Read south west gbaya Matthieu 8 Bible Online

Matthieu 8 - south west gbaya bible

Matthieu 8

¹Jésus zilo ngari, nɛ gasa gili ndara wɛnɛ.

²Nɛ ma wan-doko tɛa tɛ ngbi zigolo ha si wa nɛ tɔa: «*Kongawan, ka mɛ ngoya, mɛ lɛma sasisi tɛ mi.»

³Nɛ Jésus yafafa kɔ wa, ba tɛ wa nɛ tɔa: «Mi ngoya yo, tɛ mɛ asa!» Nɛ ha ndangtɛ ngimɔ tɛ wan-doko ɛngɛ saa.

⁴Hapata Jésus mboa wɛnɛ: «Ka mɛ atɔ yo ha ma wi ndang na! Ma, mɛ osi tɛ mɛ ha wan-hasadaka tuka wɛnɛ amɛkiri nde, doko pɛ mɛ kara kari. Hapata mɛ ha sadaka sasasamɔ, ka Moïse baha nua sɔngsi. Ɛngɛ beosi ha wi fɛt nde mɛ kpasa kari.»

⁵Nɛ ka Jésus ha lea ha Kapernaum, ma kagama-bulo mɔ kandɔnu Rome tɛa, tɛ lokitɛ ha wɛnɛ,

⁶a tɔa: «*Kongawan, ma wan-tom pɔm ha ɔanu ha twa nɛ zɛlɛ mɛla, ka yim wɛnɛ pentɛ.»

⁷Jésus tɔa ha wɛnɛ: «Mi nɛ pɔm tɛ benɛ nɛ kpasisi wɛnɛ.»

⁸Ma, kagama-bulo kiforo wen: «Kongawan, mi bo nɛ zioa nde, mɛ ale ha twa pɔm na. Ma, mɛ tɔ sɔna nɛ wen ndang nɛ wan-tom pɔm bekpasi.

⁹Hazu mi fin, mi dung ha si hio ma zio wi, nɛ hio wan-bibulo dung fin ha si mi. Ka mi tɔ ha ma wan-bibulo pɔm: ‹Nɛ!› A nɛa. Nɛ ka mi tɔ ha ma mbinga fin: ‹Tɛ!› A tɛa. Nɛ ka mi tɔ ha ma wan-tom pɔm fin: ‹De ɛngɛ!› A dea yo.»

¹⁰Jésus yaksa ka wɛnɛ zea wen ndɔng. Nɛ a tɔa ha giliwi ka ndara wɛnɛ: «Kpasawen, mi tɔ ha ɛnɛ nde, mi tɛ kpa ka ma wi ndang ka mɛkiri Sɔ nɛkpasa tuka ɛngɛ na, ngase ha soko hio wi mɔ *Israel yo bona.

¹¹Ma, mi tɔ ha ɛnɛ nde, dɔka wi begutɛ ha wal gutɛ swe, nɛ ha wal ɔnu swe, nɛ mbwa bewesiri may ha yɔngamɔ hapɛtɛ tabolo hinɛ Abraham, Isaac nɛ Jacob ha *Kongakandɔ Ngɔn.

¹²Ma, ɛ ndɔng ka lɛma se mɛ dung ha Kongakandɔ pɛa, Sɔ bepi mbwa ha dɛl ha zang ngɛ-ngɛ-ngɛ tutum, haki mbwa behe kwa nɛ yɔng nzata.»

¹³Nɛ Jésus tɔa ha kagama-bulo: «Mɛ si nɛdedea. Mɔ ahɔ tuka mɛ mɛkara.» Nɛ wan-tom pɛa kpasa ha ndangtɛ ngimɔ.

¹⁴Nɛ Jésus lea twa pɛ Pierre, nɛ wɛnɛ zɔka folo mɛ Pierre mɔ bhoko ha ɔanu nɛ zɛlɛ bawetɛ.

¹⁵Jésus tama kɔ wa, nɛ zɛlɛ bawetɛ kara. Nɛ folo mɛ Pierre guotɛ nɛ dea tom ha mbwa.

¹⁶Ka mbolo dea, ɛ kaya dɔka wi ka dung bala ha kɔ gdanga sɔtɛ, tɛnɛ ha Jésus. A yinɔ gdanga sɔtɛ ndɔng nɛ wal wen nu wa, nɛ a kpasasa fin hio wan-zɛlɛ fɛt.

¹⁷A dea mɛgi tuka nde, wen pɛ *wan-tɔkuliwen Esaïe alɛmsiri tɛ: «Wɛnɛ kuo kumɔ pɛ ɔ, nɛ a baa hio zɛlɛ pɛ ɔ yunɛ.»

¹⁸Ka Jésus zɔka dɔka giliwi ka zikoro wɛnɛ, a haa nu ha hio *wan-yambimɔ pɛa: «Ɔ nɛ ha kuli tɔ!»

¹⁹Ma *wan-osi mbonga tiko nɛ hapɛtɛ Jésus nɛ tɔa: «Wan-osimɔ, mi bendari mɛ ha bhandi fɛt ka mɛ benɛ ang.»

²⁰Jésus kiforo wen ha wɛnɛ: «Hio ngbanza nɛ ngu pɛ mbwa, nɛ hio nɔy nɛ twa pɛ mbwa. Ma, mi, *Bewei pɛ Wi, bo nɛ bhandi ɔmtɛ na.»

²¹Ma ndang ha soko hio wan-yambimɔ tɔa ha Jésus: «*Kongawan, mɛ gde mi anɛ, nɛ gun bafa mi sɔngsi ing.»

²²Ma, Jésus tɔa ha wɛnɛ: «Mɛ ndari mi! Mɛ gde hio fiowi agun hio fiowi pɛ mbwa.»

²³Jésus lea sɔngu nɛ hio *wan-yambimɔ pɛa ndara wɛnɛ.

²⁴Ka mbwa dungɔ ha kuo li, gbabok guotɛ ha li, nɛ tongbasali goka sɔngu. Ma, Jésus ha ɔala.

²⁵Nɛ hio wan-yambimɔ tiko nɛ ha pɛa, tunso wɛnɛ nɛ tɔa: «*Kongawan, kpasisi ɔ, ɔ sanga nɛ fio!»

²⁶Nɛ wɛnɛ ana mbwa: «Ɛnɛ yu ke hazu ge? Ɛnɛ mɛkiri Sɔ tikiring sɔna!» Mɛgi a guotɛ, nɛ a gaya gbabok nɛ li tɔ. Nɛ mɔ gaa selele.

²⁷Ma, hio wi fɛt yaksa nɛ mbwa tɔa ha may: «Ɛngɛ nê nge tili wi, ka bok nɛ li ha zea nu wa ge nde?»

²⁸Ka Jésus hɔa ha kuli tɔ, ha kandɔnu mɔ le Gadara, hio wei bwa ka dung nê bala ha kɔ gdanga sɔtɛ, nɛa ha sɔngsi wa. Mbwa gboa ha zang ngu ka ɛ gde hio wɔlwi ang. Mbwa dungɔ ha dea da nɛngaya nde, wi ndang apen ha liwal haki na.

²⁹Mbwa gdɔra: «*Bewei pɛ Sɔ, mɛ ngoy mɛ de nɛ ge nɛ ɔ ge? Mɛ tɛa hazu yukiti ɔ sɔngsi swe kita pɛ Sɔ nde?»

³⁰Nɛ ma zugili nguru dungɔ ha yɔngamɔ nɛyɛa nɛ mbwa tikiring.

³¹Hio gdanga sɔtɛ ndɔng lokatɛ ha wɛnɛ nɛ tɔa: «Ka mɛ beyin ɔ, mɛ tomsi ɔ ha tɛ hio nguru ndɔng haki.»

³²Jésus tɔa ha mbwa: «Ɛnɛ nɛ!» Nɛ mbwa gboa ha tɛ wi ndɔng bwa, nɛ le tɛ hio nguru. Mɛgi zugili nguru fɛt *bhilo tek ha kuso nu ngindi tɔ. Nɛ mbwa fɛt fea li.

³³Nɛ hio zaoro nguru yuo mɔ pen, nɛ ha le Gadara. Haki mbwa baa kasi mɔ fɛt, ka hɔa ha tɛ hio wei bwa, ka dungɔ se nê bala ha kɔ gdanga sɔtɛ.

³⁴Nɛ hio wi mɔ Gadara fɛt gboa, nɛ ha sɔngsi Jésus. Ka mbwa zɔka wɛnɛ, mbwa lokatɛ ha wɛnɛ nde, wɛnɛ apen ha kandɔnu pɛ mbwa.