate pɛ Jésus.

³³Mbwa hɔa ha ma bhandi ka ɛ saa nde Golgota. Ɛngɛ tɔ nde, «bhandi gbala zu wi.»

³⁴Haki mbwa ngoya mɛ ha Jésus li vigne, ka ɛ sɔkara nɛ ma mɔ ka pang tuka nzong. Nɛ ka wɛnɛ tota yo, a kafa nɔa.

³⁵Mbwa ngbaa wɛnɛ ha getakate, nɛ kapana latɛ pɛa ha soko mbwa nɛ wal mbela.

³⁶Hapata mbwa dungɔnu nɛ pɛm wɛnɛ.

³⁷Ha ngɔn ha zu wa, mbwa gdea ma papote ka gbasi wen fio pɛa. Ɛ ngɛraka: «Wi kɛ nê Jésus, *kongapora pɛ hio *zuife.»

³⁸Nɛ ɛ ngbaa hio nagbɛwi bwa hinɛ Jésus. Getakate pɛ ma ndang ha wal wekɔ wa, nɛ pɛ mbinga ha wal gare wa.

³⁹Hio wi ka dungɔ ha pena haki lingɔ zu nɛ yaa Jésus,

⁴⁰mbwa tɔa: «Yiss! Mɛ ka batɔ nde, mɛ begbin *gasa twa Sɔ, nɛ mɛ bebhɔngiri yo ha zang yala tar, mɛ kpasisi tɛ mɛ nɛ pɛ mɛ tɛ. Ka mɛ nê *Bewei pɛ Sɔ, mɛ zil ha getakate!»

⁴¹Hio gasa wan-hasadaka, hio kotowi nɛ hio *wan-osi mbonga mama wɛnɛ fin nɛ mbwa tɔa:

⁴²«Wɛnɛ kpasasa hio mbingwi. Ma, a lɛm kpasisi tɛ wa nɛ pɛa tɛ na! Ka wɛnɛ nê kongapora pɛ hio zuife, wɛnɛ azil ha getakate sising-sising, nɛ ɔ bemɛkiri wɛnɛ.

⁴³A gdea tazu wa fɛt ha tɛ Sɔ. A tɔa nde, wɛnɛ nê Bewei pɛ Sɔ. Mɛgi ka Sɔ ngoya wɛnɛ, Sɔ akpasisi wɛnɛ sising.»

⁴⁴Nɛ hio nagbɛwi ka ɛ ngbaa ha getakate hapɛtɛ wa, fɛngsa wɛnɛ fin gbesi.

⁴⁵Nɛ ka swe hɔa ha sila zu, tutum gdɔka kandɔnu ɛngi ngɛ-ngɛ-ngɛ fɛt, kanɛ swe gbinɔ kɔ hɔ ha ngonga tar.

⁴⁶Ka swe wɛla hɔ ha ngonga tar, Jésus gdɔra nɛ ngagɛl: «Eli, Eli, lama sabaktani?» Ɛngɛ tɔ nde, Sɔ pɔm, Sɔ pɔm, mɛ laka mi gde hazu ge?

⁴⁷Nɛ ka hio ma wi ndɔng ka dungɔ haki zea mɛgi, mbwa tɔa: «Wɛnɛ ha saa *Elie.»

⁴⁸Nɛhasa ma wi ndang ha soko mbwa sɔawi nɛ, nɛ donsi nzambu nɛ kpaya dɔkɔ. A hɛla yo ha ndɔng te sisongo, nɛ a yafafa yo gde ha nu Jésus nde, wɛnɛ anɔ.

⁴⁹Ma, hio oloa tɔa ha wɛnɛ: «Mɛ gde yo, ɔ zɔk mana Elie betɛ, tɛ kpasisi wɛnɛ.»

⁵⁰Ma, Jésus gdɔra fin nɛ ngagɛl, nɛ wɛnɛ fea.

⁵¹Ha ndangtɛ ngimɔ, la gɔn soko *gasa twa Sɔ ka gɛ ha li nzɔy bhandi fɛt, gbaa soko bwa angiri ha ngɔn gbo ha nu. Nɛ nu yaka nɛ hio gogo gbaa.

⁵²Hio zupisi gboa long, nɛ hapata ka Jésus guotɛ kari, hio dɔka nzɔy wi ka bafe guotɛ nɛ kili tɛ. Mbwa gboa ha zang kɔfio, le ha nzɔy le Jérusalem, nɛ osa tɛ ha hio dɔka wi.

⁵³

⁵⁴Kagama-bulo nɛ hio wan-bibulo ka pɛma Jésus zɔka yaka nu nɛ mɔ fɛt ka hɔa. Mɛgi gasa ke baa mbwa, nɛ mbwa tɔa: «Kpasawen, wi kɛ dungɔ nê *Bewei pɛ Sɔ.»

⁵⁵Nɛ hio bhoko nɛdɔka dungɔ nɛyɛa zɔk nɛ mɔ. Yo nê mbwa ka ndara Jésus nɛ dea tom ha wɛnɛ nisi ha Galile tɛnɛ.

⁵⁶Ha soko mbwa dungɔ: Marie Magdala, Marie nana mɛ Jacques hinɛ Joseph, nɛ nana mɛ hio bewei pɛ Zebede bwa.

⁵⁷Ka mbolo dea, Joseph, ma wan-kpamɔ mɔ le Arimate, ka dung *wan-yambimɔ pɛ Jésus,

⁵⁸nɛa ha pɛ Pilate nɛ ani wɔl Jésus. Mɛgi Pilate haa nu nde, ɛ azilsi yo ha wɛnɛ.

⁵⁹Joseph kuo wɔl Jésus nɛ luo yo nɛ mbombe bula.

⁶⁰A gdea yo ha zang mbombe zupisi pɛa, ka ɛ gdɔya bingiri ha zang gogo ta mɛ gde bin wɔl wa ang. Nɛ wɛnɛ kinso ma viɛ-viɛ gasa ta gdɔki nɛ nua, nɛ wɛnɛ pena.

⁶¹Marie Magdala, nɛ mbinga Marie dungɔnu haki ha li zupisi.

⁶²Nɛ mɔsaa, ha *swe ɔmtɛ, hio gasa wan-hasadaka nɛ hio *Farizien wesara may nɛ ha pɛ Pilate,

⁶³nɛ mbwa tɔa: «*Kongawan, tazu ɔ gbaa nde, ha ngimɔ ka wan-dalo ɛngɛ bhɔna nɛ zutunɔ, wɛnɛ batɔ nde, wɛnɛ begutɛ ha soko hio fiowi hapata yala tar.

⁶⁴Hazu ɛngi, mɛ ha nu nde, ɛ apɛm zupisi pɛa nɛkpasa kanɛ yala tar. Yu nde, hio *wan-yambimɔ pɛa atɛ nɛ zɛ, tɛ ku wɔl wa pen nɛ. Nɛ mbwa betɛ tɔ ha hio wi nde, a guotɛ ha soko fiowi. Nɛ kpogio dalo ɛngɛ bedung nɛ gdangaa pen bosi dalo, ka tɔa nde, wɛnɛ nê *Bewei pɛ Sɔ.»

⁶⁵Nɛ Pilate tɔa ha mbwa: «Hio wan-bibulo hazu pɛm zupisi ga. Ɛnɛ nɛ, nɛ pɛm zupisi pɛa tuka yo lɛma nɛ ɛnɛ.»

⁶⁶Mɛgi mbwa nɛa ha zupisi nɛ mbwa tuyo nua nɛ dafu ling Pilate, tuka nde, yo agbasi ka ɛ tikoso ta gdɔki nua. Nɛ fin, mbwa gdea hio wan-pɛm zupisi haki.