Read south west gbaya Matthieu 4 Bible Online

Matthieu 4 - south west gbaya bible

Matthieu 4

¹Hapata *Nzɔy-Sɔtɛ ngbɔsa Jésus nɛnɛ ha kpɛnu tuka nde, Satan awe sila wa.

²Ka Jésus zimɔ yɔngamɔ swe bhukɔa nar nɛ zɛ bhukɔa nar kari, wɔ dea wɛnɛ.

³Satan tiko nɛ hapɛtɛ Jésus nɛ tɔa: «Ka mɛ nê *Bewei pɛ Sɔ, mɛ ha nu ha ta ndɔng akifi mampa.»

⁴Nɛ Jésus kiforo wen: «Takarata pɛ Sɔ tɔa nde, wi lɛm dung nɛ zutunɔ nɛ wal mampa sɔna na. Ma, yo nê wen pɛ Sɔ ndang ndang fɛt ka de nde, wɛnɛ adung nɛ zutunɔ.»

⁵Hapata Satan kuo wɛnɛ nɛnɛ ha nzɔy le Jérusalem. A gdea wɛnɛ ha bhele-bhele zu *gasa twa Sɔ.

⁶Nɛ wɛnɛ tɔa ha Jésus: «Ka mɛ nê Bewei pɛ Sɔ, mɛ bhil tek ha nu. Hazu takarata pɛ Sɔ tɔa nde, Sɔ beha nu ha hio *telenge pɛa mɛ gde kɔ ha si mɛ nde, mɛ akɔ nanga mɛ ha ta na.»

⁷Nɛ Jésus kiforo wen: «Takarata pɛ Sɔ tɔa fin nde, ka mɛ awe sila *Kongawan, Sɔ pɛ mɛ na.»

⁸Mɛgi Satan kuo wɛnɛ nɛnɛ ha zu kuso bhele-bhele ngari. Nɛ a osa hio kongakandɔ pɛ nzan nɛ lɛkɛ-lɛkɛ mɔa fɛt ha wɛnɛ,

⁹nɛ tɔa: «Ka mɛ ngbio zigolo ha si mi nɛ lukisi mi, mi beha mɔ ndɔng fɛt ha mɛ.»

¹⁰Nɛ Jésus kiforo wen: «Mɛ pen Satan! Takarata pɛ Sɔ tɔa nde, mɛ alukisi Kongawan, Sɔ pɛ mɛ, nɛ mɛ ade tom Sɔ ha wɛnɛ ndang sɔna.»

¹¹Hapata Satan laka wɛnɛ gde. Nɛ hio telenge hɔa nɛ dea tom ha Jésus.

¹²Ka Jésus zea nde, ɛ pio *Jean wan-gdumsiwi ha zɔbhɔ, a daka tɛ nɛ ha kandɔnu Galile.

¹³A tɛ bhɔn ha le Nazaret na, ma, a pena nɛ de le ha Kapernaum, ma le ha nukolo tɔ Galile, ha kandɔnu Zabulon nɛ Neftali.

¹⁴Mɛgi wen ka *wan-tɔkuliwen Esaïe batɔ sɔngsi lɛmsara tɛ:

¹⁵«Kandɔnu Zabulon nɛ Neftali, ha nukolo tɔ Galile, ha kuli Jourdain, Galile pɛ hio wi ndɔng ka bo nê *zuife na!

¹⁶Hio wi mɔ kandɔ ka de le ha zang tutum, zɔka gasa saamɔ. Nɛ saamɔ baa zikiri ɛ ndɔng, ka dung ha tutum kandɔnu fio.»

¹⁷Angiri ha ngimɔ ɛngi, Jésus bulo wen mɛgɛ: «Ɛnɛ akifiri sila ɛnɛ, hazu *Kongakandɔ Ngɔn tɛ bo sanga nɛ ɛnɛ!»

¹⁸Jésus yala hapɛtɛ tɔ Galile, nɛ a zɔka hio wan-ki kɔyɔ bwa ha pio yɔk. Mbwa nê gdiya, Simon ka ɛ sa fin nde, Pierre hinɛ ya wa André.

¹⁹Nɛ Jésus tɔa ha mbwa: «Ɛnɛ ndari mi, mi bede nde, ɛnɛ adung wan-ki wi.»

²⁰Nɛhasa mbwa laka yɔk li pɛ mbwa gde, nɛ mbwa ndara Jésus.

²¹Ka mbwa pena nɛyɛa tikiring, Jésus zɔka fin hio ma gdiya bwa. Yo nê hio bem pɛ Zebede, Jacques hinɛ Jean. Mbwa hinɛ bafa mbwa dungɔ ha bhɔngara yɔk ha zang sɔngu. Nɛ Jésus saa mbwa.

²²Nɛhasa mbwa laka sɔngu nɛ bafa mbwa gde, nɛ mbwa ndara Jésus.

²³Ha ngimɔ ɛngi, Jésus yala zikiri kandɔnu Galile fɛt, nɛ wɛnɛ dungɔ ha bulo *Dede Wen *Kongakandɔ Ngɔn ha zang hio *twa gɔ Sɔ. Wɛnɛ dungɔ fin ha kpasasa hio wan-zɛlɛ nɛ hio kumɔ wi fɛt.

²⁴Nɛ kasi tɛ wa yambala hɔ ha kandɔnu Siri fɛt. Mɛgi ɛ kaya hio wi ndɔng fɛt ka dung nɛ tili zɛlɛ nɛtɛ-nɛtɛ tɛnɛ ha pɛa, nɛ fin hio bala ha kɔ gdanga sɔtɛ, hio wan-zɛlɛ bedole, nɛ hio wan-zɛlɛ mɛla. Nɛ Jésus kpasasa mbwa fɛt.

²⁵Nɛ dɔka giliwi ndara wɛnɛ. Mbwa guotɛ ha Galile, ha kandɔnu ka ɛ sa nde «Le Bhukɔ», ha Jérusalem, ha Judée nɛ ha kuli Jourdain fɛt.