Read south west gbaya Marc 13 Bible Online

Marc 13 - south west gbaya bible

Marc 13

¹Ka Jésus boka ha gboa ha gasa twa Sɔ, ma *wan-yambimɔ pɛa ndang tɔa ha wɛnɛ: «Wan-osimɔ, mɛ zɔk hio gasa lɔka ta ndɔng ka ɛ bɛa nɛ gasa twa Sɔ! Ɛngɛ nê nge lɛkɛ-lɛkɛ twa ge!»

²Mɛgi, Jésus kiforo wen ha wɛnɛ: «Mɛ lukoso yanga-yenge twa ɛngɛ, ma hakɛ, ma ta ndang lɛm bhɔn ha zu ma ta na. Ɛ begbin yo a ha nu mburr.»

³Jésus nɛa nɛ dungnu ha zu ngari Olivier, ka tan may nɛ *gasa twa Sɔ. Pierre, Jacques, Jean nɛ André, mbwa nar sɔna dungɔ hinɛ Jésus. Nɛ mbwa ana wɛnɛ:

⁴«Mɛ tɔ ha ɔ ngimɔ, ka mɔ ndɔng behɔ nɛ. Yo nê nge mɔ ka beosi nde, ngimɔa hɛra kari ge nde?»

⁵Mɛgi Jésus tɔa ha mbwa: «Ɛnɛ pangay, ka ma wi aosili ɛnɛ na.

⁶Hazu hio wi nɛdɔka betɛ nɛ ling mi, nɛ mbwa betɔ: ‹Mi nê *Mesi!› Nɛ mbwa beosili dɔka wi.

⁷Ka ɛnɛ zea wen bulo ka ɛ bi sanga-sanga mana nɛyɛa, ka sila ɛnɛ abhunziki na. Hazu, lɛma ka nde mɔ ndɔng ahɔ. Ma, yo tɛ bo ka nê kpogio ngimɔ na.

⁸Ma kandɔ begutɛ nɛ bulo sungiri nɛ ma mbinga. Nɛ ma *kongapora begutɛ nɛ bulo sungiri nɛ ma mbinga. Ha hio bhandi nɛtɛ-nɛtɛ nu beyak nɛngaya, nɛ ginga foto betek. Mɔ ndɔng fɛt bedung tuka bosi yimtɛ bio bhɛ.

⁹«Ɛnɛ pangay nɛ tɛ ɛnɛ! Hio wi begde ɛnɛ bin ha kita, nɛ mbwa bezuri ɛnɛ nɛ zambala ha hio *twa gɔ Sɔ. Ɛnɛ beyol ha li hio gɔfɔrma nɛ ha li hio kongapora nde, mbwa agɔn kita ha zu ɛnɛ, hazu ɛnɛ mɛkara mi. Mɔ ndɔng beha ɛnɛ wal mɛ kɛ wen pɔm ha li mbwa.

¹⁰Ma, lɛma nde, hio wi pɔm abul *Dede Wen ha hio wi mɔ nzan fɛt ing, ki kpogio ngimɔ tɛ hɔ.

¹¹Ha ngimɔ ka ɛ bengbɔsi ɛnɛ nɛnɛ ha si hio wan-gɔn kita, ka ɛnɛ adung nɛ nɔzang hazu wen ka ɛnɛ betɔ na. Ma, ɛnɛ tɔ kanɛ wen ka behɔ ha nu ɛnɛ ha ngimɔa. Hazu, yo bo nê ɛnɛ ka bewolmɔ na. Ma, yo nê *Nzɔy-Sɔtɛ ka bewolmɔ.

¹²Hio gdiya begɔn si nanga may nde, ka ɛ agbɛ mbwa. Hio gdibafa begɔn si nanga bem pɛ mbwa. Hio bem begutɛ sungiri nɛ bafa nɛ nana mbwa hazu nde, ɛ agbɛ mbwa yunɛ.

¹³Hio wi fɛt besɛn ɛnɛ hazu ɛnɛ mɛkara mi. Ma, wi ka ba nɛ nɔa nging kanɛ kpogio ngimɔ, Sɔ bekpasisi wɛnɛ.»

¹⁴(Mɛ, ka mɛ tɔl wen ɛngɛ, mɛ ze gotoa nɛ kinɔng!) «Ma swe, ‹gdanga mɔ nyɛl›, bedung ha bhandi ka yo lɛm dung ang na. Ka ɛnɛ bezɔk mɔ mɛgi, dea nde, wi ndɔng ka bedung ha kandɔnu Judée, mbwa ayumɔ si ha zu ngari.

¹⁵Wi ka bedung ha li dɛl, ka wɛnɛ akifiri le ha zang twa mɛ ba ma toy pɛa fin na.

¹⁶Nɛ wi ka bedung ha fɔ, ka wɛnɛ akifiri fin si ha twa hazu ku gbambusa pɛa na.

¹⁷Oee, gasa mɔ ngɔtɛ ka bekpa hio nazang nɛ hio nanzɔ ha yala ndɔng wa!

¹⁸Ɛnɛ gɔ Sɔ nde, ka mɔ ɛngi ahɔ ha ngimɔ kolo ndumbe na.

¹⁹Hazu ha ngimɔ ɛngi, hio wi bekpa yeksamɔ ka pena hio tili yeksamɔ fɛt. Angiri ha ngimɔ ka Sɔ bade nɛ nzan kanɛ sising nɛ kanɛ kpoo, ma yeksamɔ tuka ɛngi tɛ hɔ na.

²⁰Nɛ ka bo se nde, *Kongawan atikisi ma nu yala yeksamɔ ndɔng na, ki ma wi ndang lɛm mɛ kpasi na. Ma, a tikoso yo hazu wi ndɔng ka wɛnɛ weka mɛ dung hinɛ wɛnɛ.

²¹Nɛ ha ngimɔ ɛngi, ka ma wi tɔ ha ɛnɛ: ‹Ɛnɛ zɔk, *Mesi hakɛ!› Nɛ ka ma tɔ ha ɛnɛ: ‹Zɔk wɛnɛ haki!›, ka ɛnɛ amɛkiri na.

²²Hazu, ha ngimɔ ɛngi, hio wan-osili wi begbo nɛ mbwa betɔ: ‹Mi nê Mesi!› Mana mbwa betɔ: ‹Mi nê *wan-tɔkuliwen pɛ Sɔ.› Mbwa bede hio *mɔkifi nɛ hio *mɔweka, nɛ ka mbwa kpa wal, mbwa beosili nɛ hio wi ndɔng ka Sɔ weka.

²³Mɛgi, ɛnɛ dung nɛ zɔma! Hazu mi gbaa tazu ɛnɛ nɛ mɔ ndɔng bingiri kari.

²⁴«Ma, ha ngimɔ ɛngi, hapata yeksamɔ ndɔng, swe betu nɛ ze lɛm ba fin na.

²⁵Hio sɔla belun ha ngɔn tek ha nu. Nɛ hio mɔ ngɔn fɛt beyak gbirr.

²⁶Hapata, hio wi bezɔk mi, Bewei pɛ Wi, ha tɛa ha zu buswe. Mi betɛ ha zang ziomɔ nɛ ha zang *lɛkɛ-lɛkɛmɔ.

²⁷Mɛgi, mi betomsi hio *telenge pɔm. Nɛ mi bewesiri hio wi ndɔng ka Sɔ weka ha wal fɛt, dam nɛ zu nu fɛt gbo ha ngɔn.

²⁸«Lɛma nde, ɛnɛ ayambi ma mɔ nɛ wal towen hazu te fige. Ha ngimɔ ka hio gbakɔa tɛ bo nɛ mɔka nɛ ka hio waa tɛ bo ha gboa, ɛnɛ ingɔ nde, ngimɔ kolo koka kari.

²⁹Gbesi tuka ɛngi, ka ɛnɛ bezɔk mɔ ndɔng fɛt, ɛnɛ ing nde, mi, *Bewei pɛ Wi, tɛ bo sanga ha nutwa.

³⁰Mi tɔ kpasawen ha ɛnɛ nde, hio ma wi mɔ ngimɔ ɛngɛ lɛm fe na, sɔngsi mɔ ndɔng fɛt ahɔ.

³¹Ngɔn nɛ nu bepen. Ma, hio wen pɔm lɛm pen ndang na.»

³²«Ma wi ndang ing yala nɛ ngimɔ ka mɔ ndɔng behɔ na. Ngase hio *telenge ha ngɔn, ngase mi, *Bewei pɛ Sɔ, kanɛ Bafa mi sɔna ha ing yo.

³³Ɛnɛ pangay nɛ ɛnɛ ayang la, hazu ɛnɛ ing ngimɔa na.

³⁴Yo gbesi nê ma wi ka ngoy nɛ gɛnɛ. Sɔngsi ka wɛnɛ belak twa gde mɛ pen, a kapana tom ha hio wan-tom pɛa ndang ndang fɛt. Nɛ wɛnɛ haa nu ha wan-pɛm nutwa nde, wɛnɛ ayang la.

³⁵Mɛgi, ɛnɛ adung nɛ zɔma hazu ɛnɛ ing ngimɔ ka wan-twa bepe nɛ na. Mana a behɔ nɛ mbolo, mana nɛ binsila zɛ, mana wɛnɛ behɔ nɛ nu ngimɔ mana nɛ sutole, ɛnɛ ing na.

³⁶Ɛnɛ yang la yu nde, wan-twa betɛ wang ɛnɛ ha ɔala.

³⁷Wen ɛngɛ ka mi tɔ ha ɛnɛ, mi tɔ yo ha hio wi fɛt nde, ɛnɛ adung nɛ zɔma!»