Read south west gbaya Marc 16 Bible Online

Marc 16 - south west gbaya bible

Marc 16

¹Ka *swe ɔmtɛ pena kari, Marie Magdala, Salome nɛ Marie nana mɛ Jacques, mbwa hɛa dede pɛl kulo liama, hazu nɛ nɛ hɔng nɛ wɔl Jésus.

²Nɛ sutole sut hapata swe ɔmtɛ, mbwa nɛa ha zupisi ha gutɛ swe.

³Mbwa dungɔ ha ana may: «O bekinsi gasa ta ha nu zupisi ha ɔ, o nde?»

⁴Nɛ ka mbwa zɔka mɔ, mbwa kpaa nde, ɛ kinso yo yunɛ kari. Ngase ta ɛngɛ zio pentɛ.

⁵Mɛgi, mbwa lea zang zupisi. Nɛ mbwa zɔka ma pɔlɔmbɔ wi nɛ bula ha tɛ, ka dungnu ha wal wekɔ. Nɛ ke baa mbwa.

⁶Ma, a tɔa ha mbwa: «Ka ɛnɛ ayu ke na! Mi ingɔ nde, ɛnɛ ki nɛ Jésus wi mɔ le Nazaret ka ɛ ngbaa ha getakate. A bo fin hakɛ na. A guotɛ ha soko hio fiowi. Ɛnɛ zɔk hakɛ nɛ bhandi ka ɛ gdea wɛnɛ ang.

⁷Ma, ɛnɛ nɛ nɛ tɔ ha Pierre nɛ ha hio olo *wan-yambimɔ nde, Jésus pena sɔngsi mbwa nɛ ha Galile. Mbwa bezɔk wɛnɛ haki gbesi tuka ka wɛnɛ batɔ se ha mbwa.»

⁸Mɛgi, mbwa gboa ha zupisi nɛ sɔawi pen. Mbwa dungɔ kele-wele nɛ yakatɛ tututu. Mbwa tɛ tɔ wena ha ma wi na, hazu mbwa dungɔ nɛ ke. [

⁹Ka Jésus guotɛ ha bosi yala hapata *swe ɔmtɛ, wɛnɛ gbasa tɛ sɔngsi ha Marie Magdala, ka Jésus bayin se gdanga sɔtɛ mɔrkɔ zanga bwa ha tɛ wa gbosisi.

¹⁰Wɛnɛ nɛa nɛ tɔ longoa ha wi ndɔng ka badung se hinɛ Jésus. Mbwa dungɔ ha zimɔ mɔ nɛ hea kwa.

¹¹Nɛ ka mbwa zea nde Jésus nɛ tunɔ, nɛ nde Marie zɔka wɛnɛ, mbwa tɛ mɛkiri na.

¹²Hapata ɛngi, Jésus gbasa tɛ nɛ ma mbing wal ha hio wan-yambimɔ bwa, ka guotɛ ha Jérusalem mɛ nɛ ha ma bhandi.

¹³Nɛ wi ndɔng kiforo tɛ pe tɛ tɔ longoa ha hio mbinga. Ma, ngase ɛngi, hio mbinga tɛ mɛkiri wen pɛ mbwa fin na.

¹⁴Hapata, Jésus gbasa tɛ ha hio wan-yambimɔ bhukɔ gbala ndang ha ngimɔ ka mbwa dungɔ ha yɔngamɔ. A sɛna wen ha mbwa, nɛ a tɔa: «Ɛnɛ si kafɛ hazu ge? Nɛ sila ɛnɛ dung gdang-ting hazu ge? Ɛnɛ tɛ mɛkiri wen pɛ wi ndɔng, ka zɔka mi hapata guotɛ pɔm na hazu ge?»

¹⁵Nɛ wɛnɛ tɔa ha mbwa fin: «Ɛnɛ nɛ ha nzan fɛt, nɛ bul *Dede Wen ha hio wi fɛt.

¹⁶Wi ka bemɛkiri, nɛ ka ɛnɛ begdumsi wɛnɛ ha li, Sɔ bekpasisi wɛnɛ. Ma, wi ka mɛkiri na, kita beba wɛnɛ.

¹⁷Wi ndɔng ka bemɛkiri mi, mi beha mbwa ziomɔ mɛ de nɛ hio *mɔweka. Mbwa beyin hio gdanga sɔtɛ nɛ ling mi. Nɛ mbwa bewolmɔ nɛ hio mbombe nu.

¹⁸Ngase ka mbwa beba hio da gɔk, mana ka mbwa benɔ hio gdanga yina, gdangamɔ ndang lɛm hɔ ha tɛ mbwa na. Mbwa begde kɔ mbwa ha zu hio wan-zɛlɛ nɛ zɛlɛ bekari.»

¹⁹Nɛ ka *Kongawan Jésus tɔa wen ndɔng ha hio *wan-yambimɔ pɛa fɛt kari, Sɔ guo wɛnɛ si nɛ ha ngɔn. Nɛ a dungɔnu ha wekɔ Sɔ.

²⁰Nɛ hio wan-yambimɔ pena nɛ bul *Dede Wen ha bhandi fɛt. Mɛgi, Kongawan dungɔ ha dea tom hinɛ mbwa. A dea hio *mɔweka nɛ wal mbwa hazu gbasi ha hio wi nde, Dede Wen ka hio wan-yambimɔ bul nê tɛwen.]