Read south west gbaya Matthieu 6 Bible Online

Matthieu 6 - south west gbaya bible

Matthieu 6

¹«Pangay, ka ɛnɛ ade nzengmɔ hazu peali na, yu nde, Bafa ɛnɛ ka dung ha zang ngɔn betɛ kafi kɛa ɛnɛ.

²«Ka mɛ de ngay ha tɛ fabha wi, ka mɛ alukisi tɛ mɛ na. Hazu hio wan-dambari ha dea mɛgi ha *twa gɔ Sɔ nɛ ha liwal tuka nde, hio wi alukisi mbwa. Kpasawen, mi tɔ ha ɛnɛ nde, mbwa kpaa mɔ-kɛ mbwa kari.

³Ma, ka mɛ dea ngay, dea nde, gare mɛ aing mɔ ka wekɔ mɛ dea na,

⁴tuka nde ngay pɛ mɛ adung nɛ wuso. Mɛgi Bafa mɛ, ka zɔk mɔ ka dung ha wuso, bekɛ mɛ.»

⁵«Ka ɛnɛ gɔ Sɔ, ka ɛnɛ adung tuka hio wan-dambari na. Hazu ka mbwa gɔ Sɔ ha *twa gɔ Sɔ nɛ ha sabhaka wal, mbwa yol ha ngɔn tuka nde, hio wi azɔk mbwa. Kpasawen, mi tɔ ha ɛnɛ nde, mbwa kpaa mɔ-kɛ mbwa kari.

⁶Ma, pɛ mɛ, ka mɛ ngoy gɔ Sɔ, mɛ le ha zang gdɔku nɛ mɛ gdɔki nua. Mɛgi, mɛ gɔ Bafa mɛ haki ha bhandi wuso. Nɛ Bafa mɛ ka zɔk mɔ ka dung ha wuso fɛt, bekɛ mɛ.

⁷«Ka ɛnɛ atɔ tumwen ha gɔa Sɔ na. Hio *bhilo de mɛgi, hazu mbwa takiri nde, Sɔ beze mbwa hazu hio ting wen pɛ mbwa.

⁸Ka ɛnɛ adung tuka mbwa na, hazu Bafa ɛnɛ ingɔ mɔ fɛt ka kɔpi ɛnɛ sɔngsi ing, ɛnɛ tɛ gɔ wɛnɛ.

⁹Dea nde, ɛnɛ agɔ Sɔ mɛgɛ: ‹Bafa ɔ ka dung ha zang ngɔn, ling mɛ adung nɛ nzɔya,

¹⁰kongakandɔ pɛ mɛ atɛ, Ɛ ade mɔ ka mɛ ngoya ha nu, tuka ɛ de ha zang ngɔn.

¹¹Ha ɔ mɛsɛ yɔngamɔ ka lɛma swe ɛngɛ.

¹²Ha ɔ *tiso hazu gdangamɔ pɛ ɔ, tuka ɔ haa tiso ha wi ndɔng, ka de gdangamɔ ha tɛ ɔ.

¹³Lesisi ɔ ha *sɛbhalamɔ na, ma, kpasisi ɔ gbo ha gdangamɔ. [Hazu kongakandɔ, nɛ ziomɔ, nɛ *lɛkɛ-lɛkɛmɔ dung ha kɔ mɛ kpoo. Amen.]›

¹⁴«Kpasawen, ka ɛnɛ ha tiso ha hio wi hazu gdangamɔ pɛ mbwa, Bafa ɛnɛ ka dung ha zang ngɔn beha fin tiso ha ɛnɛ.

¹⁵Ma, ka ɛnɛ ha tiso ha hio wi na, ki Bafa ɛnɛ lɛm ha tiso ha ɛnɛ hazu gdangamɔ pɛ ɛnɛ fin na.»

¹⁶«Ka ɛnɛ zim yɔngamɔ hazu gɔ Sɔ, ɛnɛ dung tuka wan-ngɔtɛ na. Hazu yo nê hio wan-dambari ka de mɔ mɛgi. Mbwa kay sɔngsi mbwa hazu osi ha hio wi nde, mbwa ha zimɔ yɔngamɔ. Kpasawen, mi tɔ ha ɛnɛ nde, mbwa kpaa mɔ kɛ mbwa kari.

¹⁷Ma, pɛ mɛ, ka mɛ ha zimɔ yɔngamɔ, dea nde, mɛ afal li mɛ, nɛ sal zu mɛ nɛdedea.

¹⁸Mɛgi hio wi ing nde, mɛ ha zimɔ yɔngamɔ, na, kanɛ Bafa mɛ ka ing mɔ wuso. Nɛ Bafa mɛ ka zɔk mɔ ka dung ha wuso fɛt, bekɛ mɛ.»

¹⁹«Ka ɛnɛ awesiri kpaamɔ pɛ ɛnɛ hakɛ ha nzan na, hazu hakɛ dudu nɛ ngongele ha gdangsa mɔ, nɛ wanzu ha gbaa nutwa mɛ zu mɔ.

²⁰Mɛgi, ɛnɛ wesiri kpaamɔ pɛ ɛnɛ gde ha zang ngɔn, haki dudu nɛ ngongele lɛm gdangsi mɔ na, nɛ wanzu lɛm gba nutwa nɛ zu mɔ na.

²¹Hazu yo nê ha bhandi ka kpaamɔ pɛ mɛ ang, ka sila mɛ dung ang fin.»

²²«Gbali mɛ dung tuka lamba ka ha saamɔ ha tɛ mɛ. Ka gbali mɛ nɛ dedea, tɛ mɛ fɛt dung ha zang saamɔ.

²³Ma, ka gbali mɛ gdanga, tɛ mɛ fɛt dung ha zang ngɛ-ngɛ-ngɛ tutum. Mɛgi ka mɛ kpaa tutum ha bhandi saamɔ, bo nɛ tutum ɛngɛ bepentɛ na nde?»

²⁴«Bala ndang lɛm dung nɛ wan bwa na. Hazu, a bengoy ma ndang nɛ sɛn mbinga, mana a beze nu ma ndang nɛ de kpandele sungiri nɛ mbinga. Ɛnɛ lɛm de tom ha kɔ Sɔ nɛ ha kɔ mbɔli na.»

²⁵«Hazu ɛngi, mi gba tazu ɛnɛ nde, ka ɛnɛ adung nɛ nɔzang hazu mɔ ka ɛnɛ beyɔng nɛ nɔ, nɛ la ka ɛnɛ beyol na. Tunɔ pɛ wi nɛ gasaa pen wen yɔngamɔ, nɛ tɛ wi nɛ gasaa pen wen latɛ, na nde?

²⁶Ɛnɛ ambari hio nɔy ha liswe: Mbwa pɛ nɛ bhi kpalmɔ na, nɛ mbwa wesiri yo ha zang gulo na. Ngase ɛngi Bafa ɛnɛ ka dung ha zang ngɔn ha daya mbwa. Bo nɛ ɛnɛ nɛ zioa pen nɔy ndɔng pentɛ pet, na nde?

²⁷O ha soko ɛnɛ lɛma bɔysi yala tunɔ pɛa tikiring nɛ wal nɔzang, o nde?

²⁸«Mɛgi, hazu ge ɛnɛ dung nɛ nɔzang hazu wen la, ge nde? Ɛnɛ mbari hio do bɛlɛ ha kpɔatɛ. Mbwa de tom na, nɛ mbwa pan la na.

²⁹Ma, mi tɔ ha ɛnɛ nde, ngase Salomon ha zang yɛbhɛ-yɛbhɛ kpaamɔ pɛa, tɛ yol lɛkɛ-lɛkɛ la lɛm nɛ do bɛlɛ ndɔng na.

³⁰Sɔ bhɔngara la ha do bɛlɛ, ka dung ha fɔ swe mɛsɛ, nɛ ka ɛ bepi ha we bhisiri. Mɛgi, Sɔ beyol la ha tɛ ɛnɛ pentɛ pet, na nde? Hazu ge ɛnɛ mɛkiri Sɔ tikiring sɔna?

³¹Ka ɛnɛ adung nɛ nɔzang nɛ ani tɛ ɛnɛ na: ‹Ɔ beyɔng nɛ nge mɔ ge? Ɔ benɔ nɛ nge mɔ ge? Ɔ beyol nɛ nge la ge?›

³²Yo nê hio *bhilo, ka nak pata mɔ ndɔng. Ma, Bafa ɛnɛ ka dung ha zang ngɔn ingɔ, ka mɔ ndɔng kɔpi ɛnɛ.

³³Mɛgi, pen mɔ fɛt, ɛnɛ ki mɛ dung hio wi mɔ *Kongakandɔ pɛ Sɔ, nɛ ɛnɛ de mɔ ka dung nzeng ha li wa, nɛ Sɔ beha ɛnɛ olo mɔ fɛt.

³⁴Ka ɛnɛ adung nɛ nɔzang hazu swe bhisiri na, hazu bhisiri nɛ tɛ wa bedung nɛ nɔzang hazu mɔ pɛa. Swe ndang ndang fɛt lɛma nɛ yeksamɔ pɛ mbwa.»