Read south west gbaya Matthieu 7 Bible Online

Matthieu 7 - south west gbaya bible

Matthieu 7

¹«Ɛnɛ agɔn kita ha zu ma wi na, tuka nde Sɔ agɔn kita ha zu ɛnɛ na.

²Hazu Sɔ begɔn kita ha zu ɛnɛ lɛm nɛ kita ka ɛnɛ gɔn ha zu hio mbinga. Sɔ beweki mɔ ha ɛnɛ nɛ ndangtɛ mɔwekimɔ ka ɛnɛ weki nɛ mɔ ha hio mbinga.

³Hazu ge mɛ gɛri mbuli pala ka dung ha li ya mɛ, ma, mɛ zɔk gasa te ka dung ha li mɛ na, ge nde?

⁴Mɛ bede mɛng mɛ tɔ ha ya mɛ: ‹Ya mi, gde mi aku mbuli pala ha li mɛ yunɛ,› nɛ mɛ zɔk gasa te ka dung ha li mɛ na, ge nde?

⁵Wan-dambari, mɛ kusi gasa te ka dung ha li mɛ yunɛ sɔngsi. Nɛ ka mɛ zɔka mɔ buee, ki mɛ lɛma ku mbuli pala ka dung ha li ya mɛ yunɛ.

⁶«Ka ɛnɛ aha nzɔy mɔ ha hio tolo na. Yu nde, mbwa bekifiri tɛ yɔng ɛnɛ. Nɛ ka ɛnɛ aha hio mɛtɛtɛ pɛ ɛnɛ ha hio nguru na. Yu nde, mbwa be-um yo nɛ nanga mbwa.»

⁷«Ɛnɛ gɔ mɔ, nɛ ɛ beha yo ha ɛnɛ. Ɛnɛ ki mɔ, nɛ ɛnɛ bekpa yo. Ɛnɛ kɔn nutwa, nɛ ɛ begbosisi yo ha ɛnɛ.

⁸Hazu wi ndang ndang fɛt ka gɔ mɔ, ɛ beha yo ha wɛnɛ. Nɛ wi ka ki mɔ, a bekpa yo. Nɛ wi ka kɔn nutwa, ɛ begbosisi yo ha wɛnɛ.

⁹Yo nê nge wi ha soko ɛnɛ ka lɛma ha ta ha bem pɛa, ka gɔa yɔngamɔ ha kɔ wa, o nde?

¹⁰Mana ka bem pɛa ana kɔyɔ ha kɔ wa, a beha na-gdangdole ha wɛnɛ nde?

¹¹Ngase ɛnɛ, ka dung nê gdanga wi, ɛnɛ ingɔ haa dedemɔ ha bem pɛ ɛnɛ. Mɛgi pen fɛt Bafa ɛnɛ ha zang ngɔn beha dedemɔ ha wi ndɔng ka gɔ wɛnɛ.»

¹²«Mɛgi, mɔ fɛt ka ɛnɛ ngoy nde, hio wi ade yo ha tɛ ɛnɛ, ɛnɛ de yo gbesi ha tɛ mbwa! Hazu ɛngɛ nê goto osamɔ pɛ *mbonga pɛ Moïse nɛ pɛ hio *w an-tɔkuliwen.»

¹³«Ɛnɛ le nɛ bho-ngo-ngo nutwa. Hazu yo nê pɛsa nutwa nɛ kpemyeke wal, ka nɛ ha bhandi bhondisi wi. Nɛ dɔka wi ha nɛa haki.

¹⁴Ma, yo nê bho-ngo-ngo nutwa nɛ bhɛtɛ-bhɛtɛ wal, ka nɛ ha tunɔ. Nɛ wi ndɔng ka kpa wal ɛngɛ dɔk na.»

¹⁵«Pangay nɛ hio wan-tɔkuliwen dalo. Hazu mbwa yol nɛ kotu sami tɛnɛ ha pɛ ɛnɛ. Ma, ha zanga, mbwa nê hio ngɔnzu.

¹⁶Ɛnɛ being mbwa nɛ wal deamɔ pɛ mbwa. Hazu ɛ lɛm bhi waya sole ha te gaza na, nɛ ɛ lɛm bhi waya yama ha yak ngombia na.

¹⁷Mɛgi dede te fɛt way nɛ dede wayaa. Nɛ gdanga te way nɛ gdanga wayaa.

¹⁸Dede te lɛm way gdanga wayaa na. Nɛ gdanga te lɛm way dede wayaa na.

¹⁹Te fɛt ka way dede wayaa na, ɛ begɔn yo pi ha we.

²⁰Nɛ mɛgi, ɛnɛ being hio wan-tɔkuliwen dalo nɛ wal deamɔ pɛ mbwa.»

²¹«Hio wi ang ka sa mi nde, *Kongawan, Kongawan. Ma, mbwa fɛt lɛm le ha *Kongakandɔ Ngɔn na. Yo sɔna nê wi ndɔng ka de mɔ ka Bafa mi ka dung ha zang ngɔn ngoya.

²²Ha swe kita, dɔka wi betɔ ha mi nde, ‹Kongawan, Kongawan bo nɛ ɔ batɔ kuliwen nɛ ling mɛ na nde? Bo nɛ ɔ bayin hio gdanga sɔtɛ nɛ ling mɛ na nde? Bo nɛ ɔ bade dɔka *mɔkifi nɛ ling mɛ na nde?›

²³Mɛgi mi betɔ ha mbwa long nde, ‹Mi ing ɛnɛ ndang na, ɛnɛ pen. Hazu ɛnɛ tɛ de mɔ ka Sɔ ngoya ndang na.›»

²⁴«Mɛgi, wi ndang ndang fɛt ka ze wen pɔm ndɔng, nɛ ka de mɔ lɛm nɛ yo, mbwa gbesi tuka zɔma wi ka bɛa twa pɛa ha zu gogo.

²⁵Ngase ka kolo ɔla, gbongbong kolo hɔa, nɛ bok gdufo sungiri nɛ twa ɛngɛ, yo tɛ tukili na, hazu nangaa nɛ nɔa ha zu gogo.

²⁶Ma, wi ndang ndang fɛt ka ze wen pɔm ndɔng, nɛ ka de mɔ lɛm nɛ yo na, mbwa gbesi tuka yera wi ka bɛa twa pɛa ha zu lembe.

²⁷Nɛ ka kolo ɔla, gbongbong kolo hɔa, nɛ bok gdufo sungiri nɛ twa ɛngɛ, yo tukolo fɛt mburr.»

²⁸Nɛ ka Jésus karsa tɔa wen ndɔng, dɔka giliwi yaksa pentɛ hazu osamɔ pɛa.

²⁹Hazu a osimɔ tuka hio *wan-osi mbonga na, ma, a osamɔ ha mbwa nɛ ziomɔ.